11 APR 2021
أزمة السد بــ عيون مصرية … !!
——————————–
طبعا بغض النظر عن التحركات المصرية من حيث توقيع إتفاقيات عسكرية وأمنية مع أوغندا وروندا وتانزانيا والكونغو.. ومحاولات جارية الأن مع الصومال … ناهيك عن التكامل الإقتصادى والعسكرى مع السودان والتقارب مع جنوب السودان .. و ده غير الأخبار المتداولة بشكل غير مؤكد عن تقليص دولة الكيان لبعثتها الديبلوماسية فى أديس أبابا … ما علينا .. مالناش دعوة إحنا يا موهى 😁
لكن الحقيقة متابعة لقاء وزير الموارد المائية والري المصري محمد عبد العاطي بالأمس مع الإعلامى عمرو أديب .. أصابنا بنوع من السعادة والإطمئنان .. بل والإنشكاح المعنوى🙂 … بسبب كلامه وأسلوبه والمعلومات اللى قالها والثقة اللى كان بيتكلم بيها المشوبة بخوف وحرص على البلد …
وعلشان مانطولش على حضراتكم .. فــ إحنا هــ ننقل النقاط اللى لفتت نظرنا فى كلام سيادة الوزير .. و هــ نعلق تعليق مختصر بين قوسين على كل نقطة .. لأنه خلاص ماعادش فيه كلام تانى يتقال
◀️ فى كل المفاوضات واللقاءات وأخرها مفاوضات كينشاسا .. كان شيئ ملفت للجميع حتى للأطراف الخارجية المشاركة فى أى لقاء .. إنهم يتفقوا معانا على حاجة ويوافقوا عليها .. أو يوافقوا على رقم يخص تفصيلة معينة .. وبعدها ييجوا فى الجلسة اللى بعدها .. أو فى المباحثات التالية يقولوا لأ إحنا مش موافقين على ده .. دى كانت زلة لسان 🙃 …
⛔️ (ده بــ يأكد الكلام اللى قولناه قبل كدة إن صوت أثيوبيا مش من دماغهم .. وإن اللى بــ يشغلهم بيملى عليهم كلامه .. وبيبقى عارف إن اللى مصر عايزة توصل له مش فى مصلحته .. وعلشان كدة بيغير الحاجة دى حتى لو تم الإتفاق عليها بالفعل).
◀️ أنا عايز بس أؤكد على حاجة مهمة وهى إنه “ليس كل ما يعرف يقال” .. وأنا مسئول أمام الناس فى حدود الكلام اللى أنا باقوله بس ….
⛔️ (وده معناه إن الوزير عنده معلومة إنه فيه سيناريوهات متحضرة للى ممكن مصر تقوم بيه .. بس ماينفعش يقولها أو يعلن عنها).
◀️ قرار الحرب قرار مش سهل .. وماينفعش ناخد قرار تحت ضغط و فى توقيت مش مناسب .. ولازم الناس تسيب صاحب القرار ياخد القرار فى التوقيت الصح … المواطن عنده حق بس الدولة هــ تاخد القرار المناسب فى الوقت المناسب …
⛔️ (يعنى إحنا لا هــ ننجر لمعركة مش فاهمين أبعادها ودارسينها .. ولا هنستسلم للضغوط .. لكن هــ نختار الأسلوب الأمثل والتوقيت الأنسب لأى تحرك بالشكل اللى يحقق الهدف المرجو .. و دى رسالة للداخل والخارج)
◀️ كلمة الحرب دى كلمة صعبة .. لكن مانقدرش نحيدها .. لكن قبل ما نلجأ لها ، فــ لازم يبقى فيه إستنفاذ لخطوات وإجراءات تصعيدية كتيرة جدا .. اللى داخل حرب عارف يعنى إييه حرب ..و إحنا بنقول إننا مش ضد التنمية ومش عايزين مشاكل بس إنتوا كمان (يقصد اثيوبيا) ماتعملولناش مشاكل .. لأن قرار الحرب ده قرار صعب .. ويجب ألا نضطر للجوء إليها ….
⛔️ (تهديد مبطن من الوزير إنه سيناريو الحرب مطروح .. فــ بلاش تضطرونا إننا ناخد قرار الحرب).
◀️ مبادرة تبادل المعلومات دى بتبقى خطوة لتطبيق إتفاق .. وإحنا ماعملناش إتفاق أصلا علشان نتبادل عليه معلومات .. أما لو هم يقصدوا معلومات عن السد وملئ وأمان السد ، فــ إحنا متابعينها أكثر منهم وعندنا معلومات أكثر من اللى عندهم .. والبيانات والمعلومات سهل جدا إننا نجيبها .. مافيش فيها أى مشكلة ..
⛔️ (بجد لا تعليق 🙈😅)
◀️ هو بنسبة كبيرة هــ يملا لأن عنده مشكلة داخلية وعايز يوجد لها مخرج بإنه يحسن صورته الداخلية عن طريق إنه يبدأ الملئ .. لكن بنسبة كبيرة هو مش هــ يستفيد من الملئ ده لأن الأخطاء واردة جدا فى تشغيل للتوربينات … 😎😁
⛔️ (ده تعليق يحمل فى طياته الكثير .. وبيتوافق مع تصريحات الوزير سامح شكرى أسد الخارجية لما قال بعد فشل مباحثات كينشاسا ، جواباً على سؤال عن رد فعل مصر .. إن مصر مابتتحركش بناء على تصريحات .. لكن هــ تتحرك فى حالة الفعل .. وطبعا ماحدش عارف التحرك ده هيبقى شكله إييه وإزاى)
◀️ مصر قادرة على تجاوز أزمة الملئ الثانى إن حدث .. لأن الدولة شغالة بأسلوب علمى وعملنا 15 سناريوا محاكاة لكل الإحتمالات المتوقعة سواء داخليا أو خارجياً .. وقال إننا فى 2016 وصل لنا نصف حصتنا فقط بسبب موسم الجفاف وماحدش من المواطنين حس بشئ … لكنه ختم كلامه فيما يخص الجملة دى بجملة واضحة وصريحة ومافيهاش أى تأويلات وهى إن “الدولة مش هــ تسمح بحدوث أى أزمة مياه فى مصر” ..
⛔️ (يعنى بــ يأكد تانى إنه ماحدش هــ يقدر ياخد شيئ من حصة مصر)
◀️ كل مليار متر مكعب من المياه ينقص من حصة مصر هيتسبب فى تبوير مليون فدان .. يعنى فقر وتشريد مليون أسرة .. يعنى الناس دى لما تتشرد هــ تسيب البلد وتهاجر لأوروبا .. ولما عمرو أديب إستدرك وقاله قصدك هجرة من الريف للحضر .. قال له لأ .. لأوروبا هجرة غير شرعية .. وفى الحالة دى أنا مش هــ أقدر أمنعهم لأن الأعداد هــ تبقى كبيرة ولأسباب مفهومة …
⛔️ (ده كمان تهديد تهديد لأوروبا و دول الغرب إنى مش هــ شيل الشيلة لواحدى .. وهــ تتفتح عليكم أبواب جهنم .. وإنه من مصلحتكم تقفوا معانا يا إمّا ماتكلمنيش بعد كدة عن ملف الهجرة الغير شرعية .. وإنتم عارفين مصر شايلة عنكم إييه فى المنطقة اللى إنتم خربتوها !!! )
◀️ الوزير قال بنظرة ثاقبة وبعيون بتلمع إن الأفضل لأثيوبيا إنها تمشى معنا فى المسار التفاوضى .. ولو ده ماحصل فــ هــ يحصل توتر كبير فى المنطقة و هــ تبقى هى أكثر المتضررين ” …
⛔️ (ده كمان إنذار .. و تأكيد لكلام الرئيس السيسى اللى قاله فى مؤتمر قناة السويس .. وكلامه بعدها بكام يوم مخاطبا أثيوبيا لما قال لهم بلاش توصل لمرحلة إنك تمس نقطة مية من مصر لأن الخيارات كلها مفتوحة)
فى المجمل دى كانت أهم النقاط اللى لفتت نظرنا فى الحوار .. لكن كان عندنا ملحوظتين مهمين جداً:
#الملحوظة_الأولى .. إن كل الدول المعنية ووسائل الإعلام العالمية ، بــ تتابع عن كثب أى تصريح بــ يصدر عن مصر فى ملف السد الأثيوبى .. وبتاخده وتدرسة وتحلله … ومعنى إن وزير الرى يطلع فى برنامج له نسبة مشاهدة عالية ويقول الكلام ده .. فــ ده معناه إنه كان فيه رسائل مطلوب إنها توصل لكل الأطراف المعنية
#الملحوظة_الثانية .. إنه برغم إن البرنامج كان مذاع على الهواء .. إلا إن اللقاء مع الوزير كان مسجل .. و ده مالوش أى معنى غير إن اللقاء ماكانش عفوى .. وإنه إتعمل وإتراجع وتم دراسة كل الأسئلة والإجابات علشان تخرج بالشكل ده وتبقى واضحة وصريحة فى رسالة لا تحتمل أى تأويل
و فى النهاية .. بنأكد تانى إننا مع مصر .. و فى ظهر القيادة المصرية .. فى أى قرار ممكن تاخده .. ومؤمنين إن القرار ده أياً كان هيبقى هو القرار الصح والأنسب …
وإفتكروا كلمة الرئيس السيسى لما قال فى أحد اللقاءات مخاطباً المصريين .. “هو كنت ضيعتكم قبل كدة علشان اضيعكم بعدين” …. حتى إبقوا إسألوا دولة الأغا 😉🙂
حفظ الله مصر وجيشها وشعبها
و رمضان كريم علينا كلنا يارب 🙏