20 Apr 2021
بيان وزارة الرى بالأمس بخصوص سد النهضة والخطوات التحضيرية للملئ الثانى اللى بتقوم بيها اثيوبيا … والتفاصيل الفنية والكم الكبير من المعلومات اللى وردت فى البيان عن السد وتشغيله وقواعد الملئ وخلافه بتقول حاجتين مهمين جدا:
#الأولى: ان وزير الرى فى اللقاء الاعلامى اللى عمله مع الاعلامى عمر أديب لما قال زى ماذكرنا فى مقال سابق ان مصر عندها معلومات عن السد اكثر من اللى عند اثيوبيا .. ماكانش بيبالغ ولا كان بيقول كلام شعبوى من قبيل الفرقعة الاعلامية …
#الثانية: إن الجانب الإثيوبي فى حقيقة الام و فعليا عريان “ملط” قدام الأجهزة الأمنية المصرية … وبنقدر نجيب المعلومات اللى احنا عايزينها فى الوقت اللى احنا عايزينه … واحنا كدة مش بنذيع سر ولا حاجة … لكن ده اللى الواقع بيقوله ….
هتقوللى طب كسبنا صلاة النبى … استفدنا اييه من الكلام ده … ماهو اثيوبيا كدة كدة هتعمل الملئ الثانى وحصتنا هتقل .. وكدة اتفرض علينا الامر الواقع .. ومصر هتعطش … و هم مستنيين اييه علشان يضربوا السد ويجيبوا عاليها واطيها … !؟
يابنى يا حبيبى الملفات على مستوى الدولة مش بتتحسم كدة … ولا بتخضع لنفس منظور حكم الأفراد على الأمور .. وطريقة ادارتهم لحياتهم اليومية … وخليك فاكر ان فيه ملفات كانت على نفس المستوى من الخطورة . وماكانش عاجبنا اللى اتعمل … واكتشفنا بعد كدة انه ده كان أصح حاجة تتعمل
كنت بتقول هى مصر ساكتة لييه على اللى بيحصل فى ليبيا … ومستنية اييه والاغا عمال ينقل المليشيات والمرتزقة بتاعته لغرب ليبيا … طب مايدخل الجيش يساويها بالأرض .. لكن النهاردة انت دخلت طرابلس ورئيس وزراء دولتك بيخاطب العالم من قلب الغرب الليبيى من غير ماتضرب رصاصة واحدة !!
كنت بتقول هو ملف الإعلام متساب لييه .. والنهاردة أديك شايف القوة الناعمة عاملة اييه .. والفرق بين الإعلام الاخبارى والتوك شو دلوقتى والاعلام من ٦ سنين فاتوا واضح جدا حتى لو لسة عندك بعض الانتقادات
كنت بتقول ازاى الدولة تسيب الاخوان يوصلوا للحكم … والنهادة كلنا بنقول الحمد لله انهم وصلوا للحكم علشان يطلعوا من تحت الارض ويتفضحوا …
وغيره .. وغيره .. وغيره .. من الملفات المهمة والحيوية اللى تمس الدولة المصرية وامنها القومى.. وأمن المواطن … وكان دايما بتطلع رؤية الدولة هى الصح … فياريت تهدى كدة وتستهدى بالله وتسيب الدولة تدير معاركها بالشكل الصحيح … وبدون اى مزايدات.
حقك تبقى قلقان … واحنا كمان قلقانين … لكن عندنا ثقة مطلقة فى القيادة السياسية اللى بتعرف ازاى تدير معاركها وبتختار التوقيتات المناسبة لانهاء معاركها .. وبالطريقة الصحية .. ومن غير مايبقى فيه اى تداعيات علينا على المدى القريب او البعيد.
حفظ الله مصر برئيسها وجيشها وشعبها 🙏