01 May 2021
من واقع الأحداث .. !!
———————-
⭕️ سيبوه .. ده مجرد ذيل الأفعلى مش راسها .. ولو عملناله حاجة .. هم اللى هــ يبيعوه ويجيبوا غيره بكرة الصبح
🔹 أيوة يافندم .. بس البرامج إبتدت تستضيفه وتعمل منه بطل شعبى !!
⭕️ طب نعمل إييه .. مانقدرش نقول للناس كل اللي نعرفه ، ومانقدرش نحاسبهم على اللي مايعرفوهوش
#هجمة_مرتدة
#من_ملفات_المخابرات_العامة
المشهد القصير ده من مسلسل هجمة مرتدة واللى بــ يدور فيه حوار بين ضابط المخابرات والرئيس بتاعه .. بــ يوضحلك ببساطة خالص أسلوب عمل أجهزة المخابرات … والفارق الضخم بين المنطق الأمنى ، والمنطق الشعبى للأفراد العاديين … و بــ يرسخ لمبدأ إنه ليس كل ما يعرف يقال ..
أيوة … الأجهزة الأمنية بتبقى عارفة حاجات ماينفعش تقولها أو تطرحها على الملأ .. إما لأن المواطن العادى مش هــ يقدر يستوعبها ولا يصدقها .. أو لأن الحاجة دى بتبقى جزء صغير من ملف كبير خيوطه متشابكة ومرتبطة وبتتقاطع بشكل مباشر مع ملفات الأمن القومى .. وكشف جزء صغير منها ممكن يضيعلك مجهود ومعلومات شهور ويمكن سنين شغل ..
وخصوصا إن العملاء النهاردة فى حروب الجيل الرابع .. زى ما ذكرنا فى مقال سابق ، مابقوش بيستخبوا أو بــ يتداروا زى زمان .. لكنهم بــ يتحركوا فى شكل شبه علنى و هم متغطيين بغطاء يحمل صفة الشرعية الأممية والدولية .. من خلال مايطلق عليه منظمات حقوقية و المواخير الداعية للديموقراطية والبتنجان بالمهلبية .. ومنظمات المجتمع المدنى ومؤسسات صحفية ممولة بشكل مباشر من كيانات ودول بتكون معادية ليك .. ووكل دوول بيتحركوا من خلال الأفراد اللى بــ يتنتموا ليهم ، للدفع فى إتجاه تفجير الأرض تحت رجليك .. واللعب فى ملفات ما يطلق عليه بالملفات الدينية وحقوق الأقليات .. وتأليب الرأى العام .. وغيرها … وكله بشكل قانونى تحت ستار حرية الرأى والتعبير !!
يعنى واحد زى “البوب” لما جاء فى 2010 تحت ستار ما يسمى بالجمعية الوطنية للتغير .. ماكانش ملاك جاى يرفرف بجناحات وهو بيتكلم عن أهل النوبة واهل سيناء وحقهم فى تقرير المصير … وكل المصريين دلوقتى عارفين مين هو البوب .. غراب تويتر .. وتوجهاته إييه
واحد زى “أيمن نور” لما عمل حزب الغد ، وكان مرشح نفسه للرئاسة … ناس كتير كانت شايفاه ملاك بجناحين برغم إنه فى حقيقة الأمر كان بيتعامل مع أجهزة خارجية و بــ ينسق مع الإخوان .. وكلنا عرفنا ده بعد كدة
واحد زى “وائل غنيم” لما الإعلام عمله زعيم شعبى … ماكانش ملاك بجناحين ونفسه البلد تبقى احسن و .. وكدزة …، والأجهزة الأمنية كانت عارفة هو مين و بيعمل إييه … والحمد لله المصريين كلهم النهاردة عرفوا توجهاته
و غيرهم كتير .. زى علاء عبد الفتاح .. وعبد الرحمن القر.ضا.وى .. وجميلة إسماعيل … و زى المقاول محماااا على .. وشخاليل إعلام الأغا فى أسطنبول .. وغيرهم وغيرهم … لأن كل واحد له وقته …
ميزة فترة حكم الإخوان إنها كانت فترة كاشفة .. لأنها فضحت ناس كتيرة … ناس كانت بتستغل مشاعر المواطنين العاديين اللى إعتادوا إنهم يتعاطفوا مع أى حد فى مواجهة السلطة .. بإعتباره الملاك المخلص .. علشان كدة ماينفعش نقول .. طب مش كانوا يقولولنا .. طب مش الدولة المفروض تفهمنا .. طب .. ماهو اصل كان مفروض ….. وكل الطقاطيق الجميلة اللى بنسمعها وبنقولها دى …
ده مش بيحصل فى أى حتة فى العالم .. وانت عارف ومتأكد إن دولتك مستهدفة .. علشان كدة ماينفعش ترمى نفسك فى البحر .. وتسيب نفسك للمجهول .. وتتجاهل بوصلتك الوطنية .. وبعدين ترجع تقول هى الدولة مامسكتش إيدي لييه …
إنت ممكن تلاقى الدولة بتديك تنبيهات من بعيد .. لكن ماتقدرش تكشفلك كل حاجة .. وإلا يبقى كدة بتخسر مساحة حركة كبيرة على رقعة الشطرنج المعلوماتية
حفظ الله مصر برئيسها وجيشها وشعبها 🙏