14 May 2021
القضية والمحن السياسى !!
—————————
🔹️ يبقى قايم نايم بيشتم فى الجيش المصرى وبيتهمه بالعمالة .. وبيقول عليه جيش الكحك والجمبري والمكرونة .. و أول ماتحصل مشكلة فى الارض المحتلة تلاقيه بيلطم ويولول ويقولك … هو فين الجيش المصرى !!؟ ….
انت عب.يط يابنى … مش بتقول عليه جيش مكرونة !!
🔹️ يبقى بيتغزّل فى دولة الاغا و فى كشك الخليج .. ويحكى ويتحاكى عن مواقفهم لدعم القضية … وينشر صورهم ويكتب عليها “القدس تنتظر الرجال” … لكن وقت الجد تلاقيه بيقول أومّال فين مصر !؟ …. طب كويس انك عارف من جواك مين هم الرجال ومين اللى “ولا مؤاخذة مش …” !
🔹️ تبقى المشكلة فى القدس … وتلاقيه بيزايد عليك ويقولك افتحوا المعابر …. إنت أحول يابنى … المشكلة هناك مش هنا…. وإلا الأسياد اللى مشغلينك محفظينك كلمتين تقولهم ومابتعرفش تقول غيرهم ..
🔹️ تلاقيه بيصرخ ويقولك الجيش المصرى ساكت لييه … دى غزة فى محيط امن مصر القومى … لكن ييجى لحد ليبيا ، و علشان خاطر خليفته ، تلاقيه بيقولك مصر مالها ومال ليبيا …. أااه صحيح … معاك حق … أصل غزة أمن مصر القومى .. لكن ليبيا أمن موول سيتى ستارز !!
🔹️ يبقى بيأيد الاغا وبيدعمه علشان بيبعث مرتزقة للعراق وسوريا وليبيا .. ويقولك من حقه يعمل كدة علشان يقيم دولة الخلافة …. طب ياترى المرتزقة دوول مش بيروحوا يحاربوا فى فلسطين لييه !!؟ … مش على وضوء مثلا !!؟
🔹️ عايز يحرر القدس .. فيحمل السلاح ويحارب الجيش المصرى فى سيناء … وبدل ما يعدى الانفاق ، يستنى السلاح يجيله عبر الانفاق علشان يقتل المصريين فى سيناء .. وينضم لتنظيم اسمه أنصار بيت المقدس ، عمره ماضرب رصاصة على إسرائيل.. لكن قاعد بيحارب الجيش المصرى فى سيناء
🔹️ لما الدنيا تبقى بييس يامان ، تلاقى المزادات شغالة عليك من المزايدين العرب “افتحوا المعبر يامصاروة باش نحرر القدس” .. ووقت الجد ماتسمعش غير صوت صرصور الحقل الحزين ….. على فكرة الحدود البحرية والبرية والجوية لدولة الكيان مفتوحة للى عايز يحرر اللى هو عايزه …. ماجاتش يعنى على خرم الإبرة اللى اسمه المعبر !!
🔹️ الفلسطنيين مافكروش مرة يوحدوا الفصائل بتاعتهم علشان يبقى لهم كيان موحد يحاربوا بيه عدوهم ويرجعوا ارضهم … وبدل مايوجهوا طاقة غضبهم لدولة الكيان .. مش بيشوفوا غير مصر والجيش المصرى يشتموا فيه ويقولولنا ابعتوا كتايب الجيش تحارب لنا … لا ياحبيبى … اتفضل خش انت وحارب واحنا وراك .. وهندعمك .. ونحارب معاك … احنا مش بنحارب بدل حد … وإلا أقولك … ماتقول للخليفة بتاعك ييجى يحاربلك !!
🔹️ حركة ال ولامؤاخذة “سماح” كانوا بيقولوا انهم عندهم مقاتلين قادرين على هزيمة الجيش المصرى فى 6 ساعات .. لكن المقاتلين دوول وقت الجد، بيبقوا قاعدين يلطموا ومستنيين الجيش المصرى يحارب لهم حربهم ….
🟢 واضح كدة ان مؤامرة داعش وماعش والخليفة والخلافة و زعيط ومعيط ونطاط الحيط ، اللى خلفتها مؤامرة الخراب العربى فشلت وانتهت وفقدت تأثيرها ، بعد فضح ابواقها ، وتحطيم ادواتها ، وحرق رموزها … و أصبح هناك حاجة ماسة لإعادة استنساخ الماضى بالعودة لما قبل 2011 فى محاولة جديدة لغسيل سمعة تنظيمات التأسلم السياسى و إعادة انتاج مظلومياتهم من جديد من خلال بوابة القضية … وكالعادة بيكون الرهان الرابح من وجهة نظرهم هو المزايدة على مصر والمصريين !!
لأ معلش يا حبيبى انت وهو … كان زمان و خلص …. المصريين ماعادوش بياكلوا من الكلام ده .. ولا بيستسلموا للمزايدات .. ولا عاد بينضحك علينا بشعارات المحن والولولة والكربلائيات … ولا بنتخدع بشغل النضال الفيسبوكى … ولا بقى فيه عندنا أهم من بلدهم … لأن الايام اثبتت ان اكثر ناس بتتاجر بالقضية .. هم أكثر ناس مش عايزينها تتحل … لأنهم مستفيدين من الوضع القائم …
اللى عايز يحل مشكلته يتفضل يحلها … ومصر هتدعمك بكل طاقتها .. وهتقف فى ظهرك سياسيا ولوجيستيا وماديا …. لكن ماحدش هيحاربلك حربك …… حرب الصواريخ الفشنك .. والتصريحات الشعبوية على السوشيال ميديا 😎
حفظ الله مصر برئيسها وجيشها وشعبها 🙏