كلمتين وبس

 3 Dec 2015

 

كلمتين وبس

————- 

خلص المهرجان وإنفض المولد وبقى عندنا برلمان ..

وبغض النظر عن اى كلام عن ضعف الإقبال أو المقاطعة او عدم المشاركة .. لكن فى النهاية القصة كلها كانت مش أكثر من إمتحان ,,

أيوة إمتحان ..

 إمتحان للمطبلاتية والمهللاتية

 إمتحان لبتوع إحنا عايزين ديموكررررراتية

 إمتحان لبتوع الحرب على الفوساااااد

 إمتحان لبتوع دولة الكمع والزووولم والكهر .. والبلد لازم تتغير

 إمتحان سقطوا فيه كلهم بكل جدارة .. واثبتوا إنهم ولا عايزين تغيير ولا قضاء على فساد ولا عايزين يتحركوا من الأساس لأنهم فرحانين بلعب دور المولولاتية وخلاص .. وعايشين فى دور الثورجية من منازلهم .. ولو فرض ونزلوا الشارع ، يدوّروا على عصابات الإخوان .. ويكون نزولهم للتخريب والمولوتوف والشتائم والسباب .. لأن ده تمامهم .. لأنهم اصبحو متأكدين إنهم من غير الكتلة الصلبة والظهير الشعبى مالهومش فعليا اى وزن على الأرض .. و ولا يعرفوا أى حاجة عن كيفية التغيير الديموقراطى اللى هم بينادوا به !!

 الشعب المصري أثبت وعي غير طبيعي في انتخابات مجلس الشعب وأصبح مايتخافش عليه فعلا ..

الشعب المصرى سقّط فى الإنتخابات كل تجار الدين من المتأسلمين وخرجهم من دايرة حسابات الشعب تماماً .. وسقّط كمان معظم بتوع الشعارات الثورية اللى بتلعب على وتر الفوضى وحق رووووقة =D =D  … وسقّط برضوا بقدر المتاح بتوع المال السياسى ،.. إلا من عجز منهم عن مقاومة إغراء المادة .. و ده شئ طبيعى ونسبة مقبولة فى دولة تمر بمشاكل إقتصادية ومستوى معيشى صعب .. ولكن بالرغم من ده ، وبرغم كل الملايين اللى إتصرفت .. ماحدش قدر يسيطر على البرلمان .. لإن فيه ناس وخصوصاً من الغلابة اللى كل من هب ودب بــ يتاجر بغلبهم وبــ مشاكلهم ، كانوا بياخدوا الفلوس من بتوع المال السياسى وتجار الدين ، وبعدين يروحوا ينتخبوا الوطنيين …

 البرلمان جاء متوازن إلى حد كبير .. وموضوع الخوف من إن حد يسيطر على البرلمان زى ما كان بيتقال من البعض ، وبدون ذكر أسماء .. أو على أقل تقدير الوصول لنسبة الثلث المعطل اللى ممكن يوقّف المراكب السايرة خلاااااص بح !!

 وبغض النظر عن المخالفات اللى قام بها بعض المرشحين واللى أصبحوا معروفين للشعب .. لكن الوضع العام بيقول إن الإنتخابات كانت نزيهة فى إطار العملية الإنتخابية والتأمينية والرقابية سواء من القضاء أو من المنظمات الحقوقية .. وماحدش يقدر يقول كلمة عن نزاهة الإنتخابات أو يتهم الدولة بالتزوير لأن كله كان على عينك ياتاجر. 🙂

وكلمة أخيرة ..

 أى دائرة نجح فيها حرامى او مرتشى أو إخوانى أو سلفى أو حد من طوائف المتاجرة بالشعارات من عينة ستة إبليس وشوية الصيع اللى بيقولوا عليهم نشطاء ، أو أى حد من أصحاب المال السياسى زى المصريين الأحرار وخلافه ، فى اى دائرة على مستوى الجمهورية ، ياريت بعد كدة مايجيش حد من الدائرة دى ويتكلم عن المجلس أو ينتقده ، أو يفتح بقه ويقولك الفساد وكل الأكلاشيهات المعروفة دى .. لأننا هــ نقول لك كان الأولى بيك إنك تنتخب حد محترم بدل ما تقاطع او تنتخب غلط !! .. وعلشان كدة مالكش حق فى أى كلام أو حتى اى نقد لأنك زيهم .. إنت اللى عملت كدة !

 مبروك لمصر إستكمال الإستحقاق الثالث فى خارطة الطريق ، واللى جاء فى وقته ، علشان يبقى فيه حد يشيل الشيلة مع الرئاسة ، ويحاسب الحكومة بإسم الشعب ، ويحط قوانين محاربة الفساد السياسى والإدارى ، فى ظل الظروف الصعبة والتحديات اللى بــ تواجه مصر أو بــ تمر بيها المنطقة كلها

 شكراً لرجال الجيش والشرطة والقضاء .. وكل من ساهم فى إنجاح الإنتخابات .. و ألف مبروك للشعب المصرى .. وتحيا مصر ماحدش تانى ..

لمتابعة تعليقاتكم