18 May 2021
القدس الأسير .. وحقائق كاشفة !!!
———————————-
لحد دلوقتى ماحدش فاهم إييه اللى خلّى “نتن.ياهو” يتجنن ويعمل اللى عمله فى قرية شيخ جراح إحدى قرى الجانب الشرقى لمدينة القدس …
– لو عايز تقول إن ده بسبب الإنتخابات .. هــ اقولك طبعا أكيد …
– لو عايز تقول إن ده كان بالونة إختبار وقياس لرد الفعل .. بعد ما مؤامرة الربيع العبرى فى 2011 أتت بثمارها ، بتدميرها للبقية الباقية من القوى الإقليمية العربية التقليدية (ماعدى مصر) ، وخلفت لنا إما أشلاء دول .. أو دول شبه منهارة ، بتكافح علشان تقدر بالكاد تحافظ على نفسها السقوط … هــ أقولك ده كلام مافيهوش فصال
– لو عايز تقول إن ده كان عملية مترتبة ومدروسة لتغيير الوضع الديموجرافى لمدينة القدس .. ثم الزج بمصر كطرف أساسى و أصيل فى القضية الفلsطينية .. وعودة التلويح حتى ولو بأسلوب غير مباشر بسيناء كجزء من الحل اللى ممكن تتحل بيه القضية على حساب الدول الحدودية لدولة الكيان .. وبالتالى تشتيت مصر ومحاولة إلهائها عن قضية المياه اللى هى مسألة حياة أو موت بالنسبة لمصر … هــ أقولك وماله .. مايضرش .. وارد جداً
لكن بغض النظر عن السبب فى كل اللى بيحصل … فــ اللى حصل ده ، وضع أمام كل من له عين تبصر وعقلٌ يعى ويدرك .. مجموعة من الحقائق الكاشفة اللى مش ممكن إنكارها
⭕ إن قضية القدس عمرها ما هــ تموت … وإنها هتفضل هى قلب الخلاف ولب القضية ومحورها
⭕ إنه فيه سبوبجية عاملين زى السوس اللى بينخر جوة الخشب .. وكل همهم إنهم يتاجروا بالقضية للحصول على مكاسب شخصية .. وعلشان كدة كل مرة تثار فيها قضية القدس ..على طول بتطلع الصواريخ الفشنك علشان تنقل بؤرة الضوء من القدس إلى غزة وكأنها هى القضية الأساسية .. وبدل ما صحف العالم والدول والمنظمات الدولية يتكلموا على القدس .. تلاقيهم بقدرة قادر بيتكلموا عن غزة والصراخ والعويل والضحاية اللى فى غزة .. وكأن السبوبجية متفقين مع المحتل البغيض إنهم يلهوا العالم عن القضية الرئيسية .. قضية الأرض والقدس ..
⭕ إن دولة الكيان دولة هشة جداً .. وإن اصحاب الأرض لو تماسكوا و إتحدوا بالفعل تحت راية واحدة بعيدا عن الفصائل المتناحرة ، والتقسيمات الأيديولوجية ، ومناضلين السبوبة .. الدولة دى ممكن تنهار فى غضون شهور … وخصوصا لو تم إستخدام نفس تكنيكات الربيع إياه فى عقر دار دولة الكيان .. وإنهاك الجهاز الأمنى الداخلى ، والقيام بعمليات لتدمير البنية التحتية والقيام بإضرابات وعصيان مدنى .. كل ده يقدر يؤدى للإنهيار التام
⭕ إن الصواريخ الفشنك اللى بتعيد إستنساخ سنوات إنتفاضة وحروب 2006 و2008 و2012 و2014 .. مالهاش أى هدف غير إغراء ألة الحرب فى دولة الكيان لإجتياح أو على الأقل دك قطاع غزة وإسقاط وفيات علشان ماكينة الدولارات تشتغل .. وسبوبة التبرعات تبدأ تضخ الملايين … وياريتها بتصب فى مصلحة أهالى القطاع .. لكنها بتصب فى جيوب أصحاب السبوبة والمتاجرين بالقضية من جمعية حركة “سماح” وشركاه .. و ده اللى حصل مع الدعوى لإنشاء صندوق تبرعات تحت تصرف ولامؤاخذة “حماس” ..
أومّال هم بــ يقيموا فى الفنادق الفخمة وبــ يمتلكوا الفيلات والشقق الفاخرة فى أوروبا وبيركبوا المرسيدس منين يعنى ! 🙄
⭕ إنه أكثر من 200 حركة وجماعة إسلامية مسلحة بقالهم 10 سنوات بيقاتلوا فى الجيوش العربية ، وبيهدموا فى الدول العربية وبــ يشردوا شعوبها تحت شعار إنشاء الخلافة من اجل تحرير القدس .. ولما القدس نادتهم .. مافيش حد فيهم ضرب رصاصة لحماية القدس … وجماعة الإخوان بتنظيمهم الدولى اللى حملوا كل أنواع الأسلحة والمتفجرات والمفخخات وإستخدموا الصواريخ والجرينوف و الأر-بى-جى فى ليبيا وسوريا والعراق ومصر … مافيش عنصر فيهم فكر يرمى زجاجة مياه سخنة على عسكرى إسر$ئيلى … لكن الصراحة هم قاموا بالواجب .. و دعوا للنزول فى مظاهرات ضد العدو الإسر$يلى .. لكن فين … فى مصر 😎
⭕ إن دولة الأغا والجيش المحمدى وجنود الخلافة .. مش بيحملوا السلاح وبيصرفوا المليارات غير علشان يحتلوا الدول العربية ويسيطروا على ثرواتها .. ضاربين عرض الحائط بكل القوانين والنظم الدولية حتى لو كان الثمن تقسيم الدول دى وتشريد شعوبها .. لكن ييجوا لحد دولة الكيان .. ويقولك إحنا لازم نصعّد سياسيا .. وتسمع منهم أحلى تصريحات شعبوية من اللى بتعجب المجا.ذيب ، والخر.فان … لكن فعل على الأرض .. ماتلاقيش
⭕ إن منظمة العفو الدولية .. وهيومان رايتس ووتش .. و فريدام هاوس .. وغيرها من المنظمات اللامؤاخذة حقوقية كلها عبارة عن منظمات وهيئات ومكاتب وظيفية .. تعمل لحساب توجهات أصحابها وداعميها … وإنهم كلهم موجهين لبلادنا ولأعداء الأنظمة الغربية .. ومش بيشوفوا غير إن الإرهابى ده كيوت وجميل ولازم تواجه رصاص بندقيته بــ وردة .. ولازم تستأذنه قبل ما تقبض عليه .. وغير كدة يبقى إنتهاك وعداء للإنسانية وتعدى على حقوق الإنسان .. لكن نيجى لأى إنتهاكات تحدث فى أرض دولة الكيان .. والأطفال والنساء اللى بتموت فى غزة من القصف .. وإطلاق الرصاص الحى على المتظاهيرن فى المدن الفلsطينية .. تلاقيهم عملوا من بنها … ولو كان ولا بد يعنى ، وحفظا لماء الوجه .. بــ يصدروا بيانات مايعة لا تسمن ولا تغنى من جوع .. ده إن صدرت يعنى.
⭕ إن وقت الجد .. مافيش دولة بتقف مع القضية وبتدعم الفلسطينيين بكل جدية وعلى كل المستويات سواء سياسيا أو لوجيستيا او ماديا .. وبكل حب .. وبدون أى مزايدات أو بروباجاندا إعلامية غير مصر .. أيوة مصر .. مصر اللى بتقف فى ظهر القضية فى كل المحافل الدولية وبتتحرك تحركات إيجابية فعلية وليست إعلامية .. مصر اللى بتفتح المعبر وبتمرر مساعدات غذائية وطبية مصرية وغيره .. مصر اللى بتفتح مستشفياتها للفلsطينيين بدون مقابل .. مصر بتمنح مساعدات مادية وبتساعد فى إعادة الإعمار .. مش بترمى قرشين فى جيوب أرباب السبوبة لزوم المزايدة الإعلامية وبس
⭕ إن وقت إشتداد الأزمة ، مابيبقاش فيه تحركات فعلية على الأرض غير لمصر .. ومابيبقاش فيه أى مصداقية غير لمصر وللتحركات المصرية .. وبنشوف ونسمع بيانات دولية .. تثمّن الدور المصرى .. وتحترم المبادرات المصرية المقدمة .. وتدعم تنفيذها … لأن دى مصر .. و ده دورها .. و ده وزنها وثقلها السياسى الإقليمى والدولى
و …. ومازال للحديث بقية …
حفظ الله مصر برئيسها وجيشها وشعبها 🙏