19 May 2021
إعادة الإعمار و الهجمة المرتدة .. !!
————————————
عارف ان البعض زعلان جداً من موضوع الــ 500 مليون دولار اللى الرئيس قال ان مصر هتدفعهم لإعادة اعمار غزة ..
عارف ان فيه ناس شايفين إنهم مايستحقوش اى دعم .. واللى يقولك دول بيكرهونا .. واللى يقولك شوف بيشتمونا ازاى … واللى يقولك دوول قتلوا ولادنا … وبــ يشمتوا فينا و فى شهدائنا …
مش هاقولك انك غلطان … ولا هاقولك مامعاكش حق … بالعكس .. انت زعلان على بلدك .. وغضبان علشانها … ومش عايز تمد ايدك لأى حد غلط فى مصر والمصريين حتى ولو بكلمة .. فما بالك لو كان دم …. لكن لازم تبقى فاهم ان الدول لا تدار بالعاطفة … وعلشان تحكم على شيئ يبقى لازم تنحى العاطفة جانباً… و تشوف الصورة الكلية من غير ماتبص تحت رجليك ..
#اولا … لازم تفرق بين فلسطين وبين حركة ولامؤاخذة “سماح” .. اللى هى الذراع ولامؤاخذة برضوا العسكرى للاخوان فى القطاع .. واللى من ساعة ما تم انشائها فى أواخر الثمانينات .. والقضية تمضى من سيئ لأسوء .. والفرقة بين الفصائل الفلسطينية تتسع والخلاف يزداد ..
وبالمناسبة .. ده دورهم الحقيقى على فكرة .. واللى تم إنشائهم من أجله !
صحيح فيه ناس هناك بتهاجمنا وبــ تشمت فينا و بــ تشمت فى شهدائنا … طب ما إحنا عندنا منهم مصريين .. و من نفس العينة … ونفس العقيدة والانتماء والايديولوجيا الفكرية .. وبيعملوا كدة واكثر من كدة … والفرق بينهم وبين الناحية الثانية هو فقط فى البطاقة المصرى … لكن الاتنين من نفس الزر.يبة الأيديولوجية ….
#ثانيا .. المساعدات الممنوحة من مصر لإعادة اعمار غزة دى مساعدات مشروطة ان الشركات المصرية هى اللى هــ تنفذ عمليات إعادة الأعمار دى … يعنى الفلوس هتخرج من جيب مصر اليمين علشان تدخل جيب مصر الشمال .. يعنى شركات هتشتغل وإيد عاملة هتشتغل ومرتبات هتندفع ومواد خام هــ يتم إستخدامها .. ألخ ألخ ألخ
#ثالثا … معنى كدة ان مافيش فلوس سايلة هتدخل جيب حركة ولامؤاخذة “سماح” .. لكن مصر هى اللى هــ تدير الملف ده بالكامل … والفلوس هتروح لمكانها الصحيح … مش لحسابات البنوك فى أوروبا وغيرها.
#رابعا … انت كدة قطعت الخط على الشركات الاسر$ئيلية انها هى اللى تقوم بعملية إعادة الأعمار … ماهى أصلها سبوبة مشتركة بين الطرفين .. وأهو كله مقاومة ولامؤاخذة نضال !😎
#خامسا .. كون انك تمسك الملف ده .. و بما لك من مصداقية عند كثير من الدول المانحة .. فجزء كبير من المساعدات الدولية والعربية الموجهة للقطاع وإعادة الأعمار ، هيدخل عن طريقك … يعنى انت كدة بتقفل على السبوبجية نور ومية …
#سادسا …. انت كدة هيبقى ليك تواجد بالقطاع المدنى المصرى داخل غزة … ناهيك عن التواجد الاستخباراتى .. وهتبقى موجود للحيلولة دون حدوث اشتباكات او اختراقات أمنية مع الجانب الاسر$ئيلى … وهــ يفكر مليون مرة قبل مايرتكب اى حماقة او يضرب طلقة مسدس فى مكان مرفوع فيه علم مصر
#سابعا … فيه ناس داخل القطاع مالهمش اى انتمائات ايديولوجية .. لكن مايعرفوش عنك غير صورة سيئة مشوهة .. الصورة اللى بــ يبثها وينشرها قطيع الاخوان فى عقولهم … الصورة دى اكيد هتتغير لما يشوفوك قدامهم بــ تبنى وتعمر وتساعد … صورة هــ يأكدها الناس اللى بتحبك بجد وعارفين قيمة مصر بجد مش اللى سارحين طول الوقت بديباجات اخوانية سواء على السوشيال ميديا او فى الإعلام المغرض
يعنى ببساطة خالص … شوف مثلا موقف السودانيين منك كان اييه ايام البشير وقطيعه … وشوف السودانيين كانوا بيكرهوك ازاى … وشوف النهاردة السودانيين بيقولوا عليك اييه …
لاحظ ان المعارك تكسب وتحسم فى القلوب اولا …
و #ثامنا وأخيرا … انت كدة هتبقى فى قلب الاراضى الفلسطينية … يعنى جوة دولة الكيان … وبين مفاصلها … وذلك أمر لو تعلمون عظيم 🙂 .. و زى ما الرئيس قال قبل كدة فى ملف الغاز “إحنا جيبنا جون يامصريين” … فــ كمان فى ملف إعادة الإعمار إحنا كدة جيبنا كمان جون .. وقلبنا الترابيزة .. وردينا على الهجمة بهجمة مرتدة … وكمان ممتدة لفترة طويلة 😉🙂
مصر مش بتتحرك ولا بــ تخطى خطوة غير لما تكون خطوة مدروسة ومعمول حسابها … يعنى مصر بتأمن دفاعاتها كويس … وبتشوف مواطن الضعف والقوة .. علشان وقت اللزوم تقدر تقود الهجمة .. أو تعمل الهجمة المرتدة … و خلى بالك … إن الصراع مع دولة الكيان مش خفى .. والجيم مفتوح رايح جاى .. على الأقل على مستوى الدوائر الأمنية والسياسية … وأجمل شيئ إنك تنقل قطع الشطرنج بتاعتك .. وتجبر اللى قدامك إنه يتحرك لمصلحتك .. وهو عارف كدة كويس .. لكن مش قادر يعمل حاجة !
حفظ الله مصر برئيسها وجيشها وشعبها 🙏