04 Jun 2021
السد والمستجدات … !!
————————
امبارح صدرت تصريحات من وزير الري الإثيوبي بيعلن فيها عدم قدرة إثيوبيا تخزين الكمية المستهدفة من الملء الثاني اللى هى 13.5 مليار متر مكعب نتيجة التأخر في تعلية الممر الأوسط والوصول للمستوى المستهدف للتخزين
و على حد قوله إن الملء الثاني هتكون أقصى سعة له هي 4 مليار متر مكعب ….. ده كلامه .. لكن فى الغالب مش هيوصلوا حتى للرقم ده ..
ده اللى أكدنا عليه مقال سابق وكمان من خلال ردودنا على كثير من التعليقات فى أكثر من مقال … لما قولنا إن فيه مصاعب تقنية بتواجه اثيوبيا فى بناء السد ، و إن الوقت اصلا مش هيسمح لهم بإتمام الملء الثانى … و ان كل اللى الجانب الإثيوبي بيعمله بتصريحاته العجيبة اللى بتصدر كل ربع دقيقة .. هو أنه بيخاطب الداخل الإثيوبي لجمع شتات المتناحرين فى محاولة لخلق عدو وهمى يتوحدوا فى مواجهته … وكمان لاستفزاز مصر وجرها لعمل عسكرى يصب اول ما يصب فى مصلحة المجنون “ال.س.ف.ا.ح” بتاع جايزة موبل اللى بيقتل شعبه.
هتقوللى بس مصر قالت إنها مش هتسمح بالملء الثانى … هاقولك إن تصريحات مصر ما قالتش كدة خالص .. ومافيش تصريح واحد لمصر بالمعنى ده …. لكن تصريحات مصر اللى صدرت عن رأس القيادة السياسية وهو الرئيس #عبدالفتاح_السيسى كانت تصريحات محددة وصريحة:
🔹️ مافيش حد هيقدر ينقص كوباية مية من حصة مصر .. واللى عايز يجرب يجرب
🔹️ بلاش تقوموا (إثيوبيا) بأى عمل من شأنه الأضرار بمصر .. لأن الخيارات كلها مفتوحة …
🔹️ المصريين من حقهم يقلقوا فى ملف المياه … لكن انا باقول لكم ان الموضوع هياخد وقت .. واحنا لسة ملتزمين بالمسار التفاوضى..
ناهيك عن تصريحات الوزير سامح شكرى ووزير الرى المصرى اللى قالوا فيما معناه إن مصر دولة قادرة.. لكن اى تحرك مصرى هيبقى مرتبط بوقوع ضرر على مصر … يعنى اللعبة امام العالم كله هى لعبة سياسية .. وهتبقى مرتبطة بوقع الضرر … و الرهان دلوقتى على غباء الطرف الآخر 🙂
السيد عمرو موسى وزير خارجية مصر الأسبق قال فى حوار من كام يوم مع الاعلامى عمرو أديب إن مصر مازال لديها العديد من الأوراق … ولما سأله عمرو أديب عن الناس اللى بتدفع طول الوقت فى مسار الحرب .. ابتسم عمرو موسى وقال له انه فيه مثل عربى بيقول #أخر_العلاج_الكى 😉 .. يعنى الحرب دى هتكون أخر حاجة …
هتقوللى طب ماهو حتى لو الملء الثانى عمل 3 مليار .. يبقى كدة اللى هيبقى متخزن خلف السد 7 مليار .. و ده معناه إن فرصة هدم السد هتبقى راحت خلاص 🤔….
والرد ببساطة هو إن اللى يحدد ده هم الخبراء فقط … مش إنت ولا إحنا خااااالص .. ناهيك عن انه ماحدش يعرف لو حصل تحرك عسكرى هيبقى شكله اييه … و هل سيتم قصف السد بالطيران .. وإلا رميه بقنابل اختراقية .. وإلا ضربة فنية تدمر فاعليته وقدرته على التخزين … وإلا تحرك شامل للسيطرة على المنطقة اللى فيها السد …. وإلا وإلا وإلا … ماهو كل الخيارات مفتوحة بقى 🙂
وماتنساش إن اكثر ناس بتدفع فى اتجاه الحرب ومستعجلين عليها هم الاخوان و كل رموز ما يسمى باللامؤخذة معارضة فى الداخل … وكلهم مدعومين بالابواق الاعلامية المعادية .. وكلهم ماشيين فى سكة مزايدات رخيصة …. وطالما هم متجننين او كدة .. وعايزين تحرك سريع قوى كدة … يبقى ده اكيد مش فى مصلحة مصر … على الاقل فى الوقت الحالى ….
إحنا زيكم بالضبط … نفسنا إثيوبيا تتهور أكثر .. وتعلّى الريتم بتاعها اكثر وأكثر … ونفسنا فى تحرك عسكرى يخلصنا من الكابوس ده … ويشفى غليلنا من الاستفزازات اللى تمت على مدار السنين اللى فاتت ولحد النهاردة … سواء من الخارج او من تجار السياسة والمزايدين فى الداخل … وخصوصا من اللى كانوا مشاركين بغباء منقكع النظير فى إفساد هذا الملف .. وجايين النهاردة يعملوا فيها قادة شعبيين …
لكن خليك فاكر إن ده جيم شطرنج كبير و فيه اطراف كتيرة .. وإن المحك الحقيقى هو ما يتم خلف الكواليس واللى مايعرفش عنه شيء غير اللاعبين الحقيقين اللى خلف الستار … و إفتكر إن الرئيس السيسى قال إن النتائج المترتبة على أى تحرك هو إنه هيبقى فيه توتر فى المنطقة لا يتخيله أحد … و دى كانت رسالة للكل … والراجل ده عودنا إن مش بيطلق تصريحات كدة وخلاص …
و للمرة المليون … الدولة هى الوحيدة صاحبة الحق فى اختيار التوقيت المناسب للتحرك .. وكمان شكل التحرك ده يبقى ازاى … و احنا مع قرار الدولة .. اياً كان هذا القرار .. فى توقيت وشكل هذا التحرك ….
وماتنساش انه ممكن إثيوبيا فى اللحظة الاخيرة تتراجع وتوافق على توقيع الاتفاق القانون الملزم اللى انسحبوا قبل التوقيع عليه فى اميريكا بيوم واحد …. وان كنا لا نتوقع ابدا إن تتراجع إثيوبيا عن حالة التعنت اللى هى فيها دى
بل ولا نخفيكم سرا اننا لا نتمنى أبدا هذا التراجع … 😉🙂
حفظ الله مصر برئيسها وجيشها وشعبها 🙏