05 Jun 2021
إنت كبير … إعرف قيمتك !!!
——————————
لما باشوف الأليات والمعدات المصرية اللى دخلت غزة فى مهمة إعادة الإعمار … وبرغم حالة الفرحة والتقدير والترحيب من كثير من الغزاوية .. وفى المقابل بنشوف حالة السخرية وحرب الإستهزاء اللى بتشنها اللجان الأليكرونية للإخوان ، وبيأيدها بعض المصريين من عشاق الدونية والمنبطحين .. للتقليل من اللى بتعمله الدولة المصرية .. ومن حجم الإنجاز اللى حققته الإداة المصرية .. بــ ييجى فى بالنا على طول الإنجاز المصرى فى حادثة جنوح السفينة إيفرجيفن فى قناة السويس
الحاددث اللى حاول المغرضين التشكيك فى قدرة المصريين على التعامل معاه . ولما حصل الإنجاز . بدأ المنبطحين وعشاق الدونية حملات التشكيك فى الإنجاز نفسه وقالولك أصل القاطرة الهولندية هى اللى عملت ده ..
سبب الربط بين الحدثين هو ما نشره موقع “The Load Star” لما قال إن رئيس شركة “فليكسبورت” .. نشر كتاب للأطفال بسعر 25 دولار ، في محاولة لجمع الأموال لدعم الإغاثة من فايروس كورونا في الهند .. وكان الكتاب زى ماهو موضح كدة فى صورة المقال ، بعنوان (السفينة الكبيرة و الحفار الصغير )
– قصة من وحي قناة السويس …. وبيقول رئيس الشركة إن الكتاب بــ يعلم الأطفال “قوة فعل الشيء الصحيح ، حتى عندما يبدو أن نصف العالم يسخر منك” …
دى الصورة اللى بينظر بيها العالم لمصر .. وبيشوفك بيها … أيوة .. هم شايفين إن مصر بتعمل المعجزات … و علشان كدة ماتسمحش لحد إنه يقلل من قيمتك ولا من مجهودك … ومهما حاول عشاق الدونية يقللوا من حجم إنجازاتك سواء بالسخرية والإستهزاء ، أو بالتجاهل وتقليل الشأن .. فيكفيك إنك عارف قيمتك ومؤمن باللى إنت بتعمله … وخليك فاكر ، إن المصرى اللى اسقط الساتر الترابى فى سنة 73 لأعظم عائق مائى عسكرى فى التاريخ بخرطوم مياه .. هو نفسه اللى أنقذ إقتصاد العالم وأنقذ قناة السويس من الإغلاق التام بحفار صغير.
كذلك وجودك فى غزة اصبح امر واقع .. وبعد ماكانت المؤامرة هو إنهاء القضية الفلسطينيى بإيجاد وطن بديل للفلسطينيين فى سيناء وتصفية قطاع غزة على حساب الأراضى المصرية .. فــ النهاردة إنت بتقوم بعملية إعادة الإعمار وبتبنى مدينة مصر السكنية فى قلب غزة.
إفخر بنفسك وإعرف قيمتك وقيمة بلدك … وماتسمحش لعشاق الدونية إنهم يضحكوا عليك
حفظ الله مصر برئيسها وجيشها وشعبها 🙏