ثورة ماحدش نزل

11 Jun 2021

ثورة ماحدش نزل … !

———————

العالم العبقرى ألبرت أينشتين قال جملة فى منتهى العبقرية فيما معناها إنه قمة الغباء إن أى شخص يعمل نفس الشيئ بنفس الأسلوب وبنفس الخطوات ويستخدم نفس الادوات .. ويتوقع إنه يحصل على نتائج مختلفة !

و ده بالضبط اللى بيعمله الفصيل الإرهـ.ابى واتباعهم من شمّامين الكلة والموتورين والمركوبين من الفكر الإخوانى بكل ابواقهم وادواتهم الإعلامية المختلفة … من اول مرسى راجع القصر يوم السبت العصر .. ومرورا بكل التواريخ اللى حددوها لثورات هتشيل مش هــ تخلّى .. و وصولا لثورة “الــ #ماحدش_نزل” واللى أطلقوا عليها ثورة النيل .. والحقيقة مش فاهم هو النيل لييه عايز ثورة !!! 😎

طبعا فيه ناس من مؤيدين الدولة كل مرة بتتخض من الموضوع ده وبــ تقع فى حيص بيص ، أول ما يتم الإعلان عن الصاورة المزعومة … ومش محتاجين نقول إن ده هو المطلوب طبعا … وفيه ناس تانية بقت خلاص فاهمة اللى فيها .. وعارفين إن الموضوع ده مجرد تخلف ولعب عيال ومحاولة مستميتة لإعادة إستنساخ الماضى .

واللذيذ أكثر إنه فيه ناس صحيح مش مؤيدين للتوجه الحالى للدولة .. وبرضوا إحنا مش فاهمين هم مش مؤيدين لييه … لكن هم احرار فى افكارهم ووجهة نظرهم … لكنهم فى نفس الوقت مش مؤيدين خالص لأى نوع من المظاهرات .. وعندهم إستعداد ينزلوا ياكلوا العيال المرضى بمرض التثوّر اللاإرادى دوول لو شافوا حد منهم فى الشارع … لأنهم مش عايزين أى تكرار للماضى تانى .. أو لأنهم من جواهم حاسين إنه فيه مكتسبات حقيقية .. بس الواحد فيهم لازم يعترض ويرتدى ثوب المناضل .. علشان بس يبقى عميق و .. كدزة …  فما بالك بقى الوضع بالنسبة للمؤيدين هــ يكون عامل إزاى .. ورافضين لفكرة التظاهر دى قد إييه !!

طب السؤال اللى بيطرح نفسه هنا … طالما الموضوع مصيره الفشل .. يبقى لييه بيعملوه كل مرة .. وعايزين يوصلوا لإييه !؟

والحقيقة إن الإجابة بسيطة خالص وتتلخص فى 3 نقط ….

◀️ #أولاً .. الموتورين أو المركوبين إخوانيا وكولّجياً ..

و دول بقى عندهم إحساس مستمر بالتثّور اللاإرادى .. و راشقين فى أى مصلحة تقول لهم .. هييييييه يالا بينا نلعب صاورة … و دوول تلاقيهم حلوين أوى على مواقع التواصل .. بس كلهم قاعدين مستنيين جحافل المخلوقات المريخية اللى هــ تنزل الأول ويملأوا الشوارع علشان هم تجيلهم الثقة و ينزلوا … أو تلاقيهم طول الوقت عمّالين يوأوأوا ويقولوا إفتحولنا الميادين علشان نعمل صاورة _الميادين اللى هى مفتوحة اساساً_ …. و دول بقى بيفكرونى بالناس بتوع “إفتحولنا المعابر يامصاروة باش نحرر القدس” 😅

◀️ #ثانياً .. الداعين للثورة ..

و دول لازم يعملوا كدة … ده دورهم .. و ده اكل عيشهم .. وخصوصا لما السبوبة تقل والتمويل يتأخر … لأنهم لو ماعملوش كدة السبوبة هــ تتقطع ، ومش هــ يلاقوا ياكلوا حرفياً … و ده غير إنهم هــ يتنسوا .. وصفحتهم فى الملف هــ تتقلب وتترمى فى اقرب مزبلة … ناهيك عن إنهم كمان وحشين فى بعض وبيغيروا و بيضربوا فى بعض .. وكل واحد فيهم همه الحصول على أكبر نصيب من القتة المحلولة بتاعة الفلوس .. و لو أى واحد فيهم فكر يكسل شوية .. ده معناه إن نصيبه من اليغمة هيروح لزميله … و ده مش ممكن حد فيهم يسمح بيه .. وبالتالى لازم كل وقت والتانى يعملوا فيها اى نص فى رغيف علشان بس يثبتوا للأسياد إننا لسة شغالين أهو .

◀️ #ثالثاً .. الممولين …

اللى هم بالعربى كدة اصحاب الشغل .. أو اللى بيشتغلوا فعلياً عند صاحب الشغل وداخلين مشاركين بفلوسهم … و دوول بقى ماعندهمش أى مانع يمولوا ويأيدوا أى مصلحة تعمل أى دوشة وخلاص للدولة المصرية .. يعنى حاجة كدة على سبيل العكننة .. وبالذات على الشعب المصرى .. و محاولة لتوصيل رسالة وإحساس مخالف للواقع .. و هو إن الوضع لسة زى ماهو ومش مستقر .. ولسة شبح الثورة موجود .. وطالما قناعتهم بتقول إننا مش قادرين فعليا نحرك الأوضاع على الأرض .. يبقى مايمنعش إننا نعكنن على المصريين والسلام !!

ولو حضراتكم تلاحظوا لو انتم متابعين الاحداث عن كثب.. هتلاقو إن الحشد الإلكتروني والزخم المصاحب لكل حدث ، بيقل فى كل مرة عن المرة اللى قبلها … يعنى ثورة النيل المزعومة المرة دى ، ماكانش لها أى وجود حتى على السوشيال ميديا … مجرد دعاوى متفرقة كدة من غير قوام متكامل أو خطة محددة …. و حتى اليوم نفسه غلطوا فيه فى التاريخ 😁 .. يعنى الحقيقة بجد والله قمة البؤس 🙂 .. و ده لا يعنى الا شيئ واحد فقط …

وهو تراجع مصادر الدعم لأدنى مستوياتها .. وانخفاض التمويل بشكل ملحوظ واللى أدى لعدم وجود لجان اليكترونية كافية تقدر تعمل على الاقل حشد إلكتروني بشكل كافى … وناهيك طبعا عن إن كل الوجوه الحالية اللى ممكن نطلق عليهم اسم رموز ، أصبحت مجرد كروت محروقة .. مالهاش أى مصداقية ولا لها تأثير فعلى على الأرض .. مع عدم وجود حجة مقنعة لأى حد .. حتى للقطيع من أفراد الجماعة ومراكيبهم ، اللى يخليهم ينزلوا الشارع … يعنى فشل مسوجر من كل الإتجاهات …

ربنا يوكسكم كمان وكمان 🙂 … وتفضلوا كدة ماشيين من فشل ، لفشل ، لخسارة ، لضياع وتشتت فى بلاد الله لخلق الله 😉🙂

وحفظ الله مصر برئيسها وجيشها وشعبها 🙏

لمتابعة تعليقاتكم