30 Jun 2021
ثورة 30 يونيو – بداية الجمهورية الجديدة .. !!
———————————————-
🟢 لو عايز تقول إن 30 يونيو كانت الحدث قدرت مصر فيه بجيشها وشعبها بعد توفيق ربنا .. إنها تتجاوز مصير اسود .. ومستقبل من الضياع التام على إيدين جماعة مجرمة .. وكان هــ يترتب عليه تقسيم مصر وتشريد المصريين …. قوول !
🟢 لو عايز تقول إن 30 يونيو كانت القرار الشعبى وصرخة الغضب اللى إنطلقت عالية مدوية من أجل إسترجاع مصر وإسترجاع الثوابت الوطنية من قبضة الفاشية الدينية اللى كانت عايزة تحكم مصر 500 سنة …. قوول
🟢 لو عايز تقول إن 30 يونيو كانت الحدث المفصلى والهجمة المرتدة ، اللى حمت منطقة الشرق الأوسط بالكامل ، و أسقطت مؤامرة متكاملة الأركان … مؤامرة كان هدفها إسقاط بل وتدمير المنطقة وفى القلب منها مصر …. قوول !
🟢 لو عايز تقول إن 30 يونيو كانت الحدث الأبرز اللى ترتب عليه حماية مش منطقة الشرق الأوسط فقط من الإنهيار والتفكك .. ولكن حماية ما خلفها سواء كانت الأمة الروسية .. أو حماية الشرق الأقصى بالكامل ومنعه من السقوط فى هوة الفوضى …. قوول !
🟢 لو عايز تقول إن 30 يونيو كانت الحدث اللى حطم طموحات وأحلام قوى إقليمية من الإضطلاع بشرف التحدث بإسم منطقة الشرق الأوسط بالكامل .. بل والإستيلاء على بعض أراضيها وثرواتها والسيطرة على مقدراتها بإسم الدين …. قول ! 😎
🟢 لو عايز تقول إن 30 يونيو كانت الحدث اللى منح المصريين إكسير الحياة فيما تلاه من سنوات للعمل بكل قوة من أجل إستعادة مجد مصر وتأثيرها فى محيطها الإقليمى والدولى …. قوول !
🟢 لو عايز تقول إن 30 يونيو كانت الحدث اللى وضع المصريين أمام التحدى الصعب لإعادة بناء دولتهم والخروج من حالة العوز الإقتصادى والعسكرى والمؤسسى و الفكرى ، واللى سقطت فيه الدولة المصرية في سنوات ما قبل 2011 ، ثم الوصول لأدنى مستويات الضعف والعوز من بعد 25 يناير 2011 وحتى أخر ساعات حكم الجماعة الإرهابية …. قوول
🟢 لو عايز تقول إن 30 يونيو كانت المنعطف التاريخى اللى إنتقلت فيه مصر من مرحلة “إحنا فقراء أوى” ، إلى مرحلة “متشغلوش بالكوا ، الفلوس موجودة .. بس المهم مصر تتبوء المكانة اللى المصريين يستحقوها وتليق بيهم” …. قوول !
🟢 لو عايز تقول إن 30 يونيو كانت الحدث الكاشف فيما بعده من سنوات لكل الأكاذيب والديباجات اليسارية والإخوانية اللى إتربى عليها اجيال من المصريين .. ووصولا لأحداث جائحة كورونا وأزمة العالقين .. لدرجة إن مقولة “نحن نحرك أساطيلنا من أجلك” اللى كانوا بيضحكوا علينا بيها بإنها مكتوبة على باسبورات بعض الدول الغربية … لم تنطبق على أى تحركات ورد فعل أى دولة فى العالم كله غير الدولة المصرية …. قوول !
🟢 لو عايز تقول إن 30 يونيو كانت هى الشرارة اللى أفرزت رئيس حقيقى بحجم مصر … رئيس وقفت خلفه الملايين .. رئيس أعاد لمصر والمصريين مكانتهم العالمية بين الأمم .. وأصبح العالم ينظر للتجربة المصرية بإعتبارها التجربة الملهمة بين كل تجارب بناء الدول فى العصر الحديث منذ القرن الثامن عشر وحتى الأن … قوول !
🟢 لو عايز تقول إن 30 يونيو كانت الحدث اللى ترتب عليه قرارات إصلاح جذرية ماكانش ممكن تحصل أو تتحقق غير بتوحد الشعب بالكامل مع المؤسسة العسكرية وكل مؤسسات الدولة ، خلف رئيس وطنى لا يهمه إلا مصلحة مصر والمصريين …. قوول !
🟢 لو عايز تقول إن 30 يونيو وكل النتائج اللى ترتبت عليها داخلياً ماكانش ممكن تتحقق غير بكم ضخم من الدماء الزكية اللى سالت لتروى تراب مصر الطاهر .. وعدد كبير من الشهداء اللى ضحوا بأرواحهم علشان إحنا نعيش …. قوول !
🟢 لو عايز تقول إن 30 يونيو كانت الحدث اللى وضع مصر بجيشها وشعبها فى مواجهة ظاهرة واضحة مع منتخب العالم للإرهاب ، ومواجة مستترة لانهائية مع كل المشغلين والممولين والداعمين للإرهاب ولجماعة الشر وللتنظيمات السرية والأجهزة الأمنية اللى هدفهم إسقاط مصر وإدخالها فى دائرة الفوضى وحالة عدم الإستقرار اللى إتبنت عليها كل مخططاتهم الشريرة …. قوول
🟢 لو عايز تقول إن 30 يونيو كانت الحدث اللى إستعاد فيه المصريين وفيما بعده من أحداث على مدار 8 سنوات ، روحهم المعنوية وقوتهم الناعمة ومشاعر الإنتماء لبلدهم .. وقدرتهم على الشعور والإحساس بمعنى الجملة العظيمة .. جملة “تحيا مصر” …. قووول !
🟢 لو عايز تقول إن 30 يونيو كانت الحدث اللى قررت فيه مصر بحيشها وشعبها إنها تقف منفردة أمام العالم كله برغم كل الصعوبات ومهما كان حجم التحديات …. قوول ! 🙂💪
🟢 لو عايز تقول وتتكلم وتسهب فى ذكر إنجازات فى كل الملفات سواء كان على المستوى الإقتصادى أو السياسى أو العسكرى أو الإجتماعى أو كم كبير من الملفات الداخلية اللى ترتبت على ثورة 30 يونيو المجيدة …. قوول !
🟢 لو عايز تقول قول … قول بقوة … قول بصخب … قول و علّى صوتك … وعلّى صوت فرحتك وفخرك ببلدك لتطاول عنان السماء …. وكون على ثقة إنك فى اللى الحظة اللى إنت بتفرح فيها بقوة وبصخب … فــ هناك فى الظل ، قطيع من الزومبى يتألمون 😉🙂
حفظ الله مصر برئيسها وجيشها وشعبها 🙏
وكل عام ومصر والمصريين بخير .. 💚💚