16 Jul 2021
مصر القوية .. وسد الهري الحبشى .. !!
—————————————-
إمبارح فى المؤتمر الجماهيرى بإستاد القاهرة كان موعدنا مع تدشين المشروع الأكبر والضخم بالنسبة للجمهورية الجديدة وهو مشروع تطوير الريف المصرى .. واللى لا يقل أبدا عن مشروع حفر قناة السويس فى القرن الــ 19 وملحمة بناء السد العالى فى القرن العشرين زى ما شرح دولة رئيس الوزراء المهندس مصطفى مدبولى فى كلمته وأثناء عرضه لتفاصيل المشروع !
وبمناسبة الحدث ده ، فــ الرئيس السيسى قال كلمة أمام عشرات الألاف من الحضور .. والملايين من المتابعين على الشاشة .. واللى بنعتبره خطاب تاريخى .. بل هو من أهم الخطابات اللى قالها الرئيس السيسى منذ توليه الرئاسة سواء من حيث الكلمات أو الرسائل الموجهة .. أو حتى من حيث الجو العام اللى إتقالت فيه الكلمة لأن ده فى حد ذاته كان رسالة تحمل ألف معنى ..
الرئيس أعلن عن اطلاق اكبر مشروع في تاريخ مصر ، وهو تطوير الريف المصري بميزانية تفوق الــ 700 مليار جنية ، وتنفيذ المرحلة الأولى من المشروع في مدة 3 سنوات وإجمالى المشروع هــ ينتهى فى 10 سنوات بإذن الله
كمان إتكلم الرئيس عن مصطلح #الجمهورية_الجديدة .. وقال إن الجمهورية الجديدة هى ترسخ لمفاهيم العدالة والكرامة الإنسانية … وإن اللى بيحصل دلوقتى فى مصر يعتبر قرار بإستعادة مصر شعباً ودولةً من البغي والمتاجرة بالوطن والدين … وإن الجمهورية الجديدة تمتلك القدرات السياسية والعسكرية والاقتصادية والاجتماعية الشاملة ، وتعلي مفهوم المواطنة … و ده يمكن اللى كنا إتكلمنا عليه من فترة فى أحد مقالاتنا عن سعى الدولى المصرية لإمتلاك القدرة فى كل الملفات .. وده اللى بيخلينا نشعر إننا بــ نتحرك حركة مدروسة ومتناغمة .. وإننا بــ نتعامل مع كل قضايانا بتخطيط عميق !
وقال إن مصر القومية المدنية الحديثة هي اللي تليق بالمصريين .. وإعتبر إن يوم 15 يوليو 2021 هو تاريخ إعلان الجمهورية الجديدة ، الجمهورية المصرية .. وده طبعا بالتزامن مع إطلاق المشروع القومى لتطوير الريف .. واللى هــ يغير وجه مصر بالكامل بإذن الله.
اما بالنسبة للنقطة الأهم .. واللى بــ تيجى فى بؤرة إهتمام كل المصريين … وهى قضية السد …. فالرئيس قال كلام واضح وصريح وقوى ، لا يحتمل التأويل … سواء من خلال الكلمة الرسمية .. أو الكلمة المرتجلة اللى قالها بالعامية المصرية بعد نهاية الكلمة الرسمية ..
قال إييه بقاااااااا ….
قال إن الأمن القومي المصري خط أحمر لا يمكن تجاوزه، شاء من شاء وأبى من أبى .. وإننا لدينا خيارات متعدده فى الحفاظ على امننا القومى .. وبــ يتم تقييم الخيارات دى طبقا لمقتضيات الموقف والظروف …. والأهم من كدة .. و فى رسالة واضحة للعالم .. وكمان لكل المصريين وبالذات الفصيل بتاع إحنا فرطنا فى مياه النيل …. وهو إن ممارسة الحكمة والجنوح للسلم لايعني أبدا التهاون في حق الوطن … يعنى إهدوا كدة شوية وإرحمونا من المزايدات !
كمان قال إن مصر أصبحت تمتلك من الأدوات السياسية والقوة العسكرية والاقتصادية ما يعزز من إنفاذ إرادتنا وحماية مقدراتنا … و ده رداً على شلة الفتايين .. بتوع هو بيعمل كل ده لييه … و ده لازمته إييه … و دوكها أنا إستفدت منه بإييه … و هو بيشترى السلاح ده كله لمين .. والمشروع الفلانى هدفه إييه … والمشروع العلانى هــ يعود عليا منه إييه … ألخ ألخ ألخ من كلام خبراء الفيسبؤس ومواقع التناحر الإجتماعى ..
الرسالة اللى كانت واضحة وصريحة سواء للداخل أو للخارج .. هى جملته المقتضبة ,, “قبل ماتحصل حاجة لمصر يبقى لازم انا والجيش نروح الأول عشان يحصل لها حاجة” … وإنه فيه حاجات ينفع تتقال ، وحاجات ماينفعش تتقال … يعنى يا خبراء يابتوع يلا بينا كلنا نهجم هجمة ونرجع .. إهدوا شوية وإتبطوا لأن إستخدام القوة لسة معاده ماجاش .. وإن وقت الجد .. وإذا تطلب الأمر … الجيش مش هــ يسكت لو كان فيه أى تهديد لمصر .. وبالذات لو كان تهديد وجودى ..
و فى رسالة مطمئنة للمصريين .. قال الجملة الخلاصة اللى نشرناها إمبارح على صفحتنا … إنه #لا_يليق_بينا_أن_نقلق” …. يااااه .. للدرجة دى ياريس واثق من بلدنا و واثق من موقفنا فى قضية السد دى …. أيوة … وإحنا كمان واتثقين ياريس .. واثقين فى ربنا أولا .. ثم واثقين فيك إنك ماضيعتناش فى الأول علشان تضيعنا فى الأخر
و فى النهاية … قال للمصريين عيشو حياتكم ومتقلقوش من حاجة .. وختم كلامه بجملة من كلمتين .. تردد جدا قبل مايقولهم … لولا ضغط الناس فى المدرجات وإلحاحهم عليه لما قال:
هقولكم كلمة بتقولوها كتير … “بلاش هري” 🙂🙂
الكلمتين دول بقى سحلوا وراهم وكلات الأنباء العالمية وهم بيحاولوا يفهموا معنى الكلمتين اللى تردد السيسى مرتين فى نطقهم عند حديثه عن سد النهضة … زى ما إتنشر على موقع روسيا اليوم مثلا 🙃😅
الرسالة الأهم من وجهة نظرنا للعالم كله … واللى هــ نختم بيها مقالنا النهاردة .. أتت من الجو العام اللى إتقال فيه الخطاب .. رسالة من خلال شريحة من مختلف فئات الشعب المصرى … رسالة بتقول إن المزاج العام مع الحل العسكرى لو تطلب الأمر ذلك دفاعا عن مقدراتنا وحقوقنا التاريخية وحقنا فى الحياة …
و ده شيئ مهم جداً لكل المراقبين والمهتمين بالشأن المصرى …
طبعا ناس حتقولك …. الملو التانى بدأ …. لو ملوا مش حنعرف نهده عشان فيه تسونامى وِحِش حياكلنا …. اصل فيه في البحيرة دلوقتى مش عارف كام مليار …. و انا رأيي المفروض يعملوا كده …. و الخطط العسكرية كلها معروفه.
احنا لا حنقوله احنا ردينا عليك في مقال من 6 ايام بنفس محتوى خطاب الرئيس و لا حاجة 😁😁… إحنا مش حنقولك غير كلمة واحدة … نفس الكلمة اللى قالها الرئيس
عيش حياتك … وبلاش هري
حفظ الله مصر برئيسها وجيشها وشعبها 🙏
والمجد للثابتين … 💪