21 Jul 2021
الملء الثانى .. !!
—————
من إمبارح ، وزى ماهو واضح فى الصور كدة .. بدأ تدفق مياه النيل من فوق الجزء الأوسط لسد الهري الحبشى …. و إحنا فى المقال ده لا هــ نحلل ولا هــ نطبل ولا هــ ننظّر … لكن إحنا هــ نتكلم فى نقاط محددة ، و هــ نفكركم بشوية حاجات وأحداث وتصريحات إتقالت على مدار الفترة الماضية .. علشان تتأكدوا إن الرئيس لما قال فى مؤتمر حياة كريمة “لا يليق بنا أن نقلق .. وقال جملة “بلاش هرى” … كانت جملة فعلا فى قلب الصميم !
وزير الرى الأثيوبى طلع بــ تصريح بيقول إننا نجحنا فى الملء الثانى وإننا بالوتيرة دى ممكن نملأ السد فى 13 سنة 🙃 … والحقيقة أنا مش عارف هو مستوعب اللى هو بيقوله وإلا لأ ….. يعنى الدولة الكرتونية دى إتمطعت وفردت صدرها … و صويت وعياط وصريخ ضد مصر كل فيمتوا ثانية .. ورئيسها بتاع جايزة موبل شرب بيريل ، ورفضوا يوقعوا إتفاق قانونى ملزم مع مصر لتشغيل و ملئ السد علشان مستكثرين يملئوا فى خلال من 7 إلى 10 سنوات … فــ بسم الله ما شاء الله عليهم كدة … إجتهدوا ، وإشتغلوا على نفسهم ، وطوروا من قدراتهم ، وهــ يقدروا يملئوا السد فى 13 سنة 😁
السد النهاردة مخزن خلفه حوالى 7.5 إلى 8 مليار متر مكعب … يعنى الملئ الثانى ماكملش 3 مليار من الــ 13.5 مليار اللى كانوا مستهدفين … وإجمالى المياه خلف السد على مدار سنتين يادوب حوالى 10% من إجمالى السعة التخزينية المزمع الوصول لها بعد إكتمال إنشاء السد ! … يعنى لسة السد غير قادر على توليد كهرباء
طب إحنا معلش هــ نفكركم بشوية تصريحات كدة هتوضحلك قد إييه الدولة المصرية كانت شايفة الموضوع برؤية شمولية أكثر من أى حد من المزايدين على مصر ..
🔹 المهندس محمد عبد العاطي، وزير الموارد المائية والري المصرى قال فى لقاء إعلامى له من كذا شهر إننا نعرف عن السد اللى اثيوبيا ماتعرفوش
🔹 أسد الخارجية الوزير سامح شكرى كان له تصريح فى لقاء صحفى قلب الدنيا وقتها لأنه قال فيه بمنتهى الهدوء ، إنه فى الغالب الملء الثانى هــ يتم وإن ده هــ يبقى تصرف مرفوض من جانب مصر … لكنه إستطرد وقال إن أى تحرك مصرى قوى مش هــ يكون غير نتيجة لوقوع ضرر حقيقى على دولتى المصب بشكل عام .. وعلى مصر بشكل خاص !
🔹 الرئيس السيسى فى لقاء صحفى من قناة السويس فى التصريح الشهير بتاع “اللى عايز يجرب يجرب” … قال إن المعركة معركة تفاوضية .. وإننا هــ نشوف فى ((((الشهور)))) القادمة تحركات جادة … ولاحظ هنا إنه قال شهور مش أسابيع ..
🔹 الرئيس السيسى كمان اكد فى أكثر من لقاء إن مافيش نقطة مية هــ تنقص من حصة مصر .. وقال فى المؤتمر الجماهيرى الأخير إن قبل ما الأمن القومى المصرى يتهدد ، لازم هو و الجيش يروحوا الأول !
🔹 تصريحات مستمرة وبشكل إستفزاى متعمد عن الملء الثانى تصل لحد التصريحات العدائية من عينة ….. إحنا خلاص هنملئ ومافيش حد هيقدر يوقفنا .. إحنا جامدين قد التنين ومصر تروح تشرب من البحر .. ماحدش هــ يقدر يمنعنا عن التنمية … إحنا عايزين نولد كهرباء وننور بيوت الأحباش ، وإنتم عايزين تمنعونا … إحنا مش معترفين بأى إتفاقيات قديمة تخص حصص المياه لدولتى المصب … إحنا قادرين على حماية السد والوقوف فى وجه أى إعتداء يهدف لتدميره .. إحنا هــ نملأ 18.5 مليار متر مكعب مياه .. ألخ الخ الخ
طب فين الرابط بين كل التصريحات دى ؟؟
شوف ياسيدى …
☑️ #أولا .. أى دولة مؤسسية كبيرة زى مصر ، فيها خبراء على أعلى مستوى فى كل المجالات تقدر مع توافر المعلومات إنها تتوقع وتحدد بنسبة تصل لدرجة الكمال ، إييه اللى ممكن يحصل نتيجة أى إجراء من جهة خارجية … ولما وزير الرى المصرى قال إننا نعرف عن السد اللى أثيوبيا ماتعرفوش .. ماكانش ده نوع من التصريحات الشعبوية أو قنابل الهواء .. لكنه كان حقيقى فعلا
إحنا عندنا خبراء فى الموارد المائية .. و دول يقدروا يحددوا من خلال ظواهر طبيعية وبيئية وجوية ، حجم الفيضان المقبل للنهر قبلها بشهور .. وبالتالى الموضوع بالنسبة لنا مش مفاجئ .. وكمان عندنا خبراء أمنيين وخبراء فى الإنشاءات والسدود .. وبحسابات رقمية .. يقدروا يحسبوا بالضبط من معدلات الإنجاز والبناء .. وبحسابات القدرة والتمويل ، المستوى اللى هــ يقف عنده إرتفاع بناء السد فى المرحلة دى …. يعنى اللى حصل ده من فشل الملء الثانى فى تحقيق المستهدف منه ماكانش مفاجئ لأجهزة الدولة … لكن كان مفاجئ فقط للزياطبن والمزايدين ..
☑️ #ثانيا .. الدولة مش بتتحرك بناء على ضغط الرأى العام .. واللى فى معظم الأحيان .. وفى الظروف اللى فيها بلدنا ومنطقتنا .. ومع إستخدام ادوات حروب الجيل الرابع من سوشيال ميديا وإعلام .. بــ يبقى معظمه مصنوع ومدفوع الأجر .. بهدف اللعب بمشاعر الناس ودفعهم للقلق .. و من ثمّ للضغط على صنّاع القرار بالدفع فى إتجاه تصرف معين حتى ولو كان بحسن نية .. مما قد يؤدى فى معظم الأحيان لضرر بالغ للدولة نفسها ..
و ده اللى كان هــ يحصل لو إستسلمت الدولة لحملة المزايدات فى الداخل والخارج للدفع فى إتجاه التحرك العسكرى فى توقيت غير مناسب لملف القضية .. ولم تختره الدولة المصرية (زى ما حصل فى يونيو 67) … و ده اللى كان واضح جدا فى إن أكثر ناس كانت بتدفع فى إتجاه الحرب هم الأبواق الإخوانية .. و نشطاء الغبرة فى الداخل والخارج .. ومؤيدى المرشح ابو 3% .. وفصيل الكولجية ومتابعين رموزه على السوشيال ميديا من أمثال عبده مشتاق الفيسبوك .. وبعض من يتدثرون بــ رداء الخبراء الهبدجية ! … الكل كان عايز مصر تحارب .. ويال بينا نهجم هجمة ونرجع .. وفين كراماتنا .. وفين جيشنا .. و عاااااااااااااا …..
☑️ #ثالثاً .. الدفع فى إتجاه الحرب كان الشغل الشاغل لإدارة الدولة الكرتونية نفسها ، ورئيس وزرائها بتاع جايزة موبل للشالوم .. و ده اللى أكدنا عليه فى أكثر من مقال سابق عن السد … وكانوا طول الوقت بــ يتعاملوا مع مصر بنفس طريقة “ماتقدرش” فى مسرحية الهمجى للفنان محمد صبحى .. ومحاولات إستفزاز مستمرة بهدف إن الإدارة المصرية تفقد اعصابها وتقوم بقصف السد .. قبل ما تقفّل كل الخروم وتأمن ظهرها سياسيا كويس أوى .. وساعتها ترتدى إدارة الأحباش ثوب الضحية .. ويبدأ الصراخ والعويل والإستنجاد بالعالم فى مواجهة الدولة المصرية المتجبرة … ناهيك عن توحيد فصائل الدولة داخلياً ضد عدو تم خلقه بشكل صناعى .. وتدور رحى الحرب اللى هتبقى الحجة لإيقاف النهضة المزعومة .. النهضة اللى ماكانتش أصلا هــ تتحقق .. لكنها مع أو صاروخ ينضرب حتى لو كان فشنك .. هتبقى مصر هى اللى أوقفت عجلة التقدم والنهضة !!!
والنهاردة النظام الحبشى فى أزمة كبرى امام شعبه .. لأنه اعلن نجاح الملء الأول والثانى .. برغم إنه زى ما ذكرنا فى بداية المقال إن كمية المياه فى حدود 7.5 مليار تم ملأهم فى سنتين … و مع عجز السد عن توليد الكهرباء بالنسبة للمنسوب الحالى .. بدأ الشعب الأثيوبى يتسائل .. طب طالما إحنا نجحنا .. أو مال فين الكهرباء اللى بتخرج من السد !؟ .. وفين البنية التحتية اللى إتعملت علشان الناس تستفيد من الكهرباء المتولدة من السد !؟
شوفتوا إزاى إن التعامل فى الملفات السياسية الضخمة وبالذات ما يخص الأمن القومى للدولة .. مش بيكون خاضع للأهواء ولا للتصورات والأراء الشخصية .. لكن بــ يبقى له حسابات اخرى مش من السهل إن المواطن العادى اللى زينا يقدر يستوعبها او يوصل لأبعادها وأبعاد التحركات فيها !
لكن ممكن تلاقى واحد بيقول .. كل الكلام ده هرى ومالوش لازمة .. لأن أثيوبيا عملت الملئ الثانى .. وحتى لو ملت كوباية مية واحدة .. فــ هم كدة عملوا اللى هم عايزينه وحجزوا مية .. وإحنا قولنا إننا مش هــ نسكت لو حصل الملئ الثانى …… و هنا هــ أقولك إن مصر من خلال مؤسسة الرئاسة والخارجية كلامهم كان واضح فى النقطة دى ولا يحتمل أى لبس:
الرئيس السيسى قال إن مية مصر خط احمر .. وإحنا مش هــ نسمح بتهديد الأمن القومى المصرى لأن ده تهديد وجودى لــ 100 مليون شخص … والوزير سامح شكرى قال إن أى تحرك مصرى مرتبط بوقوع ضرر على مصر …. وطالما إن ده ماحصلش لحد دلوقتى .. يبقى لسة لم يأن اوان اى تحرك عسكرى محتمل … و حط تحت كلمة محتمل دى مليون خط !
هــ ييجى حد يقوللى ، طب ما إنت دلوقتى ماتقدرش تهد السد ، وإلا السودان ومصر هــ يغرقوا … والرد على النقطة دى ببساطة خالص هو إنه مش إنت اللى تحدد الــ Break Even Point اللى عندها نقول ماينفعش نهد السد .. لأن فيه خبراء هم اللى يحددوا الكلام ده مش إحنا
الخلاصة .. مياه الفيضان بدأت التدفق من فوق السد .. وهتوصل مصر فى خلال أسبوعين بحد أقصى … وإحنا مستعدين لإستقبالها …
حفظ الله مصر برئيسها وجيشها وشعبها 🙏
والمجد للثابتين … 💪