25 Jul 2021
مرجيحة هرى خبراء المحنكين و شركاه !!
—————————————
مافيش حد في مصر إلا و ركب مرجيحة هرى خبراء المحنكين و شركاه على صفحات التواصل الإجتماعي و جربها …. فيه اللى كشفها من أولها و عرف إنها نصباية …. و فيه اللى جت على هواه فإشتغل فيها و بقي لا يدخر جهد في أنه ينشر اعلانات عنها و يدعوا أصدقائه لركوبها …. و ده لأسباب نفسية و عصبية خاصة بيه ، ملناش دعوة بيها 😁 …. و فيه اللى أدمنها و بقي كل ما يشوفها يركبها لغاية لما تتعبه .. فــ ينزل منها ، و يحلف طلاق تلاتة ماهو راكبها تاني …. بس اول لما يشوفها تانى …. يطلع يجري عليها 😊 .
و عشان مانطولش عليكم …. تعالوا نفكركم بشوية مراجيح ناس كتير ركبتها … و مع إنهم بيكتشفوا إن كل مرة بــ يتنصب عليهم بنفس الأدوات و بنفس الأشخاص اللى دايما بيقولولهم انهم وطنيين و متعلمين بره و جوه ، و فاهمين كل حاجة و إن كله كوم و الموضوع ده كوم تانى خالص …. و لو الموضوع ده محصلش كان زمانهم واقفين مع البلد ، بس يا خسارة. ….
لكن مش بيتعلموا …. و برضوا بيروحوا يركبوا المرجيحة معاهم .. هم نفس الناس اللى بــ يتنصب عليهم كل مرة بنفس ذات نفسهم و هم بيغنوا “ركبني المرجيحة – حلوة قوي و مريحة” 😅
🔹 فاكر موضوع إن مصر اتنازلت عن حقول الغاز في البحر المتوسط و دي حقوق ولادنا و احفادنا 😊.
🔹 طب فاكر خدوك كام لفة في المرجيحة في موضوع إن خلاص مصر وقعت على صفقة القرن اللى هــ تتنازل فيها مصر عن سيناء لإسرائيل و الفلسطينيين 😊.
🔹 طب فاكر لفة إن تركيا خلاص بتحتل ليبيا و جثث الجنود المصريين اللى بترجع من ليبيا …. و بكرة نشوف الجيش التركي واقف على حدود السلوم ، و هــ يغرقوا البحرية المصرية و هــ يدمروا الجيش المصري …. و آلاف البنات اللى خطابهم بيعيطوا عشان هــ يبعتوهم ليبيا يحاربوا 😊 .
🔹 طب فاكر لفة تهجير أهالي سيناء …. و تهجير أهالي مناطق العشوائيات قسراً😊
🔹 طب فاكر لفة إن مصر باعت الجزيرتين زي ما باعت أم الرشراش ….. وتقول له يابني لا أم الرشراش كانت مصرية و لا حتي الجزيرتين …. طب باعوهم بكام !؟ .. مايردش 😊.
🔹 طب فاكر موضوع مصر خلاص هــ تفلس و الدولار حيبقي بـ 250 جنية وللأسف ناس كتير باعت بيوتها وأراضيها وإشترت دولار علشان المكاسب المنتظرة 😊.
🔹 طب فاكر إزاي حفر قناة السويس الجديدة هــ يدمر قناة السويس القديمة و يقضي على الشعاب المرجانية و دورة حياة القريدس البحري و سلطعون البحر المتوسط 😊.
🔹 طب فاكر المدارس اللى الطالب هــ يدفع فيها تذاكر دخول بخمسة جنية كل يوم الصبح عشان يعرف يدخل المدرسة 😊.
🔹 طب فاكر تذاكر دخول الجوامع 😊.
🔹 طب فاكر محاربة الحكومة المصرية للجوامع و هدمها لبيوت الله عشان بتحارب الإسلام و كدهون 😊.
🔹 طب فاكر إنتشار الإلتهاب السحائي بين الطلبه الابتدائي و مئات الجثث اللى إتملت بيهم المستشفيات 😊.
🔹 طب فاكر إزاي مصر هــ تفشل في تعويم السفينة إفرجيفن … و لما مصر عومت السفينة خدك تاني في المرجيحة و قالك مش مصر دي هولندا … و بعدين قالّك مصر هي اللى هــ تدفع مئات الملايين تعويضات للشركة صاحبة الناقلة 😊
🔹 طب فاكر عشرات الآلاف اللى كانوا بيموتوا من الكرونا كل يوم وبيفرفروا فى الشوارع 😊.
🔹 طب فاكر الحكومة اللى كانت بتحط بلاستيك في الرز و سبرتو في البنزين و بتحقن الأكل مواد مسرطنة عشان تقلل الإنجاب 😊
🔹 طب فاكر لفة حصول مصر على المركز الأول في أي حاجة ( السرطان – التحرش – التلوث – الغباء – البؤس – …. أي حاجة وحشة و خلاص) .. 😊
🔹 طب فاكر السور اللى اتبني حول العاصمة الإدارية الجديدة لانهم سيتركون العاصمة القديمة تحترق و كدهون 😊
و غيرها كتيييييييير من آلاف الإشاعات اللى كل مرة ياخدوا الناس وراهم و يدعوهم لركوب نفس المرجيحة … و للأسف فيه ناس أدمنتها !!!
العجيب إن نفس ذات نفس خبراء مراجيح الهري المحنكين ….. بــ يدعوا الناس لركوب مرجيحة سد الهرى الحبشى ، و عايزين يمرجحوا الناس و يرقصوهم على أرائهم اللى لو مصر معملتهاش …. النيل هــ ينشف و المية هــ تروح ….. و للأسف فيه ناس مصممة تناقش و تفتي و تركب نفس المرجيحة .
لدرجة إن رئيس الدولة بنفسة طلع و قال …. لا يليق بيكم انكم تقلقوا …. عيشوا حياتكم يا مصريين و بلاش هري…… بس نقول إييه …. فعلا … أصحاب العقول في راحة 😊
و لأن المراجيح كتيييييير …. إييه رأيكم تفكرونا و تبعتولنا عن أكبر مرجيحة لفتت نظركم و عدت علينا الفترة اللى فاتت و نسينا نكتبها في المقال 😊
حفظ الله مصر برئيسها وجيشها وشعبها 🙏
والمجد للثابتين … 💪