13 Aug 2021
الطبيعة تثأر … !!
——————
البشر تعاملوا مع موارد الطبيعة على أنها معين لا ينضب …. وأسرفوا فى استهلاك الموارد دى … بل وساهموا فى تدميرها … من أول المواطن اللى بيرمى كانزاية البيبسي ، وكيس الشيبسي وبيفسد بيهم البيئة المحيطة وبيلوث بيهم مياه البحر والتربة البرية .. وبيتسبب فى قتل كثير من المخلوقات … ومرورا بملايين السيارات وعربات القطارات والطائرات اللى بتطلق عوادم كربونية وملايين الذرات الملوثة للبيئة .. و وصولا لمئات الالاف من المصانع اللى بتنتج ملايين الاطنان من الملوثات الصناعية والانبعاثات الكربونية … ناهيك عن الملوثات النووية اللى بتقتل كل شيئ حي .. وسباق التسلح النووي بمخزونه الاستراتيجى اللى قادر على تدمير كوكب الأرض بالكامل عشرات المرات بمجرد لمسة زر !!!
على سبيل المثال.. أخر تقرير اتعمل عن اعداد الافيال البرية فى الغابات بيقول ان اعداد الافيال انخفض فى اخر 20 سنة بنسبة 68% .. !!! …. و ده مجرد مثال فقط … فيه كائنات بحرية وبرية قاربت على الانقراض نتيجة تدمير بيئتها الطبيعية بسبب ارتفاع نسبة التلوث … وانخفاض مساحة الرقعة الخضراء من الغابات … ناهيك عن تلوث مياه البحار والانهار …
حتى الهواء اللى بنتنفسه أصبح ملوث .. وتجربة ثقب الأوزون كلنا على علم بيها … واللى دول العالم ماقدرتش تعمل فيه حاجة لعشرات السنين .. لحد ما جائت كارثة كورونا وتسببت فى شلل تام لكل مظاهر الحياة العامة وانخفاض الملوثات بشكل كبير .. و اللى سمح للبيئة انها تتنفس … و انخفضت نسبة التلوث مما أدى لإلتئام ثقب الأوزون …
ورغم كل الجهود اللى بتبذلها دول العالم للحد من التلوث .. واللى احنا شايفين انها غير كافية على الإطلاق .. فالواقع بيقول ان ظاهرة الاحتباس الحرارى بتزيد … والمؤشرات مرعبة …
وبرغم ان البعض بيشير لأيادى خفية بتعبث فى بعض المناطق لأهداف واسباب معينة .. لكن احنا هنغض الطرف عن الكلام ده … وهنقول إن العالم النهاردة بيمر بأجواء غير طبيعية …… فيضانات .. وحرائق غابات .. وعواصف ثلجية .. وموجات جفاف … وكلها بتضرب أماكن غير معتادة فى دول متفرقة … وبمنتهى القسوة … وكأن الطبيعة بتحاول تثأر لنفسها من سلوكيات البشر … وسوء تعامل الإنسان مع الموارد الطبيعية اللى وهبها لنا الخالق عز وجل … واللى لو استمر بالشكل ده .. فسيكون القادم أسوء …
الحمد لله ان مصر لحد النهاردة فى نعمة … وبعيدة عن كل اللى بيحصل فى العديد من دول العالم .. وكلنا عايشين حياتنا بشكل طبيعى .. حتى فى ظل أزمة كورونا … و دى نعمة لازم نشكر ربنا عليها … لكن مين عارف … 🙄
لازم البشر كلهم يعوا الدرس … ويبقوا متأكدين إن سوء الأدب مع الهدايا الربانية .. ونعمة الموارد الطبيعية اللى منحها لنا الخالق سواء عندنا أو فى أى مكان فى العالم .. ممكن يؤدى لغضب الطبيعة … زى ما بنشوف النهاردة فى كل مكان
وغضبة الطبيعة بتبقى قاسية جدا … ومابترحمش
#الفيديو المرفق جزء من تقرير رائع لقناة سكاى نيوز