مصر .. وماذا بعد عودة طالبان

18 Aug 2021

مصر .. وماذا بعد عودة طالبان .. !!

———————————–

بعض التعليقات على مقالنا السابق والعديد من الرسائل اللى وردت لنا على الخاص بتسأل سؤال واحد مافيش غيره ..

ياترى عودة ظهور طالبان وسيطرتهم تانى على الحكم فى أفغانستان هــ يكون له أى تأثير على مصر !؟

فى الواقع .. عودة طالبان أكيد هــ يكون له تأثير على العالم كله مش بس على مصر .. وخصوصا إن العودة أتت بمباركة أميريكية حتى وإن كانت غير معلنة طبعا .. وبصمت أو خلينا نقول سلبية دولية من المجتمع الدولى كله ..

أفغانستان هــ تبقى الواجهة القانونية (وحط تحت قانونية دى مليون خط) للإرهاب الدولى ، وهتتحول لمعقل ومرجع وملاذ آمن لكل العناصر والمليشيات الإرهابية المسلحة وكل تيارات التأسلم السياسى فى العالم كله .. وبشكل قانونى .. وفى إطار كيان دولة … وخصوصا بعد سقوط مشروع الإخوان فى الشرق الأوسط زى ما شرحنا قبل كدة .. واللى كان مدعوم من الغرب … سواء إتفقنا على ذلك أو انكره من يريد أن ينكر !

لكن السؤال اللى بــ يهم الجميع .. ياترى إييه تاثير ده على مصر !!؟؟ …. والحقيقة إن الإجابة هنا لازم تكون على عدة محاور !!

🔴 #أولا .. على المستوى الداخلى الشعبى ..

للأسف فيه ناس عايشين بيننا .. ناس عادية جدا .. ناس بنقابلهم كل يوم و بــ نصبح ونمسى عليهم وفيه بيننا وبينهم تعاملات يومية … الناس دى ممكن يبقى فيهم البقال ، والبواب ، والسمكرى ،  وزميلك فى الشغل ، وجارك .. وأحيانا قريبك كمان … الناس اللى بيظهر معينها وبــ تتضح أفكارها فى مواقف محددة .. وبتكتشف إن فكرهم لا يقل داعشية وإرهاب وتطرف عن الداعشى ، وإلا الطالبانى ، وإلا الإخوانى ، وإلا المتسلف فكريا ، وإلا أى فرقة من الفرق دى .. والفرق الوحيد بينه وبينهم إنه فقط لم يحمل السلاح بعد ..

النماذج دى .. واللى بنقابلهم كثير فى حياتنا اليومية .. هــ تلاقى معظهم سعيد ومبسوط من اللى حصل .. ومعتبر ده نصرة للإسلام … وهــ تلاقيه كمان مستغرب و مستنكر من حجم الغضب والرفض اللى عندنا من اللى حصل … وليه !؟ .. و هم عملوا إييه ؟ .. دى ناس مجاهدين وبتوع ربنا … دوول حتى حجبوا الستات والبنات ربنا يكرمهم .. مش أحسن من المسخرة اللى إحنا عايشين فيها … دوول حتى ربنا نصرهم على أميريكا .. أنا مش متفق معاهم … بس هم ناس بتوع ربنا .. وعقبال مانبقى زيهم …. و … و … و …. ومع عودة الحياة لحركة طالبان ، الناس دى هــ تتمسك أكثر بأفكارها .. و هــ يمتلكوا الجرأة من جديد للجهر بفكرهم السلبى المتطرف فى محيطهم المجتمعى .. مع تجدد الأمل فى إحتمالية عودة تجربة الإخوان من جديد ..

🔴 #ثانيا .. على مستوى الأمن الداخلي …

أكيد الأجهزة الأمنية المصرية يقظة جداً … وبيشتغلوا بتنسيق وتناغم مع القوات المسلحة … لكن مايمنعش إننا نشوف بعض النشاط والتحركات للعناصر الإرهابية فى الداخل المصرى … صحيح عمرها ما هــ تكون أبد وقطعا زى اللى مرينا بيه خلال السنوات الماضية .. لكن وارد يبقى فيه نشاط تانى بدعم خارجى ..

والمتابع منكم لصفحة المتحدث العسكرى ، هــ يلاقيه نشر بيان من كام يوم بيتكلم فيه عن تواصل أعمال القوات المسلحة فى مكافحة الإرهاب بوسط وشمال سيناء وإننا نجحنا فى القضاء على 13 عنصراً تكفيرياً … وكان من نتيجة الأعمال القتالية دى أن نال شرف الإستشهاد والإصابة عدد ( 9 ) من أبطال القوات المسلحة … و ده معناه زى ما أكدنا قبل كدة إن إحنا لسة مكملين شوية .. والمواجهة مستمرة

🔴 #ثالثا .. على المستوى العام لمكافحة الإرهاب ..

إوعى حد فيكم ينسى ، إننا نجحنا فى إزاحة جماعة إرهابية وتنظيم كان ناوى يحكم مصر 500 سنة (على حد قولهم) .. وإنك بقالك 7 سنوات فى مواجهة مباشرة مع الإرهاب الدولى وداعميه ومموليه … برجالتهم ، ورموزهم ، واسلحتهم ، وإعلامهم ، وقنواتهم ، ولجانهم الأليكترونية ، وسلاطاتهم وبابا غنّوجهم … وناجح جدا لحد دلوقتى فى مواجهتهم .. وقدرت تكبدهم ومازلت ، مئات الملايين من الدولارات من الخسائر إن لم يكن أكثر … ناهيك عن خسائرهم البشرية الضخمة فى عناصرهم المدربة وقياداتهم .. وقدرت تخلخل وتحدث شروخ وتدمير فى بنائهم الهيكلى والتنظيمى ..

وبالتالى .. فــ مافيش شك إن اى تعافى لكيان إرهابى .. وبالذات لو إمتلك شرعية قانونية .. هــ يخليك فى مواجهة مباشرة معاه … وخصوصا لو تأكدنا إن كل الكيانات دى فى النهاية واحد … وإن اللى بيحركهم من خلف الستار برضوا واحد … يعنى عاجلا أو أجلا هــ تصطدم بيهم سواء بشكل مباشر أو غير مباشر .. وبالتالى ، فــ الفترة القادمة إنت محتاج تستمر فى مسيرتك البنائية والإصلاحية .. وإنك تاخد بالك وتأمن نفسك كويس جدا .. على طريقة مبدأنا القديم “يد تبنى ويد تحمل السلاح”

🔴 #رابعا … على المستوى الخارجى ..

طبعا إحنا شرحنا إن تركيا بإعتبارها دولة وظيفية ، فهى هــ تلعب دور الوسيط أو الوكيل فى إدارة الإسلام السياسى فى افغانستان .. وهــ يبقى فيه تناغم بينها وبين حركة طالبان .. و هيبقى تمرير العناصر الإرهابية هو سلاحها لإبتزاز دول المنطقة ودول الجوار بأوامر الغرب وحسب أجندة شبكات المصالح … و هــ يبقى فيه محاولات لإشعال المنطقة وبالذات شرق المتوسط .. وناهيك عن منطقة القرن الأفريقى ..، أو على أقل تقدير خلق حالة من التوتر فى المناطق دى .. لتحقيق مكاسب سياسية وإقتصادية لمصلحة صاحب الشغل

وأظن كلنا ملاحظين إن عودة التلويح بورقة المليشيات تانى فى ليبيا .. وتراجع كبير فى محاولات التقارب ، و توقف لهجة الإستجداء إن شئنا الدقة من جانب الأغا ودولته فيما يخص ملف العلاقات المصرية الترkية .. كل ده حصل بعد الحديث التليفونى اللى تم مؤخرا بين الأغا والأخ بايجون … لأنه من الواضح إن دولة الأغا الوظيفية إستلمت تكليفات هــ تضطلع بيها خلال الفترة القادمة .. اللى هو زى ما قولنا هــ يكون لعب دور الوكيل الحصرى لإدارة فرق المتأسلمين ، والجماعات والمليشيات الإرهابية والتنسيق بين الواجهة القانونية للإرهاب الدولى فى دولة الأفغان ، وبين الدول اللى هــ يبقى مطلوب إبتزازها ……… أو إستهدافها ..

🔴 #خامسا … على المستوى السياسى ..

السياسة أكيد هــ تلعب دورها .. ومصر هــ تبقى منخرطة فى لعبة شطرنج على أعلى مستوى مع كل الأطراف .. وهــ يبقى هناك تنسيق مع العديد من الدول على عدة محاور .. زى على سبيل المثال لا الحصر ، الصين وروسيا وفرنسا واليونان وقبرص .. ناهيك عن المحور العربى المتمثل فى السعودية والإمارات والبحرين وليبيا والسودان وممكن تونس .. لمواجهة التحديات والإبتزاز السياسى اللى ممكن يبقى موجود فى الفترة القادمة

فى النهاية …. مافيش جديد .. ومافيش قلق من الناحية دى خالص ، لأننا عارفين من زمان إن المواجهة مستمرة وممتدة .. وإحنا جاهزين لها فى أى زمان ومكان … أومال إحنا كنا بنعمل إييه طول السنين اللى فات دى ؟ 🙂 …

و سلاحنا فى مواجهة كل التحديات ، هيبقى فى المقام الأول سلاح التنيمة .. والإستمرار فى تقوية القوات المسلحة اللى هى الدرع الواقى للدولة ، والحامى لكل المكتسبات اللى حققناها 😉🙂

حفظ الله مصر برئيسها وجيشها وشعبها 🙏

لمتابعة تعليقاتكم