20 Aug 2021
مسرحية .. سيناريو .. وإخراج !!!
———————————
برغم إن الصورة أصبحت أوضح من أن ينكرها أحد .. وبقت مكشوفة ومفضوحة بكل تفاصيلها وابعادها … إلا إنك لسة يا أخى بــ تلاقى البعض من عشاق الدونية والمنبطحين ، مازالوا يمتلكوا القدر الكافى من الصفاقة الفكرية و بــ يجدوا فى نفسهم الجرأة اللى يقولك بيها “ماتبطلوا نظرية المؤامرة بقى .. وإحنا عندنا إييه يعنى علشان يتأمروا علينا بيه !؟ .. و مش كل حاجة تعلقوها على شماعة المؤامرة .. ” !!
والحقيقة إنت معاك حق .. هى مش مؤامرة ولا حاجة … هى مسرحية …
مسرحية هزلية ساخرة لها سيناريو .. وحوار .. وإخراج .. وأبطال .. وممثلين اساسيين .. وكومبارس .. وحبكة درامية …. وأهم جزء فى الحبكة الدرامية دى .. إنه يقنعك إنه مافيش مؤامرة … علشان مع الوقت تتحول إنت نفسك لجزء من ادوات المؤامرة دى ..
تخيل يا أخى إن الطيران الأميريكى كان بيرمى مساعدات غذائية واسلحة وذخيرة على كتائب الدواعش فى سوريا والعراق فى الكام سنة اللى فاتوا .. وبعدين يرجع يقولك … أووبس … ده إحنا عملنا كدة بالغلط .. ماكنّاش نقصد !!
تخيل إن الغرب لما حاصر العراق إقتصادياً ، أو حتى إيران .. ماكانش فيه دولة فيهم بتقدر تصدر إزازة بنزين بسبب الحصار الإقتصادى والحظر على الدول دى .. لكن لما داعش سيطرت على 70% من العراق وسوريا ، وإستولت على أبار ومصافى البترول فيهم .. كانوا بيقدروا يبيعوا البترول عادى جداً .. وبينقلوه لدولة حدودية عادى جداً .. وبيقبضوا ثمنه عادى جداً .. ويمولوا بيه أنشطتهم الإرهابية ويسلحوا مقاتليهم عادى جداً … والعالم ياعينى كان واقف بيتفرج ومش عارف يعمل إييه .. !!!! … شوف حكمة ربنا يامؤمن !! 😎
تخيل يا أخى إن أميريكا بقالها 20 سنة فى افغانستان علشان تقضى على الإرهاب ، ممثلا فى طالبان والقاعدة … وبعدين خرجوا منها وسابوا طالبان تستولى على مخازن أسلحة كاملة بكل ذخيرتها وقطع غيارها .. ويستعيدوا السيطرة تانى على المدن الأفغانية فى 3 شهور فقط … ويقولك سبب إننا ما أخدناش الأسلحة وإحنا ماشيين ، إن تكلفة نقلها أكبر من قيمة الأسلحة نفسها !! … ياسلام .. طب ما تدمرها .. بدل ماتسيبها لجيش إرهابى !
تخيل إنه فرق ومليشيات وكتائب طالبان زحفت على كل مدن افغانستان … واسقطت الحكومة اللى عملها الأمريكان واللى المفروض بين قوسين إنها الحكومة الشرعية للبلاد .. ومافيش حد فى العالم فتح بقه وقال ده (((إنقلاب))) .. أو أصدروا قرارات بمقاطعة الحكومة الجديدة .. أو بحصار الدولة إقتصادياً .. أو اى حاجة من الحاجات اللذيذة اللى إتعملت مع مصر دى فى 2013 .. تؤ تؤ .. أبداً .. بل بالعكس .. كان كل اللى شاغلهم ، ياترى هــ نعترف بالحكومة الجديدة دى إمتى ، وتحت أى شروط !!!
تخيل إن المليشيات الإرهابية المسلحة فى أفغانستان ، وهى بتتمدد وتسيطر على المدن الأفغانية .. كانت بتقتل وتعدم عادى جداً .. وماسمعناش عن حد من المنظمات الحقوقية ومواخير حقوق الإنسان زى هيومان رايتس ووتش مثلا .. بتهاجم أو بــ تنتقد اللى حصل … لكن لما الجيش المصرى كان بيحارب منتخب العالم للإرهاب فى سيناء ، كان بيقولك إن الجيش بيستخدم القوة المفرطة مع الإرهابيين الكيوت !
تخيل إن المولّا حسين أوباما طلع فى 2011 يخاطب رئيس السلطة الشرعية للبلاد فى خطاب شهير ، ويقول له لازم تمشى دلوقتى .. و “ناوو ميينز ناوو” .. لكن لما 33 مليون مصرى نزلوا الشوارع فى 2013 والجيش إنصاع لإرادتهم .. العالم كله قالك الشرعية الشرعية ، واللى بيحصل ده إنقلاب ..
تخيل يا مؤمن ، إن الجماعات والتيارات الإرهابية والمتأسلمين مش بــ يظهروا غير فى الدول اللى الغرب أو شبكات المصالح لهم مطمع فيها .. سواء كان داخل الدول دى ، أو حتى من خلال دول وظيفية تهدد أمنهم وتبتزهم وتضرب مصالحهم … يا أخى ده حتى جماعة بوكوا حرام ماظهرتش غير فى غرب أفريقيا لتهديد المصالح الفرنسية .. مش علشان فرنسا كيوت وإلا حاجة لا سمح الله .. لكن مجرد صراع على مناطق النفوذ وتقسيم الثروات مش اكثر … و ده يؤكد بما لا يدع مجال للشك .. إن الجماعات والتيارات دى مجرد ادوات وظيفية مهما كانت شعاراتهم البراقة والشعبوية والدينية ضد الغرب
🔸 لأ .. أنا مش مقتنع بالكلام ده .. الكلام ده كله كدب وتطبيل وتضليل ..
🔹 طب إنت عايز إييه يا حبيبى !؟ ..
🔸 الإرهاب ده فزاعة …
🔹 ماشى يا حبيبى
🔸 الحكومات بتخوفنا بس علشان يسيطروا علينا
🔹 طبعا يا حبيبى ..
🔸 مافيش حاجة إسمها نظرية مؤامرة
🔹 أكيد يا حبيبى ..
🔸 إحنا اللى نستاهل علشان ماعندناش ديموقراطية زى برة
🔹 معلش يا حبيبى ..
🔸 إنتم بتكرهوا المنظمات الحئوئية اللى برة علشان بتكشف الأكاذيب وبتعرفنا الحقائق
🔹 أيوة يا حبيبى ..
🔸 الجماعات الإسلامية دى ناس بتوع ربنا وأكيد احسن من العرى والمجون اللى إحنا عايشين فيه
🔹 معاك حق يا حبيبى ..
🔸 الــ…….
🔹 ثانية واحدة بس كدة .. إفرد إيديك لقدام وإلبس القميص بالمقلوب ، وتعالى علشان أجوزك هنّومة يا حبيبى .. 😁
حفظ الله مصر برئيسها وجيشها وشعبها 🙏