27 Aug 2021
صناعة البعبع .. ومن يحارب الإرهاب .. !!
——————————————-
بمناسبة تفجيرات مطار كابول .. وسقوط العشرات مابين قتيل وجريح .. وسواء كان اللى عملها هم تنظيم طالبان وإلا تنظيم داعش خرسان زى مابيقولوا … ف مش عارف لييه اللى حصل ده فكرنى باللقاء الاعلامى اللى عمله الرئيس السيسى فى برنامج 60 دقيقة الاميريكى ، واللى اللجان الإلكترونية وكل قنوات الاخوان وقتها من شلة الهربانين عند الاغا العثماني، اشتغلوا كلهم على حملات من الهجوم و السخرية والاستهزاء بمصر ورئيس مصر ، واقنعوك وقتها ان الرئيس ماعرفش يرد على الاسئلة اللى اتوجهت له … واننا اتفضحنا .. وإن السيسى كان خايف ومتوتر … الخ الخ الخ ……
اللقاء ده كان من 3 سنوات وشوية والفيديو ده مدته 21 ثانية بيعرض كلام المذيع فى جزء من الحوار ، و اللى كان بيحاول فيه يحرج الرئيس السيسى لما سأله:- “التقديرات بتقول إنه فيه حوالى 1000 عنصر ارهابى فى سيناء … و مع أكثر من مليار دولار مساعدات عسكرية من اميريكا ، ازاى ماقدرتش تقضى عليهم !!؟”
وكان الرد السريع واللحظى والخاطف من الرئيس السيسى واللى اطاح بجبهة المذيع المتربص لما قال له:- “طب ولييه ماقدرتش الولايات المتحدة تقضى على الإرهابيين فى افغانستان بعد 17 سنة ، أنفقت فيهم اكثر من تريليون دولار !؟” 😁
الحقيقة إن الصورة النهاردة مش محتاجة توضيح … لأن الرئيس السيسى فى لقاء اعلامى آخر فى مصر، قال إن مصر بتحارب الإرهاب بجد … وحط تحت كلمة ((بجد)) دى مليون خط .. وقال انه فيه دول عملت نفسها بتحارب الإرهاب لكنهم فى النهاية سابوا الإرهاب ومشيوا … واكيد الرئيس كان يقصد وقتها العراق … و أدى المشهد بيتكرر النهاردة تانى فى افغانستان … 😎 ..
فى نفس الوقت اللى مصر قدرت تسيطر على الأوضاع الأمنية فى سيناء ..، خلينا نقول بنسبة حوالى 98% … و دايسين بالبيادة الميرى على رقبة كل العناصر والتنظيمات الإرهابية … صحيح الثمن كان ومازال دماء من شهداء أبطال مصر الزكية … لكن ده تأكيد لتصريحات القيادة السياسية وتأكيد قادة القوات المسلحة إننا مش هنسيب سناء لحد ! 💪
وسواء كان اللى حصل فى افغانستان ، صراع أجنحة أو صراع فرق بتوجه دينى متطرف … فالنتيجة النهائية إن الجيم بيتلعب تانى من اول وجديد … وممثل المولا أوباما الحالى فى البيت الأبيض وهو الحاج بايجون، بيحاول يخترع العجلة من جديد ؛ ويرجع تانى للسبعينات علشان نبتدي الليلة من اول وجديد … وتصبح افغانستان هي المنبع والمصدر الرئيسى للإرهاب العالمى … والبعبع اللى بيخوف الكل … و kلب الصيد اللى ممكن يتم اطلاقه على أى حد مايسمعش الكلام …. 😉
كلمة اخيرة أو مجرد تساؤل بنطرحه وهو …. اصرار الرئيس السيسى على اخراج البعثة وكل الرعايا المصريين من افغانستان والدور الرائع اللى لعبته الأجهزة الأمنية المصرية فى إخراجهم من أخطر بؤرة فى العالم حاليا وايصالهم لمصر سالمين ، قبل أحداث تفجيرات مطار كابول ب 48 ساعة فقط وشبه اغلاق للمطار .. فى الوقت اللى معظم دول العالم ومنها دول كبرى ، لسة محتاسين فى اجلاء رعاياهم من هناك … هل ده كان من قبيل الصدفة !؟ … ام كان مبنى على معلومات استخباراتية .. وتحركات استباقية !؟ ..
نترك لحضراتكم الإجابة … 🙃🙂
حفظ الله مصر برئيسها وجيشها وشعبها 🙏