المؤتمر الصحفى (مصر / قبرص) ورسائل بالجملة

04 Sep 2021

المؤتمر الصحفى (مصر / قبرص) ورسائل بالجملة .. !!

——————————————————-

النهاردة كان فيه مؤتمر صحفي للرئيسين المصرى عبد الفتاح السيسى والقبرصى نيكوس انيستازياس … على خلفية زيارة الرئيس القبرصى لمصر وإجرائه مباحثات ثنائية مع الرئيس السيسى والتوقيع غلى مذكرات تعاون وتفعيلها فى العديد من الملفات ..

أهم ما جاء فى كلمة #الرئيس_السيسى هو استمرار توجه مصر الحالى من كل ملفات المنطقة .. ورفضها لأى تدخلات خارجية واستمرار مكافحة الإرهاب ودعم القضية الفلسطينية .. وتأمين شرق المتوسط …. الخ

كل الحاجات دى من ثوابت السياسة المصرية … لكن التصريح الابرز للرئيس السيسى كان التأكيد على موقف مصر الثابت .. (و حط تحت كلمة #الثابت دى مليون خط) فى دعم القضية القبرصية واحترام سيادة الدول فى إطار القانون الدولى وقرارات منظمة الأمم المتحدة …. وطبعا كلنا فاهمين مصر بتدعم قبرص فى مواجهة مين ..

ده بس علشان لما فى يوم ، تلاقى أسد الخارجية سامح شكرى فى أنقرة ، ماتقولش مصر قدمت تنازلات .. لأن اللى مابيتنازلش عن حقوق الأخرين ولا بيعمل موائمات سياسية فى حقوق الأخرين .. يبقى مش ممكن يقدم أى تنازلات أو يعمل موائمات ، تخص قضاياه وحقوقه وتوجهاته السياسية !

نيجى بقى للرئيس القبرصى اللى قال فأسهب فى الحديث … وكان أهم ما جاء فى كلمته:

🔹️ إن العلاقات بين مصر وقبرص علاقة قوية جدا وإنه بيعتبر مصر شريك اساسا فى كل ملفات المنطقة ، وإنه بيثمن جهود مصر فى دعمها للقضية القبرصية فى إطار القانون الدولى … و ده معناه إن مصر مش بتقول أى كلام وخلاص .. لكنها بتتحرك بالفعل سياسيا لتأكيد الدعم ده … و ده رسالة لنظام الاغا فى اسطنبول عن موقف مصر فى القضية دى !

🔹️ الحديث عن سرعة البدء فى تفعيل اتفاقية تصدير الكهرباء لقبرص وتنفيذ الربط الكهربائي بين البلدين ، ثم مستقبلا جزيرة كريت وبعدهم اليونان كبداية لعمل الربط الكهربائي بين أوروبا وأفريقيا … و لو أضفنا ده لمشروع الربط الكهربائى مع ليبيا والسودان والسعودية .. ده معناه إن مصر بتقوم بربط أمنها الاقتصادى والكهربائي بدول المنطقة … وهتصبح أو أصبحت بالفعل حلقة الوصل بين القارتين الاوروبية والافريقية .. وإن الدخول للقارة الأفريقية لازم هيبقى من خلال البوابة المصرية ..

🔹️ تحدث الرئيس القبرصى عن تفعيل اتفاقية نقل الغاز بين مصر وقبرص كجزء من مشروع توصيل الغاز لأوروبا .. والعمل على تنفيذ كل توصيات وقرارات والخطط اللى تم الاتفاق عليها فى منتدى غاز شرق المتوسط …

🔹️ إستتباعاً للنقطة السابقة .. قال الرئيس القبرصى إن أى حد عايز ينضم للمنتدى الغاز اهلا وسهلا بيه .. لكن ده علشان يتم مش هيكون غير من خلال إحترام القانون الدولى وقانون اعالى البحار واتفاقيات الترسيم البحرى … يعنى الخلاصة ان اللى عايز يدخل منتدى غاز المتوسط وهو عشمان إن فيه أى حد هيقدم له تنازلات أو هيغير مواقفه علشان يديله حتة زيادة مش من حقه ..، ده يبقى عشم ابليس فى الجنة 😁

🔹️ دعم موقف مصر فيما يخص الملف الليبي والتأكيد على ضرورة خروج كل المرتزقة المسلحين من الاراضى الليبية وإجراء انتخابات نزيهة فى ديسمبر المقبل … وقال إن قبرص بصفتها عضو فى الاتحاد الأوروبي ، بتضغط بشدة لعمل شراكة كاملة مع مصر فى جميع الملفات …

🔹️ أهم نقطة طرحها الرئيس القبرصى من وجهة نظرنا .. هى حديثه عن دور مصر وتحركاتها السياسية لحل النازعات فى شرق المتوسط وتأمين المنطقة وضمان امنها واستقرارها .. و ده بيأكد على إن الدور المصرى الإقليمى هو دور فاعل ومحسوس وله ثقل .. وإنه حتى لو كانت الصورة الخارجية فى الوقت الحالى تتسم بالصمت .. لكن اللى بيدور خلف الكواليس مما لا نشعر به ، مغاير تماما للصورة الخارجية …

الخلاصة … مصر مازالت بتتحرك تحركات محمومة .. والقيادة السياسية المصرية لسة مكملة فى طريقها وبتدعم توجهاتها فى سياستها الخارجية لتأمين مصر أولا .. وتأمين ودعم استقرار الإقليم ثانيا … من خلال تعظيم المكاسب الاقتصادية والوقوف فى وجه الاطماع الخارجية اللى بتهدف للسيطرة على موارد المنطقة عن طريق التدخل فى شئون الدول وفرض الارادة على الانظمة والشعوب سواء بالترغيب أو بالترهيب

مصر أصبحت وهتفضل هى الرقم الاقليمى الصعب اللى بتتحطم عليه كل الاطماع ، والبوابة اللى مافيش حد هيقدر يدخل الشرق الأوسط أو لأفريقيا الا من خلالها …

حفظ الله مصر برئيسها وجيشها وشعبها 🙏

لمتابعة تعليقاتكم