07 Sep 2021
كلاكيت سبعميت مرة …. أكشن !!
——————————–
في عام 1991 …. أنتجت فرقة الفنانين المتحدين مسرحية “شارع محمد على” … بطولة فريد شوقي و المنتصربالله و شريهان …. و كان من أشهر إفيهات المرحوم النجم المنتصربالله …. مشهد النكتة بتاعة إتنين قاعدين في السينما إتراهنوا على أن واحد فيهم يروح يضرب نفس الراجل على قفاه أكتر من مرة …. و لما يضربه و يرجع يتراهن معاه تاني ..
و يقوله :- تراهني أروح أضرب نفس الراجل هو – هو على قفاه …
و التاني يقوله :- أراهنك
و يروح يضربه و يقوله :- بقي إنت قاعد هنا يا حامد و سايبني بضرب الراجل اللى هناك 😊 😊
مش عارف ليه إفتكرت المشهد ده و أنا بــ أتابع الأخبار بتاعة هروب ستة عناصر من حماس من سجن شديد الحراسة عبر وكالات الأنباء اللى تم إستدعاء مراسليهم من قبل الجيش الإسرائيلي عشان يصوروا النفق بالطول و العرض و من فوق و من تحت مع سيل من التصريحات التفصيلية من قادة الجيش و الأمن الإسرائيلي و يشرحوا إزاي حفروا النفق بملعقة طعام ….. مع إن العقيدة الاعلامية للإعلام العسكري الإسرائيلي هي الكذب و التضليل في حالة الإخفاق و التغطية عليه و التقليل من شأنه لو تسرب الخبر … و ليس نشره بالشكل الهوليودي ده … 😊 😊
إحنا شعوبنا جميلة قوى …. و هي الشعوب الوحيدة في العالم اللى مش بتتعب عشان تنصب عليها لانك ممكن تستخدم نفس النصباية بنفس أدواتها … و إنت متأكد من نجاحها 😊 ….
إيه ….؟؟؟ مش مصدق ؟؟ …
طب تعالى كده أفكرك بأكتر من نصباية بتتكرر كل مرة و نجحت نجاح باهر 😊 😊
مثلا نصباية الدقن …. عايز تسيطر على شعوبنا … ركب دقن 😊
العثمانلية إحتلوا بلادنا و خربوها بــ نصباية الخلافة … نابليون ماسيطرش على القاهرة غير لما لبس جلبية و نزل الموالد يقف وسط الدفوف و هو بيقول “حاااااي” …. ضابط المخابرات الإنجليزي لورانس العرب ماكسبش ثقة العرب غير لما لبس العقال و أوهم الجميع بإيمانه …. ده حتى هتلر يا راجل ، كسب تعاطف شعوب المنطقة لما سرب إشاعة إنة أسلم و هــ يطلق لحيته و هــ ييجي يحرر بلادنا و ينشر الإسلام عندنا بس هو مخبي على الألمان … الإخوان و الدواعش و أي حد عايز يتحكم في الناس …. و حتي المستريحين اللى بيسرقوا فلوس الناس … هتلاقى العامل المشترك ما بينهم هي الدقن …. و أي حد الى الـ 100 سنة القادمة ، عايز يضرب نفس الناس على قفاها للمرة المليون زي نكتة المسرحية …. مش محتاج غير إنة يركب دقن.
عايز نصباية تانية مكررة …. خد عندك 😊 …. إرهابيين مسجلين على قواعد بيانات الـ CIA …. يختفوا من السجون الأمريكية و يظهروا فجأه في أفغانستان و هم مدربين و متسلحين بأسلحة أمريكية و يسموا نفسهم تنظيم القاعدة … عشان اسماؤهم كانت على قاعدة البيانات الأمريكية للإرهاب.
الإرهابيين اللى كانوا في سجن ابو غريب و بعدها اتنقلوا الى سجون جوانتانامو و سجن الموصل … فجأه يختفوا من جوانتانامو و ينزل خبر بــ هروب جماعي من سجن الموصل عشان تلاقيهم بــ يقودا احتلال 75% من أراضي العراق تحت إسم داعش … و برضوا بسلاح و دعم غربي و اللى ساعات كان البنتاجون بينزل اخبار يقول فيها …. Ops …. الظاهرالطائرات الأمريكية بتاعتنا اسقطت أسلحة بالغلط في أماكن بــ يسيطر عليها داعش 😊 😊
معظم قيادات طالبان اللى ظهرت حاليا … كانوا موجودين في جوانتانامو من شهور قليلة … و إذ فجاءة كدة تنسحب أمريكا من أفغانستان و تظهر الشخصيات دي لتقود المشهد مره أخرى هناك .
طب ياترى بقى الست شخصيات اللى هربوا من السجن ، و اللى تم تنجيمهم بشكل هوليودي من الجيش الإسرائيلي وسط الرأي العام العربي … هــ يظهروا فين !؟ و إييه التكليفات اللى هــ يقوموا بيها الفترة اللى جاية وسط إعادة ترتيب الأوراق ، و تنفيذ امريكا سياسة الإنسحابات من المنطقه لخلق فراغ استراتيجي تقوم بتسليمه للكيانات الإرهابية في مناطق العالم المختلفة ؟؟؟ ….
ياترى هم اللى هــ يقودوا المشهد في غزة وسط بطولات و اساطير مترتبة و لا هــ يكون ليهم دور اكبر خارج القطاع ؟؟ ….
خلونا نتفرج و كلها مسألة وقت و كله هــ يبان …. 😊 و عامة ربنا يخيب ظننا 😊 😊
المجد للثابتين……. وتحيا مصر.
سيبك انت و فرفش و اتفرج على النكته