12 Sep 2021
توقيت إطلاق إستراتيجية حقوق الإنسان .. !!
——————————————–
منذ الإعلان عن تدشين الجمهورية المصرية الجديدة …. و كل يوم بنشوف الدولة المصرية و هي بــ ترسي مبادىء هذه الجمهورية بشكل سريع و فاعل يعبر عن قوة الإرادة السياسية في تنفيذ ما أعلنت عنه و لنتأكد أنها جمهورية جديدة حقيقية حديثة و قوية و ليست مجرد شعارات او إعلانات للإستهلاك المحلي .
و بالرغم من أهمية إستراتيجية حقوق الإنسان كركن أساسي من أركان الجمهورية الجديدة … لكن احنا النهاردة مش هــ نتكلم عن المؤتمر بتفاصيله … و لكن هــ نتكلم من زاوية تانية خالص في ظل تعجب الكثيرين من حضور شخصيات عليها علامات تعجب زي إبراهيم عيسي في الوقت اللى رجع فيه مخرج الأفلام الأبيحة و إستقباله و فرد المساحات الإعلامية له…. مع إن المتابع لأسلوب إدارة الدولة و سياسة الرئيس أكيد مش هــ يتعجب 😊 … لأن الموضوع واضح و إتكرر كتييييير ….. و هو تفكيك و تفريغ أدوات المؤامرة من مضمونها سواء على الدولة المصرية أو على وعي الشعب بأسلوب و بإستراتيجية هادئة و ناعمة و لكن مضمونة النتائج. 😉
شوف يا سيدي …. لو تفتكر من 2005 الى 2011 إن من أهم المواضيع اللى كان بــ يتم إستخدامها لإستهداف المجتمع هي مصطلح 40 مليون مصري عندهم فيرس سي …. و بعدها الغلابة اللى عايشين في العشوائيات … و الموضوعين دول كانت المزايدة عليهم على أشدها و ضاغطة على وعي الشعب …. فأسلوب الرئيس اللى شوفناه كان كالتالي ….. مش هي دي اللبانة و الإسطوانة المشروخة اللى انتوا فاكرين انكوا بالمزايدة بيها مسيطرين على وعي الناس …. طب أنا هــ خلص عليها …. و طلع قال بيقولوا إن فيه 40 مليون مصري مصاب بفيرس سي …. فــ أطلق الحملة القومية للقضاء على فيرس سي و وفر العلاج مجانا و قضي تماما على المرض كأول دولة في العالم و التاريح تقضي على هذا المرض و و تأتي الإشادات الدولية أن مصر أصبحت مثال يحتذي به في هذا المجال و تتسلم الدولة المصرية من منظمة الصحة العالمية شهادة دولية بأنها أول دولة في العالم خالية من هذا المرض تماما …. و نكتشف إن كل عدد المصابين اللى تم علاجهم يادوب 3 و نص مليون مصاب … مش 40 مليون 😊 .
و تدخل مصر على موضوع العشوائيات لكى تحله بشكل فريد تاريخياً ، بإنشاء مئات الآلاف من الشقق المفروشة و تسليمها مجانا بإيجار شهري عادل للأسر الفقيرة و هدم العشوائيات تماما ….. عشان كده مصطلح فيرس سي و العشوائيات اختفي تماما من قاموس اليسارجية و الإسلامجية و كل الدكاكين اللى بيصرف عليها الغرب.
مثال تاني …. موضوع الغلابة و الفقراء …. فــ تم إطلاق مشروع حياة كريمة سواء مئات آلاف الأسر اللى بياخدوا إعانات شهرية أو بالدخول بمشروع القرن لتطوير الريف المصري اللى بيسكن فية 60 مليون مواطن ليغير وجه الحياه هناك تماما …. و اللى بيه هــ يختفي بالتدريج المزايدة بهذا الموضوع.
مثال تاني … أزمة الثقة بين الشعب و الدولة …. فــ مصطلحات زي فنكوش ، و موت يا حمار ، و ابقي قابلني ، و هي فين الإنجازات و المشاريع …. و غيرها … كانت بتستخدم بكثافة و اللى بدأت تختفي تماما من قاموسهم من كثرة الإنجاز على الأرض …. و الناس العادية بدأت تثق و تقتنع إن لما الدولة تقول هــ أخش في الموضوع الفلاني أخلصه …. بقت تقتنع و هي متأكدة إن اللى إتقال هــ يتنفذ و يخلص كما قال الكتاب.
مثال كمان …. الصحة و التعليم …. ليتم تدشين مشروع تطوير التعليم الحديث و بناء و تحديث عشرات المستشفيات المركزية و اطلاق مشروع التأمين القومي الشامل و كلنا شوفنا صمود المنظومة الصحية أمام جائحة كرونا بالرغم من إنهيارها في دول أوروبية متقدمة.
مثال أخير …. كان ناس كتير بــ تتعجب إزاي سايبين ناس مُدّعين على الدين متصدرين المشهد بكل حرية ، يبثون سمومهم في أدمغة الشباب لدرجة أنهم في مرحلة ما …. وصل ان بقى حواليهم هالة من القدسية و ممنوع حد ينتقدهم أو حتي يتناقش في أفكارهم …. و الناس مافهمتش إن الدولة لو واجهتهم بالقانون في الوقت ده …. كانوا هــ يبقوا أبطال و يلتف حولهم المخدوعين أكثر و يتمسكوا بأفكارهم …. لكن لما الدولة ركزت بهدوء على الوعي الجمعي للمجتمع و تركت المجتمع يطهر نفسه بنفسه و أصبح جاهز للمواجهة …. واحد طلع قالك انا كنت بأستخدم أحاديث موضوعة … و التاني قالك أنا مش داعية و لا حاجة ده أنا معايا دبلون 😁 … و التالت قالك و الله ما قلت حاجة و انا مليش دعوة …. و أصبحوا كلهم أضحوكة .
نرجع بقي لموضوع حقوق الإنسان …. فــ بعد فوز المرحوم بايجون مدير أعمال الأستاذ أوباما …. و بعد تفكيك مشروعهم المعتمد على جماعات الإسلام السياسي و تفكيك أدواتهم و سقوطهم المتتالى في المنطقة …. حاول فريق أوباما إنقاذ إستثماراتهم في هذه الجماعات بسحبهم من أمام شعوب المنطقة اللى لفظتهم … و نقلهم الى أفغانستان كحاضنة لهم للمحافظة عليهم و كهدنة مؤقتة لإعادة إستخدامهم مرة أخرى …. و مواجهة دول المنطقة بالحصان الآخر … و هي نصباية حقوق الإنسان و الأقليات و حقوق المثليين و خلافه …. و اللى بــ يقرأ الجرائد الغربية هــ يلاقي زى ما يكون كدة حد صفر لهم بالصفارة لتصدر مقالات شبة يومية عجيبة و مليانة أكاذيب بها هجوم ضارى على الدولة المصرية و كأن العالم كله جنة الله في الأرض و مصر هي الجحيم ….. ناس طيبين قوي يا خال 😊 .
لو أسقطنا طريقة تعامل الدولة المصرية في المواضيع السابقة على هذا الموضوع …. هــ تفهم المشهد و هــ يروح التعجب الخاص بإفساح المجال لشخصيات لفظها الشعب …. و هــ تحس إنه إتقال … مش لعبتكوا الوحيدة دلوقتي هي موضوع حكوك الإنسان !؟ …. طب مصر هــ تتعامل مع هذا الملف بشكل هــ يقطع كل الألسنة و هــ تبقي مثال يحتذي به ، و هــ تيجوا عندنا نعلمكم يعني إييه حقوق إنسان 😊 .
عامة الورقة دي قوية و تعمل شغل حلو على الدول المكسور عنيها و كانت بتعمل شغل في الجمهورية القديمة اللى كانت قبل 2013 … لكن دلوقتي خلاص …. و عشان تعرف قد إييه هي ورقة خايبة دلوقتي ، و قد اييه إحنا رجلنا ثابتة في الموضوع ده …. إفتكر حديث الرئيس السيسي أمام ماكرون و غيرها من اللقاءات لما كان بياخد الصحافة الغربية غسيل و مكوى لما قالهم هو انتوا ماتعرفوش عن حقوق الإنسان غير الإنتقاد بس …. احنا مفهونا ناضج عنكم و أعم و أشمل …. فكرتنا عن حقوق الإنسان هي إن الحياه الكريمة و التعليم و الصحة و المياه النظيفة و السكن و محاربة الإرهاب و غيرها من الحقوق هي المثال الحقيقي لحقوق الإنسان …. لكن لما تجيلي تكلمني عن حقوق الآرهابي فــ ده مش مقبول …. لما تيجي تكلمني عن رفضك لعقوبة الإعدام ….. فأرفضها في بلدك و ده حقك و دي ثقافتك …. لكن ماتجيش عندي تفرض عليا ثقافتك لان دي صورة من صور الدكتاتورية … إحترم ثقافتي و إقبلني عشان أحترم ثقافتك و أقبلك … انتوا مش حتيجوا تعلمونا الإنسانية و إحنا دول أقدم منكم بكتير.
عشان كدة هــ تلاقي المدعوا إبراهيم عيسي مالقاش حاجة يتكلم عنها زي زمان …. ماهو مش هــ يقدر يطنطن بالعشوائيات و لا بتعليم و لا بصحة و لا الغلابة و لا فيرس سي ….. فرمى لينا البوقين المحفوظين المعلبين اللى بــ يجيبوا لايكات في صفوف اليسارجية و الغير قابلين للتطبيق …. بتوع خانة الديانة و معاقبة اللى بيخلف أكتر من عيلين 😊.
و بالرغم من إن اخونا المسيحي أصلا داقق الصليب على إيده و إسمه جرجس و مش محتاج أصلا انه يطلع البطاقة عشان تعرف إنه مسيحي و الموضوع هو سلوك و ثقافة و تربية في عدم التفرقة على اساس الدين …. و بالرغم من إن الرئيس تهكم عليه في موضوع معاقبة اللى يخلف اكتر من عيلين و قاله بالمحسوس …. سيبك من الكلام النظري ده و قول حاجة ينفع تتطبق ….. لكن الواضح إنه نفس أسلوب الدولة في تفكيك ادوات الأستاذ اوباما 😊 .
انتوا مش جايين تعملولي فيها المتنورين بتوع حكوك الإنسان ….. تعالي على حجر عمو يا حبيبي …. و انا هــ أطلّعك على المسرح و هــ أسلّط عليك الأضواء …. و هــ أكشف فراغ أفكاركم …. و أوعدكم أنه ييجي اليوم اللى الناس تلاقيكم طالعين واحد بيقول انا مليش دعوه ده أنا دبلون …. و التاني ممكن تلاقيه ماشي ناكش شعره في الشارع و العيال بـ تحدفه بالطوب 😊 .
المجد للثابتين……. تحيا مصر.