12 Oct 2021
رجعنا لإسطوانة التعليم – البيضه و لا الفرخة
———————————————
زي ما توقعنا سابقا …. إن بعد استتباب الأمور في المرحلة الثانوية بمراحلها الثلاث بعد أن أصبحت أمر واقع …. نقلت ميليشيات اللجان الإلكترونية تركيزها بمنتهي الشراسة على المرحلة الإبتدائية …. بداية بمهاجمة المحتوى التعليمي الجديد للسنة الرابعة … أو بإستخدام المشكلة الحقيقية المزمنة اللى محتاجة على الأقل 15 سنة لحلها و هي كثافة الفصول.
جروبات الماميز و صحف ألكترونية و محطات إعلامية بدأت تنشر صور لكثافة عالية في بعض المدارس و صور تانية مترتبة لفصل خالى تماما من التخت و صورة تانية إدعي فيها مصورها إنها لطلاب مدرسة جايبين علم فرنسا بدلا من علم مصر … و غيرها من الصور الكتير اللى عليها تعليقات كلها صريخ و شحتفة و كربلائيات و إستغاثات … و كأن المدارس كانت فلة شمعة منورة و الكثافات طول عمرها قليلة … و إذ صحينا الصبح إتفاجئنا بالمشكلة دي !!!!!
و عشان يبقي كلامنا واضح …. لا إحنا داخلين ننفي وجود مشاكل مزمنة في كثافات فصول الإبتدائي و لا حنقول ان الصورة وردية …. لكن إحنا حنتكلم في المفيد … في أصل المشكلة و إية سببها الحقيقي و إية الحل الجذرى ليها …. لأن أي كلام تاني حيكون من قبيل النفاق الإجتماعي و الشعارات الحنجورية الشعبوية اللى بيجيب لايكات و بيبسط الناس … و إحنا عمرنا ما كنا كده و لا حنكون كده …. فسواء كلامنا عجبك او ماعجبكش …. ده مش حيغير حاجة من الحقيقة اللى على الأرض اللى واضحة و ناس كتير بتتغافل عنها .
أصل المشكلة الحقيقية تتلخص في جملة واحدة ” إحنا كتير و بنخلف كتير” … نقطة و من أول السطر…. و ماينفعش نقعد نزيد بنفس المعدل و نقعد نزرب في عيال بمبدأ إن “يا أخي المؤمن العيل بيجي برزقه و بمدرسته و الخلفة الكتير واجب ديني” … و بعد كده نرجع نعيط و نقول مفيش فصول و مفيش تخت و فين المدارس…. و لأن دايما اللى على البر عوام …. الكل بينظّر و عمال ينظّر و ينشر حلول من دماغة و كأنه عبقري زمانه و جايب التايهه ….. و عشان الكلام يكون واضح … خلينا نتكلم في نقط محددة :-
س1:- الوزارة و الوزير مقصر و لييه مابنوش مدارس جديدة … الكود العالمي ان كل 700 متر يكون فية مدرسة ؟
ج1 :- يبنوها فين … إذا كان معظم الناس مش بتلاقي اصلا مكان في الحي بتاعها عشان تركن فيه عربيتها … و العمارات اللى كانت 4 ادوار اتهدت و اتبني مكانها ابراج ضخمة و نفس عدد الفصول اللى في الحي بقي بيخدم 4 اضعاف عدد سكان الحي اللى كان بيخدمها سابقا…. و الحل الوحيد اننا نطلع من الوادي الضيق لمجتمعات جديدة مخططة …. لان مفيش مكان اصلا ممكن نبني فيه مدرسة … إلا إذا كنت حضرتك موافق ان بيتك يتهد و يتاخد ارضه يتبني عليها مدرسة…. و ده طبعا استحالة انك توافق عليه…. خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س2.- ماهو بدل الكباري و الطرق و المونريل و القطارات … ما ياخدوا الفلوس دي يبنوا بيها مدارس ؟
ج2:- مهو حضرتك الطرق و المواصلات و بناء المدن الجديدة دي … عشان نطلع من الوادي الضيق لان مافيش مكان يتبني فيه مدارس جنب بيت حضرتك … و لو اتبني مدارس خارج المدن … حتحتاج الطرق وسائل المواصلات دي عشان عيالك تقدر توصل بأمان للمدارس اللى هناك … خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س3:- يعني مش فلوس الأبراج و الفلل و القصور و الفنادق السبع نجوم اللى في العاصمة الإدارية و العلمين و الجلالة فلوسها حاضرة … و المدارس هي اللى عاملة مشكلة؟
ج3:- و مين قالك إن كل اللى قلت عليه ده من ميزانية الدولة أصلا أو انها صرفت عليه مليم واحد أو ان المدن الجديدة دي للأغنياء فقط …. ده إستثمار … الدولة باعت الأبراج و الشقق الفاخرة دي بمليارات …. و أخدت فلوسها أنشأت بيها المدن الجديدة دي بكل أحياؤها و خدماتها بما فيها أحياء كاملة داخل المدن دي للإسكان محدود الدخل و المتوسط و اسكان الشباب و المناطق الصناعية و التجارية داخل هذه المدن و كمان مدارس كتير عشان تخدم سكان هذه المدن …. يعني حل جذري للمشكلة اللى حضرتك بتعاني منها و كمان بدون إنها تتكلف مليم واحد من ميزانيتها…. خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س4:- طب بالذمة مش اولي من المشاريع بتاعة المصانع و المزارع اللى عمالين ناخد قروض ليها … كنا اخدنا القروض دي و بنينها بيها مدارس؟
ج4:- اقتصاديا مينفعش تاخد قروض عشان تبني مدرسة …. لكن الصح انك تاخد قرض تعمل مشروع انتاجي يسدد القرض و يدخل عائد تبني بيه المدرسة اللى انت عايزها …. و بعدين ماهو المشاريع دي اللى بيشتغل فيها اولياء امور الطلاب دول اللى من مرتباتهم بيقدروا يعلموا و يأكلوا عيالهم …. و لا تحب نقفل المصنع او الشركة اللى انت شغال فيها و نبيع المصنع و من تمنه نبني مدرسة ؟؟ … خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س5:- يعني الشعب هو اللى غلطان ؟؟ … ماتروح تشوف الصين اللى عددها مليار و نص و محدش بيشتكي و إقتصادها أكبر إقتصاد في العالم ؟
ج5:- كلامك صح … إقتصاد الصين كمان سنتين حيكون أكبر إقتصاد في العالم … بس مين قالك محدش بيشتكي ؟ 😊 …. يا تري تعرف الشعب هناك عايش ازاي ؟ … طب تعرف إنه من أفقر شعوب الدنيا لانه عايش و بينتج الإنتاج ده كله في عيشة غير آدمية و عايش عيشة العبد لأنه بينام على كرتونة على الأرض في مصنعه طوال 11 شهر و مش بيرجع يشوف أهله و عياله غير شهر واحد في السنة في الأجازة الصينية …. و مرتباتهم يا دوب بتكفي أكل و شرب بالعافية …. و اللى بيتكلم بياخد رصاصة بين عنيه … و اللى مش بيشتغل بيموت من الجوع او الدولة بتقتله و بتحمل تمن الرصاصة لأهله …. طب تعرف هم قضوا على الكرونا ازاي هناك و هل بالقضاء على الفيرس ام بالقضاء على المرضي نفسهم ؟؟؟ … طب تعرف ان تطبيق قانون الطفل الواحد ايام الثمانينات هناك كان بيتم اعدام الأب في حالة انه خلف عيل تاني ؟؟؟؟ طب تعرف إن بالرغم من حجم الإقتصاد الصيني الضخم ده … لما تيجي توزعه على التعداد السكاني الرهيب ده … مايجيبش تمنه ؟؟؟؟ طب تحب اكلمك عن الهند و مستوي المعيشة فيها عامل ازاي بسبب الزيادة السكانية.؟؟؟ … خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س6:- هو كل شوية تقول الخلفه … أنا ماليش دعوة … أنا بدفع ضرايب و مخلف طفلين بس … فين حقي؟
ج6:- ممكن يكون كلامك صح … إنك مواطن ملتزم بتدفع ضرايبك و مخلف طفل او اتنين بس …. بس غيرك كتييييييير لا بيدفع ضرايب و لا محدد النسل و مخلف 8 او 10 عيال …. بدليل ان دفعة الثانوية العامة السنة دي اللى اتخرجت كانت 650 الف طالب … و دفعة أولي ابتدائي اللى دخلت مكانهم 2.5 مليون …. عرفت بقي الفصول زادت ليه . …. و أحب أبشرك إن الدفعة اللى داخلة KG السنة اللى جاية حيبقوا 4 مليون طالب 😊 …. يعني عايزين عدد مدارس و فصول أضعاف اللى موجود حاليا….. … خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س7:- مهو الحل ساهل خالص …. المدارس ترجع فترتين و تقسموا عدد الطلاب على مدار اليوم أو يتعمل 3 ترمات … إنتوا بس اللى مش بتفكروا ؟
ج7:- ياريت تراجع حضرتك النقطة السابقة …. بقولك الطلبة اللى حتخش السنة الجاية ضعفين عدد الطلبة اللى دخلوا السنة دي …. يعني حتي لو ضاعفت عدد الفصول بتقسيم الطلبة على فترتين …. برضوا حنرجع محلك سر لان العدد اللى داخل ضعف العدد الحالى اللى احنا أصلا بنصرخ منه …. و بعدين ماهو التعليم حضرتك ليه معايير … و الطالب لازم ياخد عدد محدد من الساعات التعليمية …. و لو حنقسم الطلبة على 3 ترمات و فترتين في اليوم …. ياريت حضرتك بقي ماتصرخش لما تلاقي عدد شهور الدراسة في السنة بقت 11 شهر و شهر واحد بس أجازه …. … خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س8:- طب و ليه الدولة ماتنبهتش للمشكلة دي من زمان و بنت مدارس كتييييير الكام سنة اللى فاتت ؟
ج8:- أصلا كثافة الفصول و الصور المتداولة كل سنة بنشوفها من قبل 2005 … و موضوع ان الفصل فيه 100 طفل دي كلنا كنا بنشوفها من 15 سنة … مفيش جديد حصل …. اللى حصل فعلا إن الدولة كانت في سباق عشان تبني مدارس جديدة و قدرنا نوصل الى 60 الف مدرسة حاليا بها مليون و 350 الف فصل بيدرس فيهم السنة دي 24 مليون طالب …. و كل سنة الدولة بتضيف 14 الف فصل جديد… و مع ذلك لسه فيه عجز 250 الف فصل … انت مستوعب الرقم ؟؟؟ …. يعني لو الشعب قبل بالتراضي انه يتم هدم 250 الف منزل عايشين فيه عشان يتعمل مكانها فصول …. محتاجين حوالي 130 مليار جنية. … خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س9:- طب و ايه الحل دلوقتي … يعني الشعب السبب في كل ده؟
ج9:- مش إنتوا اللى سلمتوا نفسكوا لشوية الدقون اللى خربوا دماغكم بموضوع ان العيل بيبجي برزقه و مدرسته … مش انتوا اللى بتصرخوا من كثافة الفصول في مدارس مجانية و بتدفعوا سنويا 48 مليار جنية لمدرسين معدومين الضمير بيحطوا عيالكم في سناتر كثافتها اكتر بكتيييييير من الفصول و كان ده على قلبكم زي العسل و محدش بيشتكي منه …. و لما الدولة غيرت المناهج و عملت محتوي تعليمي مجاني الكل صرخ و قاوم التعليم الحديث العلمي المجاني و لسه عايز يرمى نفسه في حضن مافيا الدروس و السناتر ….. الشعوب دايما بتدفع تمن خياراتها …. و الحل موجود لكن حياخد وقت …. لازم نغير ثقافتنا في الخلفه و الزيادة السكانية و تدعيم المشروع القومي لتحديث التعليم …. و مواجهة مافيا الدروس الخصوصية و السناتر اللى بيقاوموا بكل ما أوتوا من قوه للحفاظ على بيزنس قوامه 48 مليار جنية سنويا بيتاخد من جيوب الشعب و حتي مش بيدفعوا عنها ضرايب. … خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
س10:- يعني انت عاجبك الصور اللى اتنشرت دي ؟
ج10:- الصور دي هي نفس الصور الموجوده بقالها 15 سنة و مفيش حاجة اتغيرت …. لاننا دايما مش بنناقش اصل المشكلة و لكن بنستخدمها سياسيا حسب الهوي و الحب و الكره …. و عشان اثبتلك ….. مثلا الصورة بتاعة العلم اللى اتقال عليها انها علم فرنسا …. فالصورة مغلوطة ….. الولاد اجتهدوا و عملوا فعلا علم مصر لكن اللون الإسود كان باهت و ده باين في صورة المقال …. لكن محدش فهمهم إن عدلة العلم لازم تكون ناحية منصة المدير او جابلهم نسر يضعوه على العلم …. لكن كان لازم اللى يصور الصورة يطلعها بالشكل ده عشان يبقي الموضوع سكر و عسل و دمه خفيف … خفوا انتوا بس الخلفة شوية اللى هي أصل كل المشاكل و ارحموا نفسكوا و مجتمعكوا.
الكل بيعاني و الكل متفق على ده …. لكن فرق بين حد بيتاجر باوجاع الناس عشان مصالحه الشخصية او السياسية ….. و بين حد جايب مرايا و بيناقش المشاكل باسبابها الحقيقية لمحاولة حلها من جذورها.
المجد للثابتين……. تحيا مصر.