10 Dec 2021
أقوى شخص فى مصر !!
———————–
الباشمهندس عادل .. هو فعلا أقوى رجل فى مصر
الباشمهندس عادل .. هو أكبر مثال للتحدى وقوة الإرادة والعزيمة والإصرار ..
الباشمهندس عادل من ساعة ما إتولد وهو بــ يعانى من شلل دماغى .. خلاه غير قادر على المشى بشكل طبيعى .. وجسمه بيعمل حركات لا إرادية من غير مايكون له أى سيطرة عليها .. وكان بيعجز حتى عن إنه يمسك القلم علشان يكتب ..
كان وهو صغير بيقعد يبكى وهو بــ يبص للأولاد اللى فى سنه .. ويقول لييه أنا مش زى دوول .. و ده كان حافز له إنه يبقى أحسن من الجميع
الباشمهندس عادل إتعلم فى مصر …. فين يافندم !!؟ .. أيوة فى مصر ..
الباشمهندس عادل إتعلم فى جامعة حكومية مصرية … بتقول فين يافندم !؟ .. أيوة فى جامعة حكومية بتاعة التعليم اللى واخد ترتيب أخر دولة فى المجرة الكونية ده .. زى ما البعض بيقول .. عارفينه ؟؟
الباشمهندس عادل إتخرج سنة 2007 … إمتى يافندم !؟؟ .. أيوة سنة 2007 .. يعنى مش أيام التعليم فى زمن عمو الملك اللى بــ يحلو للبعض التباكى علي أيامه ومصمصة الشفايف عليه طول الوقت !
الباشمهندس عادل بعد التخرج إشتغل فى كذا شركة مصرية … وبعدها جاتله الفرصة إنه يشتغل كمهندس برمجيات فى أكبر الشركات العالمية !!
التحديات فى حياة الباشمهندس عادل ما بتنتهيش .. من أول حياته الصعبة وإصابته بشلل دماغى منذ طفولته .. لحد وفاة زوجته وحب عمره وهى حامل فى بنته الوحيدة .. و وصولا لإصابته بسرطان المرئ علشان يدخل ضمن محاربى المرض اللعين ده !
و هو قال كدة للدكتور المعالج .. قال له أنا عايزك تحارب معايا .. وخلينى أحارب لحد أخر وقت .. أنا شخص محارب
لكن أهم كلمة قالها .. “أنا راضى” .. دى الخلاصة .. و دى الحكمة اللى بيفتقدها كثير من الناس
الباشمهندس عادل هو حقيقى شخص مقاتل … وبيقدم من خلال حياته درس لينا كلنا .. فى الصبر والرضا والمثابرة والعزيمة والإصرار والرغبة فى النجاح
الباشمهندس عادل هو فعلا حجة على أى شخص فاشل بيلعن الظروف طول الوقت وبيعلق فشله على شماعة الأخرين .. شماعة الدولة .. شماعة الحكومة .. شماعة أعداء النجاح .. أو حتى شماعة الإعاقة
الباشمهندس عادل إتربى وعاش فى نفس الظروف اللى عاش وإتربى فيها كثير من الأصحاء .. لكنه نجح بتفوق .. وهم فشلوا بتفوق .. لأن الفرق بينه وبينهم ، إنه ماسابش نفسه للإحباطات .. ولا إستسلم وعلق فشله على أكتاف غيره … ماعملش زيهم وقعد يولول ويلطم .. ويعيش فى جو من الكربلائيات .. علشان يثبت لنفسه إن فشله ماكانش بإيده … وإن لو الظروف مختلفة أو البلد مختلفة ، كان بقى بل جيتس أو إيلون ماسك .. بس ياعينى هى الظروف والدولة والحكومة وأعداء النجاح والقطة السودة اللى بتعدى كل يوم من قدام باب البيت والمخلوقات المريخية اللى بيكسروا فيه .. كل دوول اللى خلوه فاشل
ياريت تشاهدوا الفيديو .. علشان تشوفوا كم الإصرار والقدرة وكمان الرضا اللى تجمعوا فى الشخص ده
الباشمهندس عادل أثبت بالفعل إن الإعاقة عمرها ماكانت فى الجسد …
الإعاقة الحقيقية هى إعاقة النفوس .. إعاقة الفكر الدونى المنحرف اللى بيسكن الرؤوس
كل التحية والتقدير والإجلال والتبجيل للباشمهندس عادل
وشكر حقيقى للشخص اللى عمل الفيديو ده … وهتلاقوا أصل الفيديو والمنصة اللى أطلقته فى اللينك التالى لأن الفضل لازم ينسب لأهله.