21 Dec 2021
الغرب .. والكيل بمكيالين .. !!
—————————-
ما أشبه اليوم بالبارحة …
◀️ لما الأكراد فكروا ينفصلوا عن العراق ويعملوا دولة .. الغرب إعتبر الكلام ده حرية .. ولما البرادعى إشتغل على ملف النوبة وحرض النوبيين على الإنفصال عن مصر .. الغرب بجماعاته الحقوقية إعتبروا ده حق تقرير المصير .. لكن لما حصلت مظاهرات فى إسبانيا تطالب بإنفصال مقاطعة كتالونيا عن أسبانيا .. تم إعتبار ده نزعة إنفصالية .. ونزل الأمن فرم المتظاهرين ودغدغوا مكاتب حقوق الإنسان اللى إعتصم فيها بعض النشطاء !!
◀️ لما نزلت مظاهرات اصحاب السترات الصفراء فى فرنسا وبعض العواصم الأوروبية .. تم إعتبارها مظاهرات تخريبية والأمن الفرنسى نزل فرم المتظاهرين وسحلهم .. واطلقوا على المتظاهرين فى البيانات الحكومية وحتى فى الصحف العامة لفظ المخربين .. لكن لما المظاهرات كانت بــ تنزل فى مصر تكسر وتحرق وتخرب .. كانوا بيسموها مظاهرات سلمية .. !
◀️ لما المتظاهرين إقتحموا مبنى الكابيتول الأميريكى إعتراضا على نتائج الإنتخابات الأميريكية الأخيرة واللى تم تزويرها بشكل فج .. قام الأمن بالتصدى للمتظاهرين وضربهم وسحلهم .. وتم إستخدام الرصاص الحى .. وطلعت بيانات من الدولة بــ تندد باللى بيحصل وإتهموا المتظاهرين بإنهم خونة ومخربين .. لكن لما المتظاهرين فى مصر إقتحموا أقسام الشرطة ومبنى وزارة الداخلية والمتحف المصرى والمجمع العلمى وحاولوا يقتحموا مبنى وزارة الدفاع .. كان الغرب بيحذر من المساس بالمتظاهرين ، على إعتبار إن اللى بيحصل ده كله حرية تعبير عن الرأى !!
◀️ و على نفس النهج .. ولأن الغرب سياسته مش بتتغير .. فــ من يومين لما كنا على موعد مع النطق بالحكم فى قضية إتهام بعض النشطاء بالتحريض ضد الدولة ونشر أخبار كاذبة والترويج لها بهدف تكدير السلم المجتمعى .. وقبل حتى إنعقاد المحكمة .. قامت الخارجية الألمانية بنشر بيان بتحذر فيه من إصدار حكم إدانة ضد النشطاء .. وكأنها بتاخد خطوة إستباقية للتأثير على القضاء المصرى .. على إعتبار إن ما قام به النشطاء يندرج تحت بند حرية التعبير .. وكمان بتطلب من الدولة إنها تتدخل و تاخد موقف ,, وهى بتعبر عن قلقها من حالة حقوق الإنسان فى مصر .. فى تجاهل تمام لمبدأ إستقلالية القضاء والفصل بين السلطات !!
فى نفس الوقت اللى واقعة الناشطة الألمانية #أورسولا_هافربك البالغة من العمر 91 عاما لسة ما بردتش .. ومانسيناهاش .. بعد إدانتها فى عام 2017 بتهمة التحريض .. بسبب إنكارها لمحرقة “الهولوkوsت” فى معسكر أوشفيتز .. ومش كدة وبس .. لكنه من المعتاد في ألمانيا إطلاق سراح المساجين اللى قضوا ثلثي فترة عقوبتهم .. لكن محكمة الولاية في بيلفيلد مكان سجن الناشطة ، قررت عدم الإفراج عن هافربك بدون تقديم حيثيات وأسباب لقرارها ده
طب هو مش ده حرية رأى وحرية تعبير برضوا وإلا إييه يا حاجّة ألمانيا !!؟؟
ولأن مصر مافيش على راسها بطحة .. وبتتعامل مع كل القوى الدولية من مركز قوة .. وبأسلوب الند للند .. فــ الخارجية المصرية ردت ببيان قوى .. تناقلته كل وكالات الأنباء العالمية زى CNN و BBC .. قالت فيه إنها “تعتبر هذا الأسلوب الذي ينطوي على تجاوزات غير مقبولة تدخلاً سافرًا وغير مبرر في الشأن الداخلي المصري، ويُصادِر على مسار قضائي دون دليل أو سند موضوعي .. وإنه من المُستغرَب أن تطلب الحكومة الألمانية احترام القانون، وتدعو في ذات الوقت للتدخل والتأثير على أحكام القضاء المصري .. وتابع البيان المصرى .. “أنه من الأحرى أن تلتفت الحكومة الألمانية لتحدياتها الداخلية بدلاً من فرض وصايتها على الغير” ..
يعنى من الأخر كدة خليكم فى نفسكم وبلاش مزايدات الله يرضى عليكم علشان اللى بيته من إزاز !!!
والجدير بالذكر إن قرار المحكمة المصرية خرج إمبارح 20 ديسمبر 2021 بإدانة الأسماء المشار إليها فى البيان الألمانى .. و أصدرت المحكمة حكماً بالسجن لمدة خمس سنوات على المدون والناشط علاء عبد الفتاح، وأربع سنوات على كل من الحقوقي محمد الباقر، والصحفي محمد ابراهيم رضوان الشهير بـ “أكسجين”
القضاء المصرى قضاء مستقل ونزيه ، ومش بيقبل وصاية من حد .. والدولة مش بتتدخل فى أحكامه .. وفوق كل ده .. بترفض الربط بين أحكامه وبين المسار السياسى للعلاقات بين الدولة المصرية وبين أى دولة مهما كان حجمها ….. أو مكانتها …. لأن مصر مافيش على راسها بطحة .. ولا عليها فواتير لحد ..
هو بس الغرب ياريت يبطل سياسة الكيل بمكيالين , ويخف من الأمراض اللى بيعانى منها .. وكل شيئ هيبقى كوبس وعال العال
بالشفا بإذن الله ..
وحفظ الله مصر برئيسها وجيشها وشعبها 🙏