الملك المصرى .. !!

08 Jan 2022

الملك المصرى .. !!

——————-

إمبارح الصفحة الرسمية بالعربى لنادى ليفربول وصفت إبننا اللاعب المصرى محمد صلاح بــ “الملك” ونشرت بتقول “الملك محمد صلاح في القائمة المختصرة النهائية لجائزة الأفضل المقدمة من الفيفا برفقة البولندي روبيرت ليفاندوفسكي والأرجنتيني ليونيل ميسي. 🙌

الأجمل بقى إنه بمناسبة مشاركة صلاح مع منتخب مصر فى بطولة كأس الأمم الأفريقية اللى هــ تنطلق فعالياتها بكرة فى دولة الكاميرون .. أثارت شركة “أديداس” الشهيرة، ضجة كبيرة عبر مواقع التواصل الاجتماعي بعد ما كشفت النقاب عن الحذاء التاريخى الخاص اللى هــ يرتديه إبننا “مو صلاح” لأول مرة في بطولة كأس الأمم الإفريقية .. واللى هــ يحمل توقيع قائد المنتخب المصري.

وبحسب الصور اللى نشرتها صحيفة «ذا صن» البريطانية .. واللى بتظهر تواجد علامة صلاح الشهيرة “MO” على الحذاء الأيسر، فى حين بــ يحمل الحذاء الأيمن علامة التاج الملكي .. والإثنين هــ يكونوا مطبوعين بمية الذهب.

أديداس أعلنت عن إنها هــ تطرح 1069 نسخة فقط للبيع من الحذاء ده .. فى إشارة للرقم القياسي اللي بــ يسعى نجمنا المحبوب للوصول إليه لتصدر ترتيب هدافي منتخب “الفراعنة” عبر تاريخه والمسجل بإسم عميد لاعبى العالم السابق .. القناص حسام حسن برصيد 69 هدف …

صحيح صلاح لحد دلوقتى بــ يحتل المركز الثانى فى تاريخ هدافى المنتخب ، برصيد 45 هدف .. ويمكن يكون من المستحيل إنه يوصل للرقم القياسى فى البطولة القادمة .. لكنها بالفعل لفتة جميلة من شركة “أديداس” .. بــ تدل على المكانة الرياضية الدولية اللى وصل لها الملك المصرى.

ياجماعة مكانة صلاح العالمية بالنسبة لللاعبين المصريين وللتاريخ الكروى المصرى أصبحت خارج أى مقارنات لأن إجمالى اللى حققه صلاح لم يستطع تحقيقه أى لاعب اخر فى تاريخ اللعبة فى مصر .. ووضعه فى أى مقارنة مع أى لاعب أخر يعتبر تقليل من مكانة صلاح وإمكانياته الفنية والبدنية .. وحتى الدينية و الأخلاقية وولائه وإنتمائه لبلده مصر.

وبرغم الواقع اللى بــ يفرض نفسه … ولإن صلاح مش بتاع أى شوهات أو مزايدات .. بتلاقى بعض المنتمين للقطيع شايفين إنه لسة ماوصلش لمكانة ناس تانيين …

تسأله .. طب لييه ياعم الحاج !؟ …

 يقولك .. أصله ماجابش جون فى الصفاقسى !! 😅😅

ربنا يكرمك يا إبن مصر .. وبالتوفيق دايما يا أبومكة .. وبإذن الله تنال التقدير اللى تستحقه وتفوز بلقب أفضل لاعب .. لأنك فعلا تستحقه .. سواء من حيث المستوى الرياضى أو الأخلاقى .. وحتى لو ده ماحصلش .. وكلنا عارفين إن المال الرياضى بيلعب دوره فى الجوائز اللى زى دى .. فــ يكفيك إنك قدرت تفرض نفسك بمهاراتك وإمكانياتك .. وتكون واحد من أفضل 3 أسماء فقط مرشحين على مستوى العالم لنيل اللقب ! 💚

ربنا معاك ويوفقك دايماً .. وتفضل ترفع علم مصر فى كل مناسبة رياضية عالمية يا إبن مصر يا أصيل

حفظ الله مصر برئيسها وجيشها وشعبها 🙏

لمتابعة تعليقاتكم