09 Jan 2022
الراحلون
———-
بداية ساخنة حزينة لسنة جديدة نسأل الله فيها السلامة ..
فى خلال أيام .. فارق هذه الحياة الكاتب الصحفى اللامع #إبراهيم_حجازى .. ثم الملحن الرائع #أحمد_الحجار .. ثم الفنانة الرقيقة #مها_ابوعوف .. ثم المقاتلة الباسلة المستشارة #تهانى_الجبالى .. ثم الاعلامى المشاكس #وائل_الابراشى !!!
تتفق أو تختلف سواء سياسياً أو فنياً أو إعلامياً مع أسماء الشخصوص الراحلة .. ولكن مما لاشك فيه إن هذه الأسماء ساهمت فى تشكيل وعينا الفنى والسياسى والفكرى على مدار سنين طويلة … هذه السنين التى فرضت نفسها وأصبحت جزء من عمرنا وذكرياتنا التى أصبحت ترحل فى صمت يوماً بعد يوم …
كنت بتنتظر ظهور الكاتب الراحل ابراهيم حجازى فى البرامج علشان تسمع تحليلاته العاقلة .. واللى منكم عاصر ظهور مجلة الاهرام الرياضى .. يفتكر المتعة اللى كنا بنشعر بيها وإحنا بنتصفح مقالتها وابوابها .. واللى كان السبب فى ظهورها للنور هو الصحفى الراحل !
كنت بتنتظر يوم نزول ألبوم مطربك المفضل .. وتعجبك اغنية أو ماتعجبكش .. علشان تفاجئ وانت بتقلب فى ظهر الألبوم إن الأغنية من ألحان الملحن احمد الحجار !
كنت بتتفرج وتتابع فرقة ال 4M .. وبتردد بسعادة الحانها واغانيها اللى كانت ثانى أبرز اعضائها هى الفنانة مها ابو عوف … أو تتفرج على افلام ومسلسلات درامية أثرت فيك وفى وجدانك وكان بيبقى جزء من أبطال العمل هى الفنانة الراحلة !
تفتكر حالة الغليان فيما بعد 2011 والصراع الداخلى وتصاعد التيار الاخوانى بقوة .. علشان تظهر شخصية المرأة الحديدية المستشارة تهانى الجبالى وتاخد مواقف صلبة .. وتقف بقوة فى وش العصابة اللى كانت عايزة تهيمن على البلد وتهدم القانون ومؤسسة القضاء .. لدرجة انهم عملوا تعديل دستورى فى تكوين المحكمة الدستورية العليا علشان يطيحوا بيها خارج المحكمة … وعلشان كدة.. وسواء اتفقت أو اختلفت مع مواقفها وفكرها السياسى .. لكن تأثيرها هيفضل ماثل فى أذهاننا لأنه كان فى فترة ماتتنسيش ابدا من عمرنا أو عمر بلدنا !
وبغض النظر عن اتفاقك او اختلافك مع المنظومة الإعلامية وممثليها … لكن هيفضل الراحل وائل الإبراشي أحد الاعلاميين المثيرين للجدل واللى يتفق معه البعض لحد العشق .. ويختلف معه البعض الاخر لحد الجنون والغضب .. لكنه شئنا أم أبينا كان جزء من الأداء الاعلامى اللى أثر فينا على مدار سنين بحلوه ومره ..
المقال ده يمكن يكون مفاجئ لكثير من اصدقائنا لأنه خارج إطار ونوعية المقالات ذات النكهة السياسية اللى اتعودتم عليها .. وعلشان كدة إحنا مش هنعتبر ده مقال .. لكننا هنعتبره نوع من المشاركة الوجدانية أو الفضفضة اللى بنفضفض بيها مع اصدقائنا .. واللى أصبحت علاقتنا بيهم هى علاقة صداقة حقيقية .. نتمنى أن تدوم وتستمر فى حب هذا الوطن … #مصر ..
رحم الله كل من رحلوا واسكنهم فسيح جنته …
ونسأل الله السلامة للجميع …
وربنا يرحم جميع امواتنا … ويحفظ كل عزيز لدينا جميعا
حفظ الله مصر برئيسها وجيشها وشعبها 🙏