2 Feb 2016
الدولة هــ تستقر ، رغم الهرى المستمر
—————————————-
بقالى كام يوم وبمنتهى الهدوء ، ماليش شغلانة غير المتابعة ، والفرجة ، و ….. والضحك .. وإكتشفت إن الواحد لما يصحى الصبح وبعد مايحمد ربنا على الستر والصحة والأمن والأمان ، وإن بلدنا لسة واقفة على رجليها ، لازم يسأل نفسه سؤال مهم جداً … “هو الهري على إييه النهاردة =D =D .. ومش كدة وبس .. ده أنا جالى إحساس قوى وأنا بــ أرسم صورة تخيّلية ، إن الرئيس السيسى بعد ما بيصحى الساعة 5 الصبح لازم يسأل ويعرف “هو الهري على إييه النهاردة !!؟؟” .. وبعد ما يعرف .. أتخيله بيبتسم وهو قايم يلبس هدومه وبيقول “إستعنّا على الهري بالله” 🙂 🙂
اليومين اللى فاتوا بس كان فيهم كمية من الهري الغير طبيعى سواء على مواقع التواصل الإجتماعى أو المواقع الإخبارية أو الفضائيات وبرامج التوك شو اللى إستهلكت ساعات بمئات الألاف من الجنيهات علشان تتكلم عن الهري ده .. وإشى ناس بتزعق وبتصرخ وعروق رقبتها تنفر وعنيها تبظبظ برة .. وإشى محللين ، كل واحد فيهم رافع حاجب ، ومنزّل التانى ، ويشاور بصباعه وهو بــ يتحفنا بأرائه اللوزعية .. وإشى إعلاميين طالعين فى البرامج بتاعتهم وكل واحد فيهم ماسك المايك لواحده لمدة ساعتين علشان يقول كمية كلام مش عارف بجد بيجيبوه منين !! …
والكلام كان كتير أوى ، بدايةً من موضوع أحمد مالك وشادى ، واللى علّقنا عليه فى صفحتنا مجرد تعليق مقتضب .. لموضوع إسلام جاويش اللى ناس كتيرة صدّعتنا علشانه ، وفى الأخر تم إخلاء سبيله .. لموضوع مذبحة إستاد بورسعيد ، والكلام عن اللى قاله وعاده وعمله شباب الألتراس مابين مؤيد ومعارض .. للى بيقوله وبيعمله توفيق عكاشة .. وغيره وغيره من الهري .. وأخر حاجة كانت مكالمة الرئيس السيسى إمبارح للإعلامى عمرو أديب ، واللى الناس سابت المكالمة باللى فيها ، والهدف المباشر والغير مباشر منها .. وقعدوا يتخانقوا على حاجة واحدة بس وهو الرقم (50) ….. أاااه بجد زمبؤلوكم كدة 🙂 .. الناس من إمبارح بتقطع بعض مابين مؤيد ومعارض ومهاجم ومدافع عن موضوع إن الدولة بتعانى بقالها 50 سنة !! 🙂
وفى وسط كل الهري ده ، لما تبص كدة على يمينك ، تلاقى الدولة بتتحرك …….
هــ تلاقى بيتم توقيع بروتوكولات اتفاقيات بين مصر وروسيا لانشاء المنطقة الصناعية الروسية واللي استقر علي اقامتها بمنطقة شرق بوسعيد علي مساحة 2 مليون متر مربع٬
هــ تلاقى اتفاق بين الصندوق الروسي للاستثمارمع عدد من البنوك المصرية لايجاد آليات لتمويل المشروعات الروسية المنتظر اقامتها بالمنطقة الروسية بمصر
هــ تلاقى توقيع روسيا ومصر مذكرة توريد طائرات ركاب روسية من طراز “سوخوي سوبرجيت” (SSJ-100) لمصر .. وقال وزير الصناعة والتجارة الروسي، دينيس مانتوروف، للصحفيين في القاهرة إنه تم توقيع مذكرة توريد أربع طائرات “سوخوي سوبرجيت” هــ تستأجرهم مصر ، وبعدين سيتم توقيع عقد توريد 6 طائرات أخرى فى وقت لاحق
هــ تلاقى قرب إنتهاء مشروع ميناء شرق بورسعيد واللى هــ يغير ترتيب الموانى الملاحية على مستوى العالم
هــ تلاقى إستمرار العمل دون توقف فى مشروعات أنفاق تحت القناة ، واللى هــ تربط سيناء أكثر وأكثر وهــ تكون أساس لمشروعات تنمية سيناء
هــ تلاقى بداية تفعيل التقارب المصرى الصينى فى مشروعات محور القناة والمنطقة اللوجيستية !!
وقريب جداً هــ نسمع خبر الانتهاء من اكبر منظومة صوامع غلال علشان تصبح مصر بورصة حبوب العالم .. بالإضافة للإنتهاء من مجموعة محطات توليد الطاقة الكهربائية
يعنى بلا ألتراس ، بلا كورة ، بلا جاويش ، بلا عكاشة ، بلا هرى وكلام فارغ … إحنا مش فاضيين للكلام ده .. إحنا بنبنى بلدنا ، ومصر ماعندهاش وقت تضيّعه لإننا زى ما قولنا قبل كدة .. دى معركة بقاء .. معركة بناء دولة على أساس إقتصادى وعسكرى علشان نبقى قادرين نواجه التحديات اللى إتفرضت علينا !! .. وخليك فاكر إن فيه ناس بتموت علشان مصر تعيش !!
وعلشان ما نحرمش أصحاب الهري من الهري .. أحب أفكرهم إن النهاردة ذكرى موقعة الجمل ، أكبر كذبة إنضحك بيها على عقول المصريين من 5 سنين .. كلمتين علشان بس أصحاب الهري ، يلاقوا هرية يهروا فيها =D =D =D
وقريّب أوى هــ نهرى مع بعض فى موضوع ليبيا اللى شاغل ناس كتير 🙂 🙂
مصر مكملة ..