13 Jan 2022
لما رئيسك يجيب لهم من الآخر .. !!
———————————–
فى الخمسينات و الستينات .. الغرب كان بيحاول طول الوقت يقنع المصريين إنهم عايزين يطيحوا بجمال عبد الناصر علشان مصلحة مصر والمصريين …
وهو هو نفس الغرب اللى اتكلم فى 2013 على لسان معهد السيناتور “جون ماكين” بعد الاطالة بحكم الاخوان اللى كانوا هيضيعوا مصر.. وقالوا إن أمريكا لن تسمح بظهور ناصر جديد فى منطقة الشرق الأوسط !!
وطبعا ده بيوضح إنه الموضوع لا هو ناصر .. ولا هى مصلحة مصر والمصريين … لكن الموضوع كله هو مصلحتهم هم … حتى لو كانت مصلحتهم دى فى ضياع الدولة المصرية وتشتيت شعبها … ومصلحتهم عمرها ماهتكون فى نفس اتجاه مصلحة مصر أبدا .. لأنهم عمرهم ما هيهتموا بمصلحة مصر والمصريين أكثر من مصلحتهم …
الرئيس السيسى فى لقائه مع المراسلين الأجانب على هامش منتدى شباب العالم جاب من الآخر .. وقصف جبهة اللى اسمه طارق حمدان ده بشكل عنيف هو واللى وراه
قال لهم بما معناه انتم مش هتحبوا شعبنا أكثر مننا .. ولا هتخافوا على بلادنا أكثر مننا !!؟ … إحنا كمان عايزين نكبر وننموا زى ماغيرنا كبر وتقدم … ومش هنسمح لحد يعيقنا ويعرقلنا بالكلام ده (يعنى بيقول له انا فاهم كويس أهداف اللى بتعمله ده اييه ) .. وكررها تانى .. ماحدش بيحب شعب مصر أكثر مننا .. بس احنا بنحبه صح .. مش بالكلام اللى لا يودي ولا يجيب … وفى النهاية البلد تضيع زى ماغيرها ضاع .. !!
وقال إجمالا لأى حد بيتكلم عن الاختفاء القسرى وإعداد المعتقلين .. وبيردد كلام من غير دليل .. اعملو لجنة (و ده حصل قبل كدة بالمناسبة) .. وتعالوا بكلام مضبوط وصحيح وإحنا هنتعاون معاكم .. ولو كان عندنا خطأ .. ماعندناش مشكلة إننا نصوب الخطأ ده … لكن ترديد كلام وأرقام غير صحيحة ومافيش عليهم دليل . ده يبقى له أهداف تانية !!!
وقال فيما معناه … إحنا عايزين نعمر البلد دى ونرفع الناتج المحلى ومستوى دخل المواطن … مش نردد كلام وشعارات ماتأكلش عيش
وختم الرئيس رده الصاعق .. بإن قضيته الاساسية إن ياخد بإيدين البلد و المواطن ونطلع بيهم لقدام .. مش حاجة تانية وأهداف تانية !!!
رد الرئيس كان من القوة اللى بيها بيقول ان مصر مافيش على رأسها بطحة .. وإن ديباجة الحريات واسطوانات دكاكين حقوق الإنسان اللى مش بيهمها لا حقوق انسان ولا حتى حقوق حيوان … ماعادتش بترهب مصر … ولا الكلام ده بقى بيضحك على عقول المصريين ….
عشت ياريس .. وحفظ الله مصر برئيسها وجيشها وشعبها 🙏