14 Jan 2022
منتدى شباب العالم 2022 .. !!
مصر اللى هتبقى قد الدنيا ..
—————————–
منتدى شباب العالم فى نسخته الرابعة لهذا العام ، كان ضيفا عزيزاً .. أتى سريعاً ومضى سريعاً .. بعد أن إستمتعنا جميعا _نحن والمشاركين فيه_ بكل فعالياته التى كانت أكثر من رائعة …
وبغض النظر عن حفل الإفتتاح الرائع .. وحفل الختام المبهر بكل ماتحمله الكلمة من معانى … فقد جائت فعاليات المنتدى لهذا العام لتتوج المجهود الذى تم بذله فى نسخاته الأولى والثانية والثالثة .. بل ويتفوق عليهم جميعا فى مضمونه وماتضمنه من رسائل موجهة بعلم الوصول لأصحابها .. وليعلن للعالم أجمع عن نتاج التجربة المصرية فى سنواتها الأخيرة .. ويعرض نتائجها التى اصبحت ماثلة أمام الجميع .. !
وعلشان مانتفرعش فى تفاصيل كثيرة .. هــ نعرض فى نقاط سريعة رؤيتنا للى حصل فى المؤتمر ….
أولا .. المؤتمر السنة دى كان فرصة للرئيس المصرى ورئيس الحكومة علشان يعرضوا للشباب المصرى ولكل الضيوف سواء من الشباب من 196 دولة .. أو من ممثلى الهيئات والمنظمات الدولية ورؤساء الدول .. التجربة المصرية والنتائج اللى إتحققت على الأرض بالفعل .. واللى اصبحت ماثلة امام الجميع .. ومايقدرش ينكرها إلا حاقد أو مغرض أو مغيب !!
ثانيا .. فى كل المؤتمرات السابقة كنا بنقول هــ نعمل إييه .. وبنفسر الإجراءات والخطوات اللى بــ يتم إتخاذها ، وبنشرح اهدافها .. لكن السنة دى كنا بنقول إحنا حققنا إييه .. وهدفنا نوصل لإييه …. يعنى الموضوع مابقاش أحلام .. لكنه اصبح واقع 🙂
ثالثا .. تنظيم المؤتمر بالكامل من خلال شباب البرنامج الرئاسى وشباب الأكاديمة الوطنية للتدريب بهذا الشكل النموذجى والغاية فى الإتقان .. بيقول للعالم كله .. إن الجيل الجديد اللى هــ تقوم على أكتافه مسئولية قيادة مصر المستقبل .. هم شباب فى أعلى درجات الإحترافية والإتقان … والأهم الإخلاص لبلدهم والوعى بقضايا وطنهم … و هم دوول أبناء مصر اللى هــ يخلوها قد الدنيا بجد
رابعا .. الرسائل اللى قام الرئيس بتوجيهها من خلال جلسات المؤتمر سواء فى الجلسة الإفتتاحية .. أو جلسات مواجهة الفقر .. وشركاء التنمية .. ومحاكاة حقوق الإنسان .. ولقاء ممثلى الإعلام .. وغيرها من اللقاءات .. كانت فعلا كلها رسائل موجة بعلم الوصول لأصحابها ولكل من يهمه الأمر .. علشان يعرف ويتأكد إن مصر الدولة الجديدة أصبحت بفضل الله أمر واقع .. وحجر العثرة اللى هــ يقف فى وجه أى محاولات هدم وإرباك سواء لمصر أو للمنطقة .. و مافيش حد هــ يقدر عليها بإذن الله وحوله وقوته .. ولا هــ يقدر ينال من إستقرارها ولا من سلامة وأمن شعبها
خامسا .. العرض المسرحى اللى تم تقديمه كان مبهر بكل المقاييس .. وبيقدم رسالة للعالم إننا على وعى بقضايانا ، ومدركين لكل التحديات الدولية وإننا زى ما عدينا محنة الجائحة بتماسكنا وبدعم القيادة السياسية وتضامن كل قطاعات الدولة ، .. هــ نقدر نعدى بفضل ربنا أى محنة تواجهنا ..
وطبعا ماينفعش نغفل من خلال مسرح المنتدى ، رسالة إن الفن هو مرأة الشعوب .. وإننا شعب متحضر .. وإن الدين عمره مابيحرم الفن والذوق الراقى … وإن كل اللى بيعمل ده ، هم المتطرفين اللى مالهمش أى علاقة بصحيح الدين
سادسا .. قيام الرئيس السيسى بتسليم شهادات التخرج لخريجي الأكاديمية الوطنية للتدريب … وإعلانه إن برنامج الأكاديمية يقدر يستوعب الجميع حتى من الشباب العربى والأفريقى .. هو بمثابة غعلان شهادة وفاة لمؤامرة الفوضى فى أرض مصر .. رسالة بنقول فيها من سيناء أرض السلام .. إن مصر اللى حاول أعدائها إسقاطها بتغييب وعى شبابها وأبنائها .. اصبحت النهاردة هى المفرخة الرئيسية والأكاديمية اللى بتخرج شباب ناضج فاهم واعى لقضاياه .. واللى هــ ياخد على عاتقه النهوض بدولته .. مش فى مصر فقط .. ولكن كمان فى المحيط العربى والأفريقى !
سابعاً .. تنظيم المنتدى السنة دى فى ظل تحديات الجائحة كان بروفة مهمة جدا لقيام مصر بتنظيم مؤتمر المناخ العالمى اللى هــ يتم إنعاقده فى شرم الشيخ فى نوفمبر المقبل بقيادة مصر .. وهيحضره رؤساء ووفود رئاسية لاكثر من 40 دولة أهمهم الدول الكبرى … وكان من ضمن التوصيات الختامية لمنتدى شباب العالم .. هو تكليف إدارة المنتدى بالتنسيق مع الجهات المعنية لتكوين مجموعات شبابية من مصر والعالم للمشاركة الفعالة فى تنظيم قمة المناخ العالمية COP27
وختاما .. كان حفل الختام المبهر اللى بعث للعالم كله رسالة إن مصر أرض الحضارات .. ومهد الفكر والإبداع .. وإن مصر تتسع للإختلاف .. وتستوعب كل الثقافات .. لأنها فعلا كانت ومازالت وستظل … #أم_الدنيا …
حفظ الله مصر برئيسها وجيشها وشعبها 🙏