4 Feb 2016
ونقول كمان عن حكم كرداسة
—————————-
بعد ما كل واحد أدلى بدلوه ، واللى شتم شتم ، واللى زعل زعل ، واللى عيّط عيّط ، واللى مصمص شفايفه على الشهداء وأولاد الشهداء .. وزى ما إتكلمنا من كام يوم فى مقال صفحتنا عن السؤال بتاع “هو الهري النهاردة على إييه ؟؟” … وبعد كل اللى سقطوا تااااااااانى فى فخ التسخين الإعلامى ، تعالوا بقى ناخد نفس عميق كدة ونتكلم بالهداوة !!
زعلان !!؟؟ .. طبعا لك حق تزعل .. لكن حط فى إعتبارك إن حزنك وزعلك عمره ما هــ يكون قد حزن وزعل وحرقة أهالى شهداء كرداسة .. لكن الأهم واللى لازم تفهمه إنك وقعت فى نفس الغلط اللى انت كنت بتلوم عليه الإخوان وشلة الكولّجية ، لما يكون الحكم على هواهم ، يبقى القضاء جميل وكيوت ، ولما يبقى الحكم مش على هواهم ، يبقى قضاة العسكر والزوووولم والكمع والسيسى كااااتل 🙂 … وخصوصا إن إنفعالك ده مش مبنى على أى خبرة قانونية أو خبرة بالطريقة اللي بيمشي بيها نظام العدالة.. يعنى من الأخر كدة الموضوع عاطفى بحت !!
محكمة النقض مالهاش علاقة بالواقعة .. لكنها بتحاكم الحكم نفسه .. يعنى بتنظر فى اسباب الطعن المقدم ، ومالهاش أى علاقة بحيثيات وتفاصيل القضية .. ومش عايزين أبداً ننسى إن القاعدة القانونية في كل الأنظمة الجنائية في الدنيا بتقول إن الشك يفسر لصالح المتهم أو المدان .. ولو فيه أى شك أو أى تحفظات على تفاصيل أى حكم حتى لو كان خاص بشخص واحد من ضمن عدة أشخاص محكوم عليهم فى قضية واحدة ، هنا ييجى دور محكمة النقض .. و ده معناه إن النقض مش براءة .. لكن معناه إن القضية ترجع للمحكمة علشان ترد علي الجزئية اللى عليها تحفظات فى حكم المحكمة .. وبعدين المحكمة تحكم من جديد .. وممكن أى حد من اصدقائنا القانونيين على الصفحة يفتينا فى الموضوع ده 🙂
أكيد حالة الغضب دى لها ما يبررها ، وكلنا مش عاجبنا اللى حصل ، وكلنا متعاطفين إنسانياً مش مع الشهداء واسرهم وأولادهم فقط .. ولكن مع البلد ككل وخايفين عليها .. لكن هى دى ضريبة التعامل مع إجراءات التقاضى الطبيعية .. وهو ده السبب فى مناداه الرئيس السيسى للمجلس الاعلى للقضاء بمشروع لتسريع إجراءات التقاضى علشان أى قضية ما تاخدش اكثر من سنة .. بس فى نفس الوقت مش عايزين نروح فى سكة إننا نهاجم القضاء والمؤسسة القضائية بالكامل لمجرد حكم مش عاجبنا ، لأننا كدة _ومن غير ما نحس_ بنساعد المغرضين على الطعن فى القضاء المصرى اللى هو أحد أعمدة الدولة المصرية ، واللى برضوا دفع الثمن من دماء شهداء بعض أبنائه لو لسة حد فاكر !!
وبرغم حالة الغضب العارمة ، لكن اللى حصل ده كان فيه شئ إيجابى وهو إنه نسف تماماً فكرة تسييس القضاء المصرى وإنه قضاء العسكر ، ودى الفكرة اللى بيروج لها ناس كتير أوى من المغرضين … وده دليل على إستقلالية القضاء .. وأن مصر دولة مؤسسات حقيقية رغم كل المزايدات الرخيصة اللى بيقوم بها البعض لتشويه مصر وتشويه القضاء المصرى !!
لكن الشئ الأهم إن اللى حصل ده كشف بوضح لا يقبل الشك أو الجدل كل الكولجية والمتثورجين على روحهم ورموز النكبة اللى بيقولوا عليهم نخبة ، .. بتوع الدم كله حرام .. واللى مافكرش حد فيهم يعبر حتى ولو بالكذب عن إستيائه من حكم محكمة النقض تعاطفا مع الشهداء من الشرطة ، بالرغم من إنهم طول الوقت قارفين مصر كلها بالكلام عن القضاء المسيس ، ودماء الأبرياء و لوك لوك لوك لوك !!
مرة أخيرة .. إحنا كمان زعلانين .. وبــ ننادى بما إننا فى حالة حرب ، بإن جرائم الإرهاب يتم التعامل معها عن طريق القضاء العسكرى لحد ما يتم تغيير قانون الإجراءات الجنائية وتسريع إجراءات التقاضى .. لكننا فى نفس الوقت ، وإنتم كمان ، مش لازم نسمح أبداً بإننا نكون بوابة للهجوم على مؤسسة القضاء ، ومدخل يسمح بهدم والنيل من القضاء المصرى !!