13 Feb 2022
الحرب الأوكرانية .. وحافة الهاوية !!
————————————
لا حديث فى العالم غير عن الحرب الأوكرانية … وإن بوتين خلاص أخد القرار .. وروسيا بــ تسن أسنانها .. وبتحش 200 ألف جندى على الحدود الأوكرانية … وإن عملية إجتياح الروس لأوكرانيا خلاص اصبح مسألة وقت !!
أمريكا بتحذر .. وأوروبا بتحذر … والرئيس الفرنسى ماكرون بــ يسافر لروسيا لملاقاة القيصر .. ويتم التعامل معاه بمنتهى الإستهانة .. ويرجع قفاه يقمر عيش … وبعدها نلاقى الأمريكان والإنجليز بيطلبوا من رعاياهم مغادرة ، أوكرانيا … ويطلع الرئيس الأوكرانى يقولك إحنا جاهزين للحرب !! .. جاهز مين يابنى .. ده إنت فرقة ممسلحة من القوات الخاصة الروسية تخش تجيبك من قصر الرئاسة وترجع !! ….
وكل ده وأكثر منه بــ تتناوله الصحف والمواقع الإخبارية العالمية .. والعالم كله مجهز نفسه ، و قاعد مترقب إمتى هــ تنضرب أول رصاصة لإشعال الحرب !!!
وإحنا بنقول لكم تانى وتالت ورابع إن كل ده مسرحية .. وكل اللى بيحصل ده معروف فى الصراع السياسى بإسم سياسة حافة الهاوية … أيوة حافة الهاوية … يعنى كل الأطراف تكشف صدرها .. وتشد عضلاتها .. وعروق الرقبة تنفر كدة وتحمر … ويتم إطلاق التصريحات النارية .. وبعد كل ده … فسسسسس … ولا كأن حاجة حصلت … يعنى الموضوع إستعراض قوة وإختبار ردود الأفعال ، وصراع فشنك لا يفضى إلى حرب !!!
طب هو مين اللى إبتدى !؟
طب هى روسيا عايزة تحارب !؟
طب أميريكا ممكن تحارب !؟
طب هى أوروبا عندها إستعداد تدخل فى حرب فى ذيل اميريكا !؟
طب هى الحكاية إييه بالضبط !؟
وعلشان مانوجعش دماغ حضراتكم بتفاصيل كثيرة وجذور ممتدة من قبل موضوع ضم الروس لشبه جزيرة القرم .. و لحد النهاردة .. فالحكاية بالمختصر المفيد كدة إن الغرب عايز يضم أوكرانيا للإتحاد الأوروبى .. وبالتالى تبقى عضو فى الناتو .. و ده معناه إنها تدخل فى إطار المنظومة الصاروخية للناتو .. ناهيك عن إن الغرب بدأ فعليا تزويد الجيش الأوكرانى بــ صواريخ “جافلين” الأميركية المضادة للدروع (Javelin)، وساعدوا أوكرانيا فى تطوير صواريخ “نيبتون” المضادة للسفن (Neptune)، وكذلك اشترت أوكرانيا من تركيا طائرات “بيرقدار” المسيرة … و ده طبعا يعتبر بالنسبة للروس خط أحمر لايمكن تجاوزه !
ده معناه إن قوات حلف الناتو بمنظومة صواريخها بطياراتها بقواتها بسلاطاتها بــ باباغنوجها تبقى متواجدة على الحدود الروسية .. وبتهدد العاصمة الروسية بشكل مباشر .. وده اللى مش ممكن تسمح بيه روسيا أبدا !!
وعلشان كدة الروس قلبوا الدنيا .. وبوتين حلف يمين تلاتة مايحصل .. قام بايدن قاله يمين على يمينك هيحصل .. والإتحاد الأوروبى إنقسم .. جزء منه قال لبايدن إحنا معاك يابايجون .. وجزء قال له ، لأ إهدى شوية كدة إحنا مش حمل مشاكل مع الدب الروسى … وعنها كله سحب السكاكين ولمّ القوات من على القهاوى ووقفوا لبعض .. لكن مافيش حد ضرب رصاصة ناحية الثانى !؟
طب يعنى مافيش حرب !!؟؟ …
لأ طبعا مافيش حرب … على الأقل فى الوقت الحالى ..
مافيش دولة حاليا تقدر تدخل فى حرب عسكرية مباشرة مهما كانت الظواهر بتقول كدة … ومافيش دولة وبالذات دول أوروبا ، يقدر إقتصادها يتحمل التبعات الإقتصادية لنشوب حرب مباشرة ..
بوتين طبعا مش عايز يحارب .. وأوروبا مش ممكن تراهن على أميريكا فى الدخول فى حرب مباشرة مع الروس …
#أولا .. لأن الروس فى إيديهم مفتاح انبوبة الغاز وممكن يقفلها عليهم فى أى وقت ، ومافيش أى إمدادات خارجية ممكن تعوضهم عن الغاز الروسى …
و #ثانيا .. لأن أميريكا بعيدة .. ولو نشبت حرب مباشرة .. أوروبا هى اللى هتبقى وش القفص وفى مرمى نيران الألة العسكرية الروسية … وذكريات الحرب العالمية ذكريات بغيضة بالنسبة لهم ، ماحدش فيهم عنده إستعداد لتكرارها .. ولا شعوبهم هتسمح لهم بــ ده !!
ده غير إن أميريكا نفسها ماتقدرش تراهن على الأوروبيين كرأس حربة فى مواجهة الروس لأنهم اضعف بكتير من إنهم يلعبوا الدور ده ..
يعنى الروسى مش عايز يحارب .. وأوروبا خايفة من الحرب .. والأميريكى مش جد أوى إنه يمشى فى سكة الحرب … طب أومال اللى بيحصل ده كله ليه !!؟
ده كله نوع من التحرش مش أكثر .. قنبلة إختبار لقياس رد الفعل .. وخطوة بياخدها الغرب ناحية قلب الدب الروسى … لو سكت يبقى خير وبركة .. ويبقى الغرب أخد رقعة زيادة بالطابية على رقعة الشطرنج علشان يقدر يهدد الملك …
طب ولو ماسكتش .. مايجراش حاجة … نحمّر عنينا شوية يمكن يتراجع ويبقى كسبنا برضوا وعرفنا أخره .. ولو كمل وفتح صدره … يبقى نقعد ونتفاوض وشوف ممكن نعمل إييه !
هى دى القصة بالمختصر المفيد …
طب هل ده معناه إنه مافيش حرب .. !؟
لأ مش بالضبط …
الحرب فى الوضع الحالى مش هــ تحصل … ومش ممكن تحصل لنفس الأسباب اللى ذكرناها من شوية … إلا فى حالة الوصول لمرحلة إنه “ياروح مابعدك روح” … بمعنى .. إن الحرب مش خيار مطروح صحيح فى الوقت الحالى … لكنه هيبقى الخيار الأول لو كان فيه تهديد مباشر للأمن القومى لأى طرف من الأطراف المعنية … وبالذات الدب للروسى … لأنه مش ممكن هــ يسمح للغرب إنه يغرز السلاح فى خاصرته وهو واقف ساكت بيتفرج …
القرم بالنسبة للروس خط احمر … ونشر تسليح الناتو على الحدود الروسية خط أحمر .. والبحر الأسود خط احمر .. وأى محاولة من الغرب لتجاوز الخطوط الحمراء الروسية ، هــ يتم الرد عليها بمنتهى القوة والحسم من جانب الدب الروسى ..
يمكن النهاردة مايكونش فيه حرب (ولو إننا منعرفش إييه اللى ممكن يحصل فى الغرف المغلقة بين يوم وليلة) … لكن قرار الحرب هــ يفضل قرار مؤجل … لو ماحصلش النهاردة .. أكيد هــ يحصل بكرة .. أو بعد سنة .. أو سنين … لأن الصدام قادم لا محالة … وأسباب ده كله .. يمكن نعيد التذكرة بيه فى بوست قادم ..
أومّال مصر بتعمل اللى بتعمله ده كله .. وبتقوى نفسها سياسيا وإقتصاديا وعسكريا ليييييه !!!
وأدينا بنتفرج …
حفظ الله مصر برئيسها وجيشها وشعبها 🙏