حرب اللاحرب … !!!

23 Feb 2022

حرب اللاحرب … !!!

——————-

مبدئيا كدة .. اللى بيحصل لحد اللحظة اللى احنا فيها دى مش حرب … لكن ده مجرد صراع سياسى ومخابراتى واستعراض قوة ، ومناوشات بين القوى الكبرى من خلال البوابة الاوكرانية … ومحاولة الاستفادة القصوى من كل الكروت اللى بيمتلكها كل طرف .. لتجنب الصدام العسكرى المرعب ، أو الحرب الشاملة اللى كلنا بنتكلم عنها وخايفين منها …

بوتين قام بتفعل أوراقه فى الداخل الاوكرانى … وخلى اقاليم #دونيتسك و #لوغانسك اللى فى منطقة #دونباس الموالين لروسيا قلبا وقالبا ، يعلنوا استقلالهم عن اوكرانيا ، فتبدأ اوكرانيا بقصفهم .. علشان ينزل بوتين بكارت البرلمان الروسى اللى بيعترف بإستقلال الأقاليم دى .. وبالتبعية يبدأ الجيش الروسى تحركه لدعمهم بعد استنجادهم بروسيا لحمايتهم  !!! …. عملية نظيفة مليون فى المائة !

ورغم تعالى الصراخ والعويل الغربى والتلويح بالتحرك .. إلا أن الرئيس الروسى اطلق أكبر حملة استعراض قوة من خلال تحركاته ومناوراته العسكرية ، وابواقه الدعائية وأعلن استعداده التام للرد بقوة على أى تحركات غربية ضده ، وهدد باستخدام كل الأوراق المتاحة لحماية أمنه القومى … ناهيك عن بعض الدول و المنابر الإعلامية الأخرى اللى عملت دعاية مجانية للروسى نكاية فى الغرب !

قمة الكوميديا ، كان اجتماع الدول فى الأمم المتحدة من كام ساعة لاتخاذ موقف من روسيا فى الأزمة الاوكرانية … ودعوة وزير الخارجية الاوكرانى المجتمع الدولى لاتخاذ موقف حازم من روسيا .. فى حين إنحصر الموقف من خلال كلمات مندوبى كل الدول الغربية المعنية فى الحديث عن الحلول الدبلوماسية ، واستخدام سلاح العقوبات مش أكثر !

حتى تصريحات المرحوم بايجون ، والفرنسي ماكرون قالوا ان الأبواب الديبلوماسية مازالت مفتوحة لعدم الوصول بالأمور لما هو أسوء … وردت روسيا بإنها معندهاش مانع للحوار الديبلومسى فيما يحفظ لروسيا امنها القومى !

ده غير إن روسيا لاعبت الغرب بطريقته .. وكان كلام مندوب روسيا فى الأمم المتحدة النهاردة ان روسيا مالهاش دعوة باللى حصل خالص .. ده صراع بين الجيش الأوكرانى والانفصاليين فى منطقة دومباس .. وإن روسيا ماكانتش تقدر تقف ساكتة أمام الانتهاكات اللى بيقوم بيها الجيش الاوكرانى فى حق الأبرياء والمدنيين … يعنى بيتلاعب بيهم بنفس طريقتهم ، وبيقول لهم فيما معناه “ده مش أنا .. دى أوختشى منى” 😁

الكوميديا السوداء بجد بقى .. هى إن الاتحاد الأوروبي هيجتمع بكرة اجتماع عاجل لمناقشة الأزمة الاوكرانية .. وأهم بند على رأس الأجندة اللى هيناقشوها، هى أزمة اللاجئين الاوكران اللى هيتدفقوا على الحدود نتيجة للى بيحصل … أه والله زمبؤلك كدة 😅😅 … دى الاولوية اللى هتكون على رأس أجندة اجتماع الاتحاد الأوروبي بكرة !! 🙈

السيناريو لحد دلوقتى ماشى زى المتوقع … ولو رجعتوا لكلامنا ((اللى فى صورة المقال)) ، و اللى ذكرناه فى مقالاتنا فى الايام الماضية عن موضوع الحرب .. هتلاقينا قولنا إن اوروبا أضعف من إنها تحارب .. وروسيا مش عايزة تحارب .. واميريكا بتتحرش بالروسى وبتستخدم اوروبا كرأس حربة بتصدّرها فى مواجهة روسيا …. وكل الاطراف عندها مشاكل اقتصادية تخلى الحرب الشاملة بالنسبة لهم هو الخيار الأخير  !!

وحتى مع تقارير المخابرات الأميريكية اللى صدرت النهاردة واللى بتقول ان عندهم معلومات ان روسيا هتجتاح اوكرانيا فى خلال 48 ساعة … وحتى لو ده حصل فعليا … فمازالنا نرى ان سيناريو الحرب الشاملة بين روسيا وحلفائها من جهة ، وبين الغرب من جهة تانية .. مازال سيناريو مستبعد .. وإن رد الفعل الغربى عمره ماهيوصل لمرحلة رد الفعل الشامل العنيف .. واللى هيقابله رد أعنف من الجانب الروسى .. وأنهم لازم فى النهاية هيقعدوا مع بعض على ترابيزة واحدة .. وكل واحد يرمى الكروت اللى فى إيده … وإلا هيبقى الطرفين خسرانين … ومش الطرفين بس .. لكن العالم كله هيبقى خسران !

وجهة نظرنا ان الحرب الشاملة لسة سيناريو مستبعد …

أو خلينا نقول إننا بنراهن على إن كل طرف هييجى عند نقطة معينة ، ويضطلع بمسئوليته .. لتجنب الوصول لسكة اللى يروح مايرجعش …

و الايام مافيش أقرب منها ….

حفظ الله مصر برئيسها وجيشها وشعبها 🙏

لمتابعة تعليقاتكم