24 Feb 2022
الحدوتة مش أوكرانيا .. !!
————————-
الرئيس الروسى بوتين أصدر تصريح بيقول فيه إن اللى بيحصل دلوقتى مش بداية الحرب … لكنه محاولة لمنع الحرب … !!!
التصريح ده لخص الحدوتة كلها .. لأن بوتين والغرب عارفين كويس جدا أن الصراع الحقيقى والحرب الفعلية هى الحرب بين روسيا من جانب وحلف الناتو من جانب اخر .. وغير كدة شكليات …
العملية العسكرية لحد دلوقتى وبرغم كل الصخب الاعلامى هى عملية محدودة لتحييد القدرات العسكرية الاوكرانية لقطع الطريق على حلف الناتو لتهديد الأمن القومى الروسى من داخل أوكرانيا … لأنه عارف إن الصدام الحقيقى والحرب الشاملة الحقيقية ليست مع أوكرانيا ولكن مع الناتو ! … وعلشان تفهم حقيقة الوضع ، وتستوعب فارق القوة بين روسيا واوكرانيا … افتكر كدة فارق القوة بين العراق والكويت …
للاسف الغرب حاول إستخدام أوكرانيا كمخلب قط لآصطياد الدب الروسى … و أوكرانيا بلعت الطعم وشربت بيريل طمعاً فى الإنضمام للإتحاد الأوروبي .. وصدّق الرئيس الاوكرانى التطمينات الغربية إنهم هيقفوا معاه وهيدعموه .. والناتو هيقف فى ظهره … لكن وقت الجد ، الكل خلع وساب أوكرانيا تلبس فى الحيط .. والشعب الاوكرانى دلوقتى هو اللى بيدفع الثمن … وأصبح الحديث كله دلوقتى عن العقوبات والمسار الديبلوماسى !! والرئيس الاوكرانى طالع النهاردة فى خطاب متلفز بيناشد الشعب الروسى الضغط على بوتين لإيقاف الحرب …
بل إننا وصلنا لمستوى من الكوميديا إن إنجلترا بتهدد دولة بيلاروسيا وبتتوعدها بالعقوبات، بسبب دعمها للموقف الروسى … يعنى على رأى المثل الشعبى “مش قادرين على البوتين فبيتشطروا على البيلاروسيا” 😁
الرئيس الروسى لاعب شطرنج ماهر .. وعارف كويس جدا إنه صحيح يمتلك القوة العسكرية الضاربة .. لكنه متأكد كمان ان اقتصاده حاليا لا يتحمل التورط فى حرب طويلة الأمد … ولا الدول الغربية كمان … وعلشان كدة هو بيسعى دلوقتى لفرض وضع ديموجرافى على الأرض وبعدها يبدأ المفاوضات وهو ممسك بكل الكروت فى إيده …
لحد دلوقتى حلف الناتو لم يحرك ساكنا .. ولا نظن إنه سيفعل … وإحنا بنعتقد … بل نكاد نجزم إن الرئيس الروسى بحكم خلفيته المخابراتية، فاهم كويس جدا قواعد اللعبة … وعنده حسن التقدير .. بحيث إنه لازم يحقق أهدافه من العملية العسكرية فى خلال 72 ساعة بحد أقصى ثم التوقف ، وترك المساحة للمسار الديبلوماسى والمفاوضات .. قبل أن تتحول أوكرانيا لمستنقع يغرق فيه الجيش الروسى .. و قبل ما يوصل الغرب لمرحلة الحافة .. ويتخلى عن سلاح العقوبات ويبدأ يرد عسكريا … لأن الصدام ساعتها مش هيكون فى مصلحة حد .. و هيبقى خيار كل طرف هو هدم المعبد على رؤوس الجميع … !
كلمة اخيرة ….
اللى بيحصل ده بيأكد للمرة المليون إن العالم لا يفهم الا لغة القوة لفرض رؤيتك ، أو المحافظة على امنك القومى وافتكروا اللى عملته روسيا فى جورجيا فى 2008 واللى عملته أمريكا فى العراق واللى بتعمله الصين حاليا فى محيطها الاقليمى لوقف أى تحرش بيها … ولو اخدنا مثال على المستوى الاقليمى فيما يخص مصر .. ف افتكروا الاوضاع لما فضلت تتصاعد فى ليبيا وفضل الخطر يقرب منك لحد ماطلعت وقولت هوب ستوب لحد هنا خط أحمر لكل القوى الدولية ، واللى عايز يجرب يقرب … وساعتها كله وقف ومافيش حد جرؤ يتخطى الخط الأحمر .. واللى حاول فقط ، كان ردك عليه صارم وعنيف 😉
وهو ده كان سر الحملة المستمرة والعواء اللى مش بيقف ضد جيشك وضد رئيسك .. لما كانت كلaب السكك بتلعب بعقلك و بتسألك طول الوقت “هى مصر بتشترى سلاح لييه !؟” … وانت دلوقتى مش بتشترى بس .. لكن بتوطن صناعة السلاح عندك .. وكمان بتصنع بنفسك !!
العالم وقت الجد مش بيعترف غير بلغة القوة … وبس
حفظ الله مصر برئيسها وجيشها وشعبها 🙏