26 Feb 2022
مشاهد عبثية … !!
——————
الوضع الحالى خلانا نشوف العديد من المشاهد العبثية ، الأقرب الى الكوميديا السوداء ، اللى لو شوفناها فى فيلم سينمائي من الدرجة الثالثة ، كنا هنخرج قبل مانخلص الفيلم ونقول الجملة المشهورة “سيما أونطة هاتوا فلوسنا” … لكن الواقع اثبت بكل أسف إنه أصدق من الخيال !!
⬅️ إمبارح فى جلسة مجلس الأمن الطارئة المنعقدة بخصوص الأزمة الاوكرانية .. بتقدم فيها ماما أمريكا مشروع قرار لإدانة روسيا .. واللى هى أصلا عضو دائم فى مجلس الأمن .. و مش كدة وبس لكن كمان تمتلك حق النقض “الفيتو” .. اللى مجرد استخدامه ضد أى مشروع قرار ، بيلغى القرار وكمان بيمنع حتى اعادة طرحه للنقاش والتصويت مرة تانية ……
والمفروض إن اميريكا والدول الأعضاء كانوا منتظرين من روسيا انها تصوت بالموافقة على مشروع قرار ادانتها … لأ والأنكت ، إن لما روسيا استخدمت الفيتو .. بدأت أميريكا وكل الدول يعلنوا دهشتهم وخيبة أملهم من اللى عملته روسيا .. وانها ماكانش المفروض تعمل كدة .. وطبعا كان لسان حال الروس بصوت الفنان محمد صبحى فى مسرحية الهمجي لما سأل الفنان ممدوح وافى بإندهاش “إتفاجأت يالاه” !!!؟ 😁
⬅️ المشهد الأكثر كوميدية لما تلاقى الضرب شغال فى أوكرانيا .. ودبابات وطيارات وقصف وعاصمة بتتحاصر وناس بتموت واقتصاد بيقع .. و فى وسط كل الهم ده .. تلاقى الرئيس الاوكرانى سايب كل ده ، ورايح يلغى المتابعة على تويتر لكل رؤساء اوروبا علشان اتقمص منهم علشان مش بيردوا عليه …. 😏
⬅️ مشهد العقوبات كان مشهد أكثر سخرية … لما على سبيل المثال لا الحصر .. يطلع الاتحاد الأوروبي ويقول إنهم هيقوموا بتجميد أصول وحسابات الرئيس بوتين ووزير خارجيته سيرجي لافروف … فترد روسيا ببيان تقول فيه إن الاتنين مالهمش أى حسابات ولا أصول عندكم …. يعنى الغرب بيفرقع قرارات وعقوبات وهمية وهو مش عارف عنها حاجة اصلا … قمة التخبط … !!!
⬅️ ولأنه زى مابيقولوا فى الادبيات إن الحقيقة هى اول ضحية فى زمن الحروب … فتلاقى نفسك بتسمع وسائل الإعلام والبيانات الروسية بتقول إنهم كبدوا الجيش الاوكرانى وبنيته العسكرية خسائر فادحة … وفى المقابل تلاقى البيانات الاوكرانية ووسائل الاعلام الغربية بتقول إنهم كبدوا الجيش الروسى خسائر فادحة !!! … طب نقفل الراوتر ونفتحه تانى كدة يمكن الكلام يتغير 🙈
إحنا فعلا فى كوميديا سوداء … وماحدش هيعرف الحقائق ويشوف النتائج غير لما يتم اسدال الستار بكلمة النهاية على الأحداث الجارية … واللى لازم تكون فى اسرع وقت علشان الامور ماتتطورش للأسوء …
القوات الروسية على أبواب السيطرة على كييف …. وحلف الناتو بدأ يعزز تواجده فى قواعده العسكرية فى دول البلطيق على حدود روسيا … وإحنا نعتقد إن العملية العسكرية الروسية الحالية لازم تنتهى فى خلال 48 ساعة بتحقيق النتائج اللى بوتين بيطمع فى الوصول إليها .. و بعدين كله يقف ويقعدوا كلهم على ترابيزة المفاوضات … لكن لو الموضوع طوّل عن كدة … هيبقى الوضع مرشح للتفاقم … وممكن يروح للمرحلة اللى ماحدش يتمنى إننا نوصل لها …. لأن ساعتها الكل هيبقى خسران ….
حفظ الله مصر برئيسها وجيشها وشعبها 🙏