لجان السوشيال ميديا … !!

03 Apr 2022

لجان السوشيال ميديا … !!

————————–

يوم وفاة اول جاسوس مدنى منتخب .. نشرنا مقال وقتها وقولنا فيه إن السوشيال ميديا صناعة اخوانية وإن كثير من الأصدقاء هيتفاجئوا إنهم متابعين صفحات كتيرة بريئة المظهر لكن فى حقيقتها كل اللى مدورينها اخوان .. زى صفحات الكوميكس والطبخ والصفحات الفنية وصفات الكورة وغيرها … واتحدينا إنه هيتعمل تريند وفاة مرسى على صفحات كتيرة عمرها ما اتكلمت فى السياسة قبل كدة

وطبعا تطبيقاً لمبدأ إن “الفئران لا تستطيع مقاومة الجبنة” .. فهو ده اللى حصل بالضبط .. ونشرنا مقال تانى يوم بنأكد فيه على اللى حصل بعد ما صفحات كتيرة اتفضحت .. والمقال عمل تفاعل كبير لأن معظم أصدقاء الصفحة وكمان ناس من خارجها واللى قرأوا وشيروا المقال الأول، دخلوا علقوا بإن ده فعلا اللى حصل وأنهم ألغوا متابعة عشرات الصفحات اللى اكتشفوا إنها صفحات اخوانية .. حتى صفحات الرقص 😁 !!

للاسف صناعة التريند صناعة اخوانية بامتياز .. ويكفى انك تبص على صورة المقال النهاردة علشان تتأكد من ده ..

لجان اليكترونية منتشرة على صفحات بريئة المظهر ، حاجة كدة عاملة زى الجاسوس النائم .. وشغالين فى جمع المتابعين من كل الأنشطة والاهتمامات .. و فى لحظة معينة .. وأول ماتجيلهم الأوامر .. تلاقيهم ناشرين سكريبت موحد .. نفس الاسكريبت اللى متوزع عليهم كلهم علشان يعملوا تريند .. وتبان السوشيال ميديا كلها كأنها ماشية فى نفس الاتجاه …

وطبعا مافيش حد بيبقى متابع كل حاجة علشان يكتشف الخدعة .. يعنى اللى اهتماماته كورة وصفحات رياضية غير اللى اهتماماته صفحات طبيخ .. غير اللى اهتماماته صفحات فنية .. ودول مابيتابعوش دوول .. وبالتالى فكل شريحة رايح لها التريند دليفيرى لحد عندها.

وفى الاخر تلاقى الاخوان طول الوقت يدخلوا على الصفحات الوطنية والحسابات الفردية ويتهموهم إنهم لجان وبيقبضوا .. عادى .. ما هو ده تمامهم .. وكلم الجماعة تلهيك واللى فيها تجيبه فيك ..

طبعا اسكريبتات الشغل خلاص اتوزعت على كل اللجان .. والاسكريبتات هتلاقيها من شقين: ..

الشق الأول هو السخرية من المسلسل ومن الشخوص اللى فيه ومحاولة تفريغ المسلسل من محتواه واغتيال العمل والممثلين فيه معنويا .. برغم إن الحلقة الأولى من المسلسل مثلا جابت تسجيل حقيقى لخير الشاطر وهو بيتكلم عن قدرته على تجييش اعداد لحرق مقرات أمن الدولة … لكن ولا كأن اللجان والإخوان ومراكيبهم شافوا أو سمعوا حاجة صمٌ بكمٌ عميٌ فهم لا يرجعون …

ولسة الحلقات القادمة هيبقى فيها فضايح أكثر.

والشق الثانى هو الدخول كل البوستات اللى بتتكلم عن المسلسل أو ناشرين صورة الفنان صبرى فواز فى صورة مندوب الجماعة فى قصر الرئاسة .. وهاتك ياصعبانيات ومصمصة الشفايف والترحم على الجاسوس المنتخب … ويختموا كلامهم بجملتهم المشهورة “وعند الله تجتمع الخصوم” .. و ده هيبقى حقيقى فعلا .. لأن خصومه هو وجماعته أمام ربنا هيبقوا كتير فعلا بحجم الدماء اللى سالت على ايديهم .. وبحق كل ام ثكلى وكل ارملة وكل يتيم كانوا هم السبب فى ايلامهم.

المهم انه طالما اللجان اشتغلت كدة .. وبيفضحوا نفسهم كدة … يبقى المسلسل عامل لهم نسبة احتياج كبيرة لمراهم كينا كومب .. والاقبال عليه فى خلال الشهر هيبقى تاريخى 😉😁

كل رمضان وحضراتكم بخير .. وكل رمضان والجماعة مفضوحين كمان وكمان ومطرودين ومكروهين ومشتتين فى بلاد الله لخلق الله 🙂

حفظ الله مصر من الشر وأهله 🙏

لمتابعة تعليقاتكم