22 Apr 2022
المكاشفة فى لقاء الاسرة .. !!
—————————-
فيديو محتاج تتفرج عليه من أوله لأخره … وكلام حقيقى وكاشف لحقائق كتيرة … وأهم نقاطه تتلخص فى الاتى:-
🟢 المشكلة الاقتصادية بدأت بعد ثورة 2011, كنتيجة طبيعية لسنة ونصف من التظاهر و توقف الانتاج, واللى أدى لفقدان مصر لكل الاحتياطي بتاعها.
🟢 عمرى ماكنت مجامل ولا ضحكت عليكم وكنت باقول طول الوقت ان التحديات اللى بتواجه مصر اكبر من أى رئيس واكبر من أى حكومة لكنها مش أكبر من الشعب المصرى.
🟢 هدفنا إننا نقلل الفارق بين حجم نمو الدولة وحجم نمو السكان .. وكنا بنجرى طول الوقت وكنتم بتستغربوا لما بنقول اننا مستعجلين وماعندناش وقت … وخصوصا إننا من 2011 حصلت زيادة حوالى 24 مليون مواطن و ده محتاج مننا كلنا عمل مضاعف.
🟢 المواطن المصري في الستينات ماكانش بيعانى زى ما بيعاني المواطن دلوقتى , لأن قدرات الدولة المصرية ومواردها وقتها كانت متناسبة نسبياً مع حجم الدولة المصرية .. ولو مش هنعمل ضبط للنمو السكانى يبقى عمركم ماهتشعروا بتحسن الموقف الاقتصادى برغم كل المجهود اللى بنعمله !
🟢 لما بدأنا برنامج الاصلاح الاقتصادي في 2016 .. كلنا دفعنا فاتورة قاسية جدا … لكن الثمن كان إننا قدرنا نتجاوز الأزمات الدولية زى أزمة كورونا والازمة الحالية .. ولولا كدة كان الوضع هيبقى صعب جدا على كل المصريين .. بل بالعكس .. إحنا كنا من الدول القليلة جدا على مستوى العالم اللى حققت نمو ايجابى فى زمن كورونا تجاوز ال 3%.
🟢 الدول الكبيرة لما تواجه مشكلة، بتأثر على سلاسل الامداد اللى بتأثر على العالم كله .. وصندوق النقد الدولى قال انه فى الازمة الاخيرة فيه 143 اتأثروا بشدة .. يبقى بأمارة اييه إحنا مانتأثرش .. مع العلم أن مصر حققت نمو اقتصادى فى الربع الأول من 2022 بلغ 9% .. ورغم الأزمة العالمية إحنا قدرنا نوفر كل السلع والخدمات بوفرة شديدة لكل المواطنين.
🟢 كنت حريص على احتفاظ الدولة باحتياطي استراتيجي لمدة 6 شهور على الأقل ، واتحطت للهدف ده كل الموارد اللازمة علشان نقدر نجابه أى تحديات او أزمات محتملة ومايبقاش فيه أزمات تواجه السوق المصرى.
🟢 لازم تبقوا فاهمين يا مصريين انكم بتعالجوا مشاكلكم كلها مرة واحدة زى سلاسل التوريد والقدرات التخزينية والبنية التحتية واللى كانت كلها قاصرة جدا قبل كدة .. والكلام ده بناء على التعداد الحالى للسكان .. لكن لو العدد زاد يبقى لازم نرفع قدراتنا أكثر .. وبالتالى فإحنا محتاجين نفضل نشتغل علشان نرفع قدرات الدولة لمجابهة النمو السكاني
🟢 البنية الأساسية للدولة المصرية كانت شديدة التواضع, و هو ما أجبرنا على تطوير كل الخدمات و المؤسسات في وقت واحد, لأن الرأي العام ماكانش هيتحمل غياب أي خدمة, زى الكهرباء او السولار أو الغاز أو مياه الشرب.
🟢 لما نقول مصطلح شديدة التواضع ، يمكن ماحدش هيستوعب ده .. لكن لما تمسك ملف زى الطاقة مثلا يبقى تقول هيتعمل ازاى وهيتكلف قد اييه .. شبكة الطرق يبقى هتتعمل ازاى وهتتكلف قد اييه .. توصيل غاز للمنازل يبقى هيتعمل ازاى وهيتكلف قد اييه .. وكل ده محتاج وقت قد اييه … يعنى المواضيع ماكانتش سهلة ..
🟢 الأزمة الاوكرانية كانت كاشفة جدا وكان لها تأثير كبير جدا على العالم كله بما فيهم مصر .. والتأثيرات الإقتصادية السلبية للازمة لها امتداد عندنا فى مصر .. وإحنا بنحاول نحل الأزمة دى لاننا يهمنا أن كل مصنع فى مصر يفضل شغال علشان ماتحصلش بطالة .. وعلشان كدة بنتواصل مع رجال الأعمال والمستثمرين علشان مستلزمات الانتاج لها الاولوية إنها تفضل متوفرة.
🟢 صحيح الأزمة الأوكرانية وقبل منها أزمة كورونا كان لهم تأثير سلبى على الإقتصاد المصرى .. لكن النقطة الايجابية فى الموضوع ان الإقتصاد المصرى قدر يصمد ويستوعب اللى حصل بفضل الاجراءات اللى قامت بيها الدولة على مدار السنين اللى فاتت .. من خلال معدل نمو ايجابى مناسب .. يمكن مافيش غير 3 او 4 دول فى العالم فى أزمة كورونا اللى قدروا يعملوا كدة من ضمنهم مصر … لكن فى نفس الوقت لازم نبقى فاهمين إن أزمة الحرب الحالية هى أزمة شديدة العنف والتأثير اقتصاديا وسياسيا وأمنيا .. واحنا بنحاول نتدخل لحل الازمة سياسيا.
🟢 اللى اتعمل في سيناء ماكانش قليل سواء من الإرهابيين أو مننا .. وبدأ قبل 2011 بخمسة سنوات على الأقل .. والموضوع متوثق عندنا ومتوثق حتى على السوشيال ميديا.
🟢 تجاوزنا مرحلة التفرقة بين المسلمين و المسيحيين في مصر. و لن نعود للوراء مرة أخرى .. وكل ممارساتنا اللى عملناها خلال السنين اللى فاتت كانت لتأكيد إننا كلنا زى بعض بدون أى تمييز دينى .. وقولنا وأكدنا إننا مش هنختلف مع أفكار أى شخص سواء مسلم أو مسيحى او حتى غير مؤمن .. بشرط إنه تكون المظلة الحاكمة هى القانون والمحافظة على الوطن … وأثق في قوة و صلابة النسيج الاجتماعي المصري و قدرته على تجاوز المشكلات, و دورنا كلنا أنه تزداد قوة و صلابة هذا النسيج.
🟢 لن نتوقف عن تنفيذ مشروع حياة كريمة .. ليس من اللائق تأجيل توفير الاحتياجات الأساسية الى 60 مليون مصري.
حفظ الله مصر برئيسها وجيشها وشعبها 🙏