12 Apr 2016
مزايدات و مهاترات تيران و صنافير
———————————–
عام 2015 قامت الدوله المصريه بترسيم حدودها البحريه في البحر المتوسط مع اليونان و قبرص و رفضت الترسيم مع اسرائيل حفاظا على حقوق الشعب الفلسطيني …. و طبقا للدستور …. تم عرض الاتفاق على البرلمان المنتخب عام 2016 بعد تكوينه …. وتم التصديق علي الاتفاق و اصبح ساري .
و طلع خبراء الفيس بوك و جنرالات المقاهي يتحفونا بالاشاعات المعتاده … بتاعه بعنا حقوقنا ببلاش و الكلام الفاضي ده …. و برده طلع كل اللى قالوه غلط و طلع على فشوش … لان معداش اسبوع وانشغلوا بكدبه و اشاعه جديده 🙂 🙂
و الان في عام 2016 قامت الدوله المصريه بترسيم حدودها البحريه في البحر الاحمر مع السعوديه … و ستقوم بعرضها على البرلمان المنتخب لاقرارها …… و ايضا تتكرر نفس القصه …. و بعيدا عن الهري و الاكاذيب المنظمه … و ماسوره الخرائط و المعلومات التاريخيه المضروبه اللى لا تمت للحقيقه بصله …. و حرب تغييب الوعي اللى شغاله …. نحب نقولكم في كلمه و رد غطاها :-
حقوق السياده على الاراضي المتنازع عليها بيتم حسمه بالوثائق و المعاهدات الموقعه بين الحكومات الشرعيه و الموثقه بالامم المتحده و ليس بالكوبي و البيست ببوستات الفيس و الكلام العاطفي المرسل و الخرائط المضروبه في موقع جوجل.
السلطه الشرعيه في مصر الممثله في الملك فاروق عام 1951 و جمال عبد الناصر عام 1958 و السادات عام 1979 و حسني مبارك عام 1990 وقعوا جميعا على وثائق رسميه تعترف فيها بملكية السعوديه للجزيرتين …. و تم توثيق الوثائق جميعا بالامم المتحده كل في حينه و تاريخه
فرمان عام 1906 الرسميه ( مش المضروبه المنتشره على بوستات الفيس ) لا يوجد بها اي اشاره لا من قريب و لا من بعيد للجزيرتين.
نظرا للظروف السياسيه و العسكريه في المنطقه …. أدارت الدوله المصريه الجزيرتين اداريا …. مثل ما كانت تدير قطاع غزه الفلسطيني في فتره من الفترات….. و ايضا لظروف و مستجدات تم ارجاعهم لاصحابهم الحقيقيين.
مؤسسات الدوله الوطنيه السياديه و منها مؤسسه الجيش …. لم و لن تفرط يوما في شبر واحد من ارض مصر .
و عشان نريح دماغنا ….. و من الاخر … نحب نقول نصيحه ….. اللى عنده وثائق رسميه موثقه ….. تقول ان كل الوثائق الرسميه الموثقه في الام المتحده غلط …. و ان الملك فاروق و عبد الناصر و السادات و مبارك كانوا بيبيعوا ارضهم ….. ميعلقش و يضيع وقته ….. يتفضل يروح الصبح للمحكمه الاداريه و المحكمه الدستوريه العليا يرفع قضيه بالمستندات اللى معاه .
بس يا ريت تكون فعلا مستندات …. مش كتاب 6 ابتدائي و صورة نتيجه الدفاع الجوي او كوبي و بيست من البوستات الفيس بوك او فيديو مقتطع لاعلان الحرب في 67 …. او كلام عاطفي و خط و شعارات … 🙂
غير كده ….. يبقي كلها مزايدات و مغالطات و كلام عاطفي على حساب الوطن و الدوله المصريه و مؤسساتها الوطنيه لم تلبث الا انهم كمان يومين تلاته كالعاده حينسوها و يدوروا على موضوع جديد يهروا و يزيطوا عليه .