21 Jun 2016
التفكير بالتمني مازال عنوان المرحلة
الحكم حكم اجرائي و ليس ملكية
——————————-
الهرى النهاردة على حكم المحكمة الادارية هايبقى تاريخى يافندم وكل اللى بيفهم واللى مابيفهمش هايدلى بدلوه .. وكل واحد هايستشهد بأى مصدر يوافق وجهة نظره أو بالأصح يوافق هواه علشان يقول انا صح
والعجيب انك تلاقى نفس الأشخاص اللى كانوا من كام يوم بيهاجموا القضاء المصرى وبيسخروا منه وبيقولوا انه قضاء مسيس وبياخد اوامره من السيسى بعد صدور الاحكام على مرسى وعصابته … هم هم نفس الأشخاص اللى بيهللوا النهاردة للقضاء الحلو الكيوت بعد حكم المحكمة الادارية فيما يخص تيران وصنافير … والاكثر مدعاة للسخرية لما تلاقى ناس تانية مش فرحانين بحكم المحكمة اللى بيقول على حد قولهم ان الاراضى مصرية .. على قد فرحتهم انه كدة كلامهم طلع صح … يعنى مشكلتهم مش “مصر” لكن مشكلتهم ان كلامهم وهريهم يطلع صح .. و ده قمة الشخصنة .. وعجبى !!!!
على العموم .. ماعلينا .. وخلينا فى المفيد .. طب هو ايه قصة حكم النهارده ؟؟؟؟؟
في كلمه و رد غطاها المحكمه و لأن المحكمه الاداريه ليست مختصه في الحكم فيما يختص بأعمال السياده و ترسيم القانون ….. يعني مش اختصاصها و لا تخصصها ….. كان الحكم في الشكل و ليس المضمون …. يعني المحكمه مقالتش الجزيرتين يتبعوا لمين خاااالص …. و لا حسمت ان الجزيرتين مصريتين و لا سعوديتين ….. الحكم النهارده كان في الاجراءات مش اكتر …. يعني المحكمه اعترضت على طريقه التوقيع مش اكتر …. يعني موضوع اجرائي ليس إلا .
المحكمة حكمت في اجراءات التوقيع و ده حقها ….. و الحكومة حتطعن على اجراءات المحكمة لانها ليست مختصه و ده برضوا حقها .
يعني الموضوع كله اجراءات في اجراءات ليس الا و ده حيتحل بمنتهي البساطه بعد الطعن عليه و تقديم الاتفاقيه للبرلمان ….. لكن ملكيه الجزيرتين محدش اتكلم عليها من قريب او بعيد ……. اما البرلمان فحيقوم بتشكيل لجان فنيه متخصصه من داخل البرلمان و من خارجه … و حيعمل جلسات استماع و تشكيل لجان حتقوم بالاطلاع على الوثائق الدوليه السريه اللى على اساسها اصدر حسني مبارك القرار الجمهوري الخاص بالجزيرتين اللى تم تنفيذه حاليا .
و البرلمان المنتخب بضميره الوطني هو اللى منوط بيه انه يقول كلمته ….. و لازم برضوا نعرف ان سلطات البرلمان هي اقوى سلطه داخليه في مصر … و لكن قراراته لا تسري على العلاقات الدولية ….. زي بالظبط اللى حصل في طابا …. الكنيست كان رافض تسليم طابا الى مصر …. لكن لما روحنا التحكيم الدولي …. قرار المحكمه الدوليه مشي على برلمان اسرائيل ….. فلو رفض البرلمان المصري الاتفاقية …… سهل جدا السعودية تروح للمحكمة الدولية ….. و اللى لو حكمت لصالحها …. حكمها يمشي على البرلمان و على المحكمه الادارية .
الله يرضي عليكم ماتنجروش للهري و الزيطة و المزايدات الرخيصة لان الموضوع قانوني بحت ….. لكن الكل بيفكر بالتمني …. و واخد مبدأ مش مهم الحقيقة اييه …. لكن المهم انا نفسي تكون الحقيقه اييه …
ومن الاخر كدة …. حكم المحكمة الادارية النهاردة بالنسبة لكل المهيصاتية والصفحات المشبوهة اللى بتهلل النهاردة لعدالة السماء اللى تنزلت على استاد القضاء المصرى .. بيفكرنى بالثغرة بتاعة حرب 73 … يعنى نقطة شكلية يتلعب عليها شوية لتحقيق مكاسب وهمية فى الاعلام ومواقع التواصل الاجتماعى ..
وزى ما قولنا قبل كدة … ان التشكيك فى نوايا كل الاجهزة السيادية والأمنية والجيش ومؤسسة الرئاسة هو مش هدف فى حد ذاته ولكن وسيلة لهدم الدولة باللعب على عواطف الوطنية اللى بتحرك الغالبية العظمى من المصريين … وحتى الحديث عن ان الموضوع كله هو عبارة عن مناورة سياسية من البداية .. فالكلام ده برضوا مغرض لأنه يعتبر انتحار سياسى لكل الاشخاص والجهات اللى شاركت فيه .. ومؤسسات الرئاسة والجيش والجهات الامنية كمؤسسات وكأفراد عمرهم ما هايتورطوا فى حاجة زى كدة ! 😊
كلامنا ده مش معناه اننا رافضين ان الجزر تبقى مصرية … او اننا بندافع عن حق السعودية مش حق مصر .. والكلام الخايب اللى البعض بيردده … لأ … الموضوع كله بالاتفاقيات والادلة والبراهين .. مش بالصوت العالى والتهييج.
اما بهاليل العالم الافتراضي اللى بدأو يشكلوا حكومة و مجلس رئاسي لانهم حينزلوا بكره يعزلوا السيسي و يحاكموا قاده الجيش و يفككوا اجهزة الدولة السيادية الخاينة اللى باعت الارض زي الخارجيه و المخابرات و الجيش و القضاء ….. فخليكم عايشين في العالم الافتراضي و التفكير بالتمني بتاعكم …. فكل مره تزيطوا و تطلعوا و تطيروا و تنزلوا تتبطوا على الفاضي .
مصر دوله مؤسسات وطنية ….. و ما يحدث امامك هو اكبر دليل على انها بلد مؤسسات وطنية مستقلة يحسدك عليها من حولك ….. لانهم عمرهم ما حيبقوا كده …. مصر مفيهاش اجهزة خاينة ….. مصر يحكمها اشرف اجهزة سيادية وطنية هي اللى حمت مصر و شعبها منكم ايام ما كنتم في الشوارع بتحرقوا و تقتلوا و بتسلموا البلد لرئيس جاسوس يرأس جماعة ارهابية.
اصدقاؤنا … سيبوكم من الهرى و الزيطة … و اتفرجوا ….. و زي كل مره قلنالكم فيها … بص العصفوره 🙂 🙂
تحياتنا