15 Jan 2017
تيران و صنافير ….. و يبدأ الهرى غدا مرة أخرى
———————————————–
بكره إن شاء الله حيكون الحكم النهائي في موضوع تيران و صنافير …. أيا كان الحكم …. فحيكون الهرى بكره على اشده …. الكل حيهرى و يفتي و يزايد و ينظر كالعادة …. و مع إننا نزلنا 3 مقالات مفصلة على الموضوع ده … و قلنا مش حنتكلم فيه تاني … و عشان مش عايزين نخش في مهاترات و مزايدات فارغة مع الجهلاء و المزايدين …. و لاننا اتعودنا على تأصيل الامور …. فالمقال النهاردة حيكون صغير .. وحنجاوب في نقاط محددة ، وباختصار على ماذا و لماذا و كيف … و اللى عايز يستزيد من المعلومات … ممكن يراجع المقالات السابقة.
أولا .. الجزيرتين سعوديتين حقاً و صدقاً …. و ده مش كلامنا … ده كلام الوثائق الرسمية ( مش المضروبة ) و كلام الدولة المصرية بسلطاتها الرسمية على مدار عقود …. و اللى تبلور تماماً في إبريل عام 1990 بعد اعتراف مصر رسمياً بقرار وزاري رسمي في وثائق رسمية بــ سعودية الجزيرتين … و تم توثيق الوثائق دي بالاشتراك مع السعودية بالامم المتحده ….. و تم الاتفاق على تسليم الجزيرتين لاحقا حسب الوضع الجيوسياسي الدولي للمنطقة بالاتفاق مع السعودية ….. يعني الكلام اصلا محسوم و مش محتاج مزايدات و لا حكم محكمة إجراءات مصرية لا يعترف بها بالعلاقات الدولية اصلا .
ثانياً .. الكلام ده بالكامل والخاص بالجزيرتين و وضعهم القانوني بيتم تدريسه بالتفصيل في مواد القانون الدولي بكليات الحقوق منذ عقود ….. و اللى بــ يتم فيه شرح وضع الجزيرتين كمثال على كيفية ادارة جزيرة او مدينة من قبل دولة ، وهى تابعة لدولة اخرى .
ثالثاً .. ما حدث الان مع السعودية ان مصر و رغما عن انف القوى الدولية … فرضت ارادتها في الاستفاده من ثرواتها البحرية المتمثلة في الغاز و النفط و اللى كان عليها المعركه اللى شايفينها من خمس سنوات و اللى بسببها تم تفكيك دول و تهجير شعوبها … و عشان ده يتم … كان لازم ترسيم الحدود البحرية … و اللى تم في البحر المتوسط … و اللى كان نتيجته …. اننا حنبدأ ناخد عائد الانتاج بتاعه كمان 6 شهور من الان ….. و بالمثل … كان لازم يتم الترسيم في البحر الاحمر … يعني مع السعوديه .
رابعاً .. و لان المزايدين كتير …. فــ ضحكوا على الناس و اطلقوا على الاتفاقية الموقعة بين مصر و السعودية … اتفاقية تسليم الجزيرتين …. مع ان الاتفاقية اصلا هي اتفاقية ترسيم حدود بحرية من حدود مصر البحرية شمالا الى حدود مصر البحرية جنوباً … و طبعا كان من ضمنهم الجزيرتين اللى اصلا مفيش عليهم مشكله باعتراف مصر رسمياً و دولياً من زماااااان بسعوديتهم .
و طبعا .. و لان الناس الكيوت الوطنيين امثال الاخوان و سكس ابريل و اليساريين الجدد و غيرهم من الاعلاميين اللى بيشتغلوا بالزمبلك …. وبيموتوا في تراب البلد و بيعشقوا مصر و جيشها و شعبها …. قاموا نزلوا عشرات الوثائق و الخرائط المضروبة …. و مئات من الاحاديث و المقالات و الفيديوهات المستندة الى الوثائق المضروبة دي عشان يأكدوا على حاجة واحدة بس …. انه بعد تأكيدهم إن سيسي كاتل سيسي خائن …. انتقلوا الى ان مؤسسات الدوله الوطنية جميعها كاتل و خائن ….. يعني مؤسسات الدولة من الخارجية و المخابرات العامة و المخابرات الحربية و المؤسسة العسكرية و الخبراء القانونيين و غيرهم على مدي عقود سواء في عهد السادات او مبارك او السيسي عبارة عن مجموعة من الافاقين و الحرامية … أخدوا رشاوي و باعوا الارض …. فــ يالاّ بينا ننزل نشيل الناس دول و نفضحهم و نرجع بقي الناس الوطنيين اللى على حق اللى بيخافوا على التراب الوطني و اللى بالفعل كل افعالهم على الارض بتدعوا الى حرق و تدمير كل ما يدّعون المحافظة عليه بكراهية عجيبة.
و اللى يأكد الكلام ده …. إن كل الخرائط و الوثائق اللى صدعونا بيها طوال الكام شهر اللى فات انهم حياخدوها للمحكمة …. صفصفت على وثيقتين فقط … الاولى اتفاقية 1840 و اللى كانت ملهاش علاقه أصلا بالحدود البحرية …. و الثاني كتاب تاريخ لمؤرخ لبناني كل انتاجه طول حياته فقط ثلاث كتب منهم كتابين في تاريخ الطبيخ و الاكلات الشعبيه … 🙂
وأخيراً … الاختلاف القانوني الان داخل المحاكم هو اختلاف اجرائي … و مالهوش دعوة خاااالص بأصل الموضوع لان المحاكم كلها مالهاش اي سلطة قانونية على ما يخص اعمال السيادة …. فكان الاختلاف على مين وقع الاتفاقية …. و هل رئيس الوزراء له الحق و لا المفروض الرئيس …. لكن أصل الموضوع و أحقية اصحاب الارض فيها محدش يقدر يقرب لها أبداً …
الخلاصة :-
———-
العلاقات الدولية و ما يختص بالسيادة و الحدود الدولية …. يتم اقرارها بالوثائق الرسمية و المعاهدات الدولية الموثقة …. و اي كلام تاني زي الصحفي الفلاني قال ، و المؤرخ العلاني قال ، و الخطاب الشعبوى بهدف مناورات سياسية من الزعيم الفلاني اللى بيقول …. كل ده يعتبر في عرف السياسة الدولية …. كلام خالتي اللتاته و ستى قالت ….. لإن فى الحالات اللى زى دى ، الوثائق الرسمية الموثقة هي الفيصل و هى ما يؤخذ بها 🙂
الجزيرتين سعوديتين .. و أيّاً كان حكم المحكمه غداً … و أيا كان رد فعل المزايدين …. فــ مصير الجزيرتين حيكون بما يتلائم و يتوافق مع الامن القومي المصري و العربي … يعني في مصلحة الجميع ….
و احنا مش هــ ندخل في مهاترات المزايدين و لا الأفاقين الغوغائيين …. اللى بيقولوا باعوا التراب الوطني و الكلام العبيط ده …. لان المؤسسات الوطنية اللى دافعت عن حضرتك و شالت فشلك و و اتحملت تدميرك لبلدك و فشل اختياراتك السنين اللى فاتت لما إنت سلّمت بلدك للفشل والضياع بإيدك ، و دعّمت تنظيمات ارهابية سواء دينية او يسارية عميلة …. مش هي اللى تبيع أرضها بالفلوس .. وإلّا كنت شوفت جيشنا بيحارب بالفلوس في اليمن و العراق و سوريا و ليبيا .. و ماكانش اتمنع عننا السياحة و لا البترول و لا المعونات …..
أصل الهدف مش مصلحة البلد اللى كلهم كانوا بــ يتفننوا في تدميره بكل كراهية … لكن الهدف انهم يقنعوك ان المؤسسات الوطنية على مر العصور هي مؤسسات عميلة و مرتزقة …. ده هدفهم و أمنياتهم …. و نرجع و نقول … التفكير بالتمني
و نقول كمان …..
الخبراء العسكريين و الامنيين و السياسيين و الاقتصاديين و خبراء الـدي ان ايه و المفرقعات يريحوا يشويه …..
اما خبراء القانون الدولي و الخرائط و المواثيق الدوليه و خبراء الوطنية و الإنتماء الحنجورى … فــ معلش … اتأخرنا عليكم …. الميكرفون معاكم دلوقتى 😉 🙂