27 Apr 2017
مؤتمر الشباب بين الحقيقة المرة والأمل
—————————————
المؤتمر الشهرى للمصالحة والمكاشفة .. إللى بيعمله الرئيس بشكل دورى، واللى موجه بالأساس للشباب .. طب لييه الشباب .. علشان هم إللى هيشيلوا شيلة المستقبل .. علشان لو ماكانوش فاهمين وواعيين .. بلدنا ممكن تضيع من ايدينا .. وعلشان الحرب الحديثة زى ما السيسى قال هى حرب عقول واعلام وإرهاب….
طب تعالو كدة نشوف بعض ما قاله السيسى.. واتكلم فى اييه .. وبعض ما ورد من معلومات على مدار ايام المؤتمر
السيسى قال ان برنامج تكافل وكرامة إللى بيدعم الفقراء ارتفع من 3.5 مليار إلى 78 مليار جنيه .. و ظى كانت مفاجأة لينا انه يوصل للرقم ده .. علشان بس إللى دايما بيتكلموا عن الفقراء وبإسمهم
السيسى قال ان دعم الكهرباء بيكلف الدولة ٣٣٠ مليار جنيه … انتم واخدين بالكم من الأرقام!!؟؟ … وكان نفسى يقول لكم مصر بتصرف على العيش قد اييه فى السنة .. علشان إللى فاكر إدارة دولة زى مصر شئ سهل وانه ممكن يدورها من على الفيسبوك أو بتويتة !!!
السيسى قال ان مرتبات الدولة ارتفعت فى خلال ٤ سنوات من ٨٠ مليار إلى ٢٢٠ مليار جنيه … وعلى فكرة .. علشان فيه ناس احنا عارفينهم هاينطوا فى النقطة دى … ف الرقم ده مالوش علاقة لا بالجيش ولا بالقضاء
السيسى قال ان النمو السكاني هو أكبر التحديات وقال اننا علشان نحد من الإحساس بالمعيشة الصعبة يبقى لازم ننتج علشان اقتصادنا ينموا بمعدل مش اقل من ٧% سنويا علشان يقدر يجابه النمو السكاني . .. وان الهدف من كل المشروعات إللى بتتعمل اننا نبقى دولة محترمة تقدر تحقق معدلات نمو اقتصادية محترمة وبالتالى معدلات دخل معقولة
السيسى قال ان دول كتير من أصحاب التجارب الناجحة .. زى الصين مثلا .. لجأت لقرارات واجراءات استثنائية على حساب الشعب لمدة سنين طويلة منها منع الإنجاب مثلا … وانه مش عايز يعمل أى قرارات استثنائية حرصا منه على الشعب … وان دولة زى الصين قفلت على نفسها وقعدت تنتج وتحقق معدلات نمو تتخطى ال ١٠% لمدة سنين علشان تبقى دولة عظمى … واللى عمل كدة هو الشعب
السيسى قال انه بيدير الدولة بحكمة وبمساعدة الجيش وبيحاول طول الوقت يجنب الدولة السقوط فى حرب أهلية واللى بيتم محاولة الدفع باتجاهها بشتى الطرق من ايام حكم الاخوان .. وساعتها الجيش كان هيقف محتاس ومش عارف يعمل اييه ويقف مع مين ضد مين ويحجز بين مين ومين
السيسى قال ان الجيش بيقوم بدور موازى لدور للدولة علشان يقوم الاقتصاد … وقال “انا مشغل الجيش تحت رجليكم بقاله كام سنة عشان البلد دي ماتقعش” .. ياترى زعلت على نفسك لما قال كدة والا زعلت على جيشك وكرامته إللى انت ممرمطها معاك وكمان مش عاجبك !!؟
السيسى قال ان الرقابة على الاستهلاك عملية مشتركة بين الشعب والدولة .. وقال أن الدولة عندها إرادة حقيقية لمحاربة الفساد .. واول واهم وسيلة لمكافحة الفساد هو تحييد العامل البشرى ….. طب بذمتك الكلمة دى كمان مازعلتكش على نفسك وخلتك تحس قد اييه انت مساهم فى المأساة إللى احنا بنعيشها النهاردة !!؟
اتقال فى خلال المؤتمر ان مشروع ال ٢٢٠ مليار جنيه لدعم المشروعات الصغيرة والمتناهية الصغر موجودة .. وبيتم الاستفادة منها بالفعل من بعض الشباب .. لكن الشباب بيبحث عن المشاريع الريعية وليس الإنتاجية …. طب ده كمان ما خلاكش تتكسف من نفسك وتحس انك قد اييه مقصر فى حق بلدك !!؟؟
السيسى قال انه تم تزييف الوعى لدى الشعب على مدار سنين علشان الناس تنزل الشارع ……. وده من وجهة نظرنا مش إنكار مساوئ العصر السابق .. لكن يخلينا نفكر تانى وتالت ورابع … هى اللعبة على عقولنا كانت اييه وهدفها اييه !!؟
السيسى قال ان رفع قدرات مصر العسكرية ده كان خيار استراتيجى لأحداث التوازن فى المنطقة .. بعد انهيار الدول الأخرى بجيوشها .. واننا دولة مسالمة وليست معتدية . . لكن إللى هيقرب من حدودنا هيشوف .. واحنا بنعتبر أن ده أهم ما قاله السيسى وتأكيد إللى قولناه كتير قبل كدة .. واللى عايز يجرب بجد …. يبقى يقرب
السيسى اتكلم مرة أخرى عن الوعى وعن الأرقام ومدى خطورة تداول ارقام مغلوطة لأنك لو عملت كدة بتساهم سواء عن جهل أو عن عمد فى تزييف الوعى لدى المجتمع … وبتعمل زى عدوك بالضبط … واننا لازم نخلى بالنا لأن الهدف هو إسقاط الدولة دى أو على الأقل تحييدها
السيسى قال انه عارف انه فيه قطاع من الشعب تعبان … وان البعض يمكن غضبان .. لكن فكر كويس قبل ماتغضب .. ياترى غضبك هيوديك لحد فين … وبيتهيألنا اننا قولنا قبل كدة على الصفحة هنا انه المطلوب مننا اننا نغضب .. مش كدة
السيسي قال انه بيبنى دولة .. وانه مش هيبيع الوهم للناس و يقول لهم العيشة وردى ويديهم فلوس عشان يحافظ علي الشعبية و بعدين يمشي و ييجي اللى بعده يلاقيها خربت و مش هتعمر تاني .. وانه أخد القرارات الصعبة .. وان كل واحد لازم يشتغل و يتعب علشان البلد دى تقوم
السيسى اتكلم عن تيران وصنافير وقال اننا كنا صريحين مع أشقائنا من البداية، وقولنا اننا هنعمل إللى علينا فى الشق الفنى لدراسة إعادة ترسيم الحدود البحرية .. لكن الكلمة الأولى والأخيرة للقضاء وللبرلمان … واخد بالك انت يا عم الحاج !!؟؟ 😊
السيسى اتكلم عن تعويم الجنيه وقال انه كان ضرورة ملحة علشان مايفضلش المواطن عايم فى مية اللفت .. وعايش واقع اقتصادى مزيف .. وقال كمان بعض فوائد التعويم وهو ارتفاع حجم الصادرات .. الخ الخ ….
وغيره كتير كتير كتير كلام وإشارات وتأكيدات على مدار ٣ ايام المؤتمر ، مما يضيق المقال بذكره ..
والسؤال هنا ….
اييه إللى قاله السيسى فى خلال أيام المؤتمر سواء بأسلوب مباشر أو غير مباشر ، خرج عن إللى تناولناه هنا على الصفحة ونشرنا فيه مقالات مطولة وناقشناه مع أصدقاء الصفحة على مدار ال ٣ سنين ونص إللى فاتوا !!؟؟ .. واتفقنا واختلفنا واتخانقنا واتصافينا …… وخصوصا ان معظم الكلام أصبح الآن أمامنا واقع ملموس شايفينه على الارض
الكلام ده مش مدعاة للتفاخر مننا .. لكنه فقط دعوة دائمة لإعمال العقل والمنطق واختيار أدوات البحث عن المعلومة وتصحيح المصادر والبعد عن الشخصنة وعدم وضع المصالح الشخصية قبل مصلحة الوطن والتفكير بموضوعية وحيادية وتجرد … واحنا كفريق عمل الصفحة بنعتقد اننا نجحنا كلنا مع أصدقائنا فى صفحة كلام فى الصميم اننا تصحح مفاهيم كتيرة على مدار السنين إللى فاتت ، واننا نخرج من حالة السلبية إللى تم وضع قطاع كبير من الشعب المصرى فيها عن عمد .. وبقينا مؤثرين فى المحيط بتاعنا بشكل ايجابى .. ومش كدة وبس .. لكن كمان شوفنا نتيجة ده على حياتنا الشخصية .. وعلى مستقبل الوطن إللى بدأ ينور … لأننا مش لوحدنا إللى بنعمل كدة .. لكن فيه غيرنا كتير بيبنى البلد .. ويوصل الليل بالنهار علشان البلد دى تعدى …
وهتعدى بإذن الله …
لأن ربنا دايما بينصر أصحاب القضايا العادلة