أخبار على الطاير

12 May 2017

أخبار على الطاير

—————- 

طبعاً كلنا بدون إستثناء عدت علينا أخبار الهري اللى حصلت فى الكام يوم اللى فاتوا .. من أول موضوع لاعب المصارعة المصرى الهارب .. لموضوع بيع الكلية الحربية  .. ومرورا بحدوتة قناة المارلبورو .. وخزعبلات المدعو يوسف زيدان فى ضيافة الإعلامى المهيصاتى إياه ، وحديثه المغلوط عن صلاح الدين الأيوبى وما إستتبعه ذلك من هري على كل المواقع .. لموضوع تصريحات الشيخ سالم عبد الجليل الطائفية .. للحديث عن عبد الناصر والإسائة له كالعادة ، وتخريفة عدم جدوى تاميم القناة وعدم جدوى بناء السد العالى من الأساس .. ووصولا للهرية الكبيرة بتاعة خروج مصر من التصنيف العالمى للتعليم .. ألخ ألخ ألخ …

ووسط كل الهرى ده .. تبرز التساؤلات من حين لأخر .. طب وهى فين الدولة !؟ .. وليه سايبة ده كله يحصل !؟ .. ولييه لا يتم سن القوانين الرادعة لمواجهة الشائعات !؟ .. وهى الدولة مشغولة بإييه !!؟؟ .. إلى أخر ذلك من التساؤلات 🙂 .. والحقيقة اللى إحنا بنأكد عليها .. واللى قولناها كتير قبل كدة .. إن سن القوانين والتشريعات هو مسئولية مجلس الشعب الموقر ، ونوابه الأفاضل .. لأن المجلس طبقا للقانون والدستور ، هو المنوط به سن التشريعات وإعداد القوانين عن طريق لجانه المتخصصة ..

طب الدولة بقى مشغولة بإييه …. الدولة مش فاضية للهرى ده .. برغم إنها بتكذّب الشائعات أول بأول .. وبتواجه محاولات جر المجتمع للفتنة .. وعندها صفحة مركز المعلومات ودعم إتخاذ القرار ، واللى بترد على كل الشائعات بصفة دورية .. وحسب كم الشائعات دى وتوقيتات ظهورها … لكن برضوا الدولة مش فاضية للهرى ده .. لأنها عندها الأهم .. وطبعا مش محتاجين نقول ونأكد على كلامنا ومقالاتنا والفيديوهات اللى نشرناها قبل كدة ، إن الأهم ده هو النهوض بالدولة .. وحماية المكتسبات اللى بيتم تحقيقها .. وتدعيم أركان الدولة والحفاظ عليها من الإنهيار … ومعانا النهاردة مجرد امثلة من الأخبار توضح مصر بتعمل إييه ومشغولة بإييه .. فى الوقت اللى اعدائها يا عينى ، مش قادرين يعملوا حاجة غير إنهم يفبركوا شائعات ..  ومعتمدين فى كدة على بعض المعاتيه وكذابين الزفة والمغيبين والجهلة اللى بــ يتطوعوا مشكورين لنشر الشائعات دى بكل إجتهاد وأمانة الحقيقة 🙂 .. بجد حاجة تكسف 🙁

  • الخبر الأول:

و ده تم نشره على موقع  سي ان بي سي الإخبارى .. وهو إن مصر تقلص اعتمادها على الغاز المستورد مع الزيادة الكبيرة في الإنتاج المحلى .. وقال الموقع بتاريخ 11 مايو 2017 ، أن مصر تجري محادثات مع موردي الغاز الطبيعي المسال لتأجيل شحنات مُتعاقد عليها لهذا العام وتهدف لخفض المشتريات في 2018 مع ارتفاع كبير في إنتاج الغاز المحلي وهو ما قلّص الطلب على الغاز المستورد الأعلى تكلفة.

وذكر كمان موقع سكاى نيوز على نفس الموضوع تحت عنوان “مصر ورعب موردي الغاز.. حقل “عملاق” وآخر “أدهش الجميع” .. تعليقاً على إكتشافات مصر الأخيرة من الغاز .. إن شركة إيغاس خفضت خطط مشتريات الغاز الطبيعي المسال لعام 2018 من 70 شحنة إلى 30 شحنة، في إشارة إلى انسحاب أحد المستوردين الأسرع نمواً للغاز الطبيعي المسال من الساحة العالمية.

  • الخبر التانى:

تم تشغيل التوربينة الغازية رقم 5 في محطة كهرباء بني سويف واللى بــ تعد الأكبر على مستوى العالم .. من إجمالي عدد 8 توربينات غازية + 4 بخارية .. وطبعاً الإعلام بتاعنا مش فاضى للحاجات الصغيرة دى .. أصل الحاجات دى مش بتجيب إعلانات .. فــ بدل ما يدوروا على المعلومات الإيجابية ، بــ يشتغلوا على الهرى والفضائحيات والأخبار المضروبة اللى بــ تتكتب على السوشيال ميديا من مصادر مجهولة !!!

  •  الخبر الثالث:

تعديل قانون المعاشات يجرى على قدم وساق فيما يخص موضوع المعاش المبكر .. وإن ما يقرب من 2 مليون موظف بالجهاز الإدارى للدولة ، مستنيين الامتيازات التى هــ تقدمها الدولة لهم لتشجعيهم على استخدام ميزة المعاش المبكر اللى نص عليها قانون الخدمة المدنية ، واللائحة التنفيذية للقانون ، … و بــ يتم حاليا داخل أروقة الحكومة ، دراسة موضوع مقدار المعاش الخاص بيهم بعد خروجهم من الخدمة مقارنة بمرتباتهم الحالية .. وكمان دراسة حالة الفراغ اللى هــ يتركه خروج العاملين دوول من الخدمة فى خلال سنتين نظرا للعد الهائل ، واللى بيمثل حوالى ثلث عدد العاملين بالحكومة والقطاع العام .. والموضوع ده من الأهداف الرئيسية و الإستراتيجية الداخلية للحكومة والرئاسة لمعالجة حالة الترهل فى الجهاز الإدارى للدولة.

  • الخبر الرابع:

اعلن المهندس طارق قابيل وزير التجارة والصناعة عن بدء طرح المرحلة الاولى من المجمعات الصناعية المجهزة بالتراخيص بمحافظات الصعيد امام المطورين الصناعيين واللى بــ تشمل 4 مجمعات بمحافظات الاقصر واسيوط وقنا وسوهاج … واللى بــ يأتى فى اطار خطة الوزارة الهادفة الى انشاء 8 مجمعات صناعية فى صعيد مصر ، تنفيذاً لتوجيهات الرئيس عبد الفتاح السيسى واللى اطلقها خلال مؤتمر الشباب الثانى باسوان فى يناير الماضى .. وأضاف الوزير ان مساحة المجمع الواحد تصل الى 300 ألف متر ويضم 200 مصنع صغير فى كل محافظة، مؤكداً أن تحقيق تنمية صناعية شاملة فى الصعيد تأتى على رأس اولويات الحكومة فى المرحلة الحالية.

  •  الخبر الخامس:

وهو الأهم .. واللى بيتعمل لحماية اللى إحنا ذكرناه فوق ده .. وغيره كتير من اللى مش بــ يتم الإعلان عنه .. زى التقدم الملحوظ فى إنشاء العاصمة الإدارية ، وبناء المنطق الصناعية فى العين السخنة ومحور التنمية وشرق التفريعة .. وتشغيل محطات المياه والكهرباء فى الصعيد …. والخبر ده هو إنهاء التعاقد على أسطول الطيران الحربى من المقاتلات الحربية الروسية ميج 35 بإجمالى 46 طائرة .. والصورة اللى فى المقال فيها صور الطائرات الجديدة مع بدأ التدريبات عليها .. ولو تلاحظوا إن الطائرات جزء منها بالتمويه الصحراوى .. وجزء بالتمويه البحرى .. 🙂

وطبعا مش محتاجين نقول إن أسطول الطائرات اللى بالتمويه البحرى ، هــ يكون مخصص لمهام الدعم البحري والاعتراض الجوي في المناطق الساحلية .. وجزء رئيسى من الدعم الجوي للأساطيل المصرية فى البحرين الأحمر والأبيض .. بالإضافة لحماية ابار الغاز ، وحماية بواخر تصدير الغاز المصري الى جنوب شرق اسيا و شمال المتوسط ….. يعنى حاملات الميسترال والفرقاطات البحرية والغواصات بالإضافة لباقى قطع الأسطول المصرى ، هــ تبقى لها غطاء جوى قوى ، يضاف لطائرات التمساح  كا 52  الخاصين بحاملات الميسترال … ونتوقع إنه فى القريب هــ تقوم القوات المسلحة بالإعلان عما يسمى بسلاح مشاة البحرية وسلاح الجو التابع للبحرية المصرية … وطبعا ماننساش طائرات الميج اللى بالتمويه الصحرواى ، مضافة إلى طائرات الرافال الفرنسية ، والــ  اف 16 الأميريكية ، علشان يبقى لمصر السيطرة التامة على حدودها ، وحدود امنها القومى والمجال الحيوى .. و ده اللى كان يقصده الرئيس السيسى فى مؤتمر الشباب الأخير واللى اشرنا له فى حينه لما قال إن مصر بتبنى جيشها علشان تحمى أمنها القومى ، وتعيد التوازن الإستراتيجى للمنطقة بعد سقوط دول العراق وسوريا واليمن .. وليبيا اللى بتكافح للعودة بمساعدة مصر …

صفقات السلاح الروسى لمصر تعبر عن توافق إستراتيجى وتعاون غير مسبوق بين الدولتين ، وتفاهم كبير فيما يخص الملفات الأمنية للمنطقة .. ناهينا عن الشراكة الإقتصادية فى موضوع الغاز ، وكمان المنطقة الصناعية الروسية فى شرق التفريعة .. وكل ده فيما لا يتعارض مع إستقلالية القرار المصرى والهوية السياسية وتوجهات الدولة المصرية .. و ده معناه إن العلاقة بين الدولتين اكبر بكتير من حصرها فى موضوع عودة السياحة الروسية .. واللى بنعتقد إن فيه إتفاق تام مع مصر فيما يخص الملف ده تحديداً وتوقيت عودة السياحة الغير معلوم بالنسبة لنا ، لكنه معلوم بالنسبة لدوائر صنع القرار .. فيما يتوافق مع صالح الدولتين معاً 😉  🙂

ياترى الإعلام المصرى الوطنى بتاع السجادة الحمرا ، فين بقى من الكلام ده … أاااه معلش .. نسيت .. اصل الكلام ده مابيأكلش عيش 🙂

 

حفظ الله مصر …

لمتابعة تعليقاتكم