22 Jul 2017
حفل التخرج .. و إفتتاح القاعدة العسكرية المصرية محمد نجيب ..
قوة ردع … و رسالة … وكلمة سر
————————————————————–
بعد تدشين حاملتى الطائرات ميسترال جمال عبد الناصر ، وأنور السادات .. تأتى اليوم القاعدة العسكرية محمد نجيب .. قاعدة مصرية بسواعد مصرية وعلى أرض مصرية …. شئ يشعرك إن القيادة المصرية الحالية بتعمل تخليد لتاريخ مصر .. التاريخ اللى التركيز دايماً على تدميره وتلويثه أمام الأجيال الجديدة .. فى محاولة لطمس هوية مصر التاريخية والعسكرية عن طريق تشويه كل قيادات ورموز مصر السابقين .. والنهاردة القيادة الحالية بتحاول تواجه الحملة الشرسة دى .. وبتخرج أجيال جديدة من أبناء المؤسسة العسكرية ، وهم بيشعروا بالإنتماء لتاريخ مصر .. وهو ده المعنى اللى قصده الرئيس السيسى وهو بيقول إننا مش بنعمل حاجة جديدة .. لكن بنبنى على ما سبق … و ده قمة إنكار الذات 🙂
قاعدة محمد نجيب العسكرية فى مدينة الحمّام فى الساحل الشمالى لمصر فى الاتجاه الاستراتيجي الغربي هي القاعدة العسكرية الأكبر على مستوى الشرق الأوسط وافريقيا .. تم إقامتها على مساحة 18ألف فدان وتقع فى مدينة الحمّام .. ومهمتها بالدرجة الأولى تأمين محطة الضبعة النووية وحقول البترول والحدود الغربية ونقطة إرتكاز لتأمين أبار المتوسط ، ونقطة إنطلاق لتأمين مصر إستراتيجياً وبسط النفوذ على مساحات واسعة من المتوسط بالإضافة للعمل كظهير شرقى للجيش الليبى …
إفتتاح القاعدة اللى بتضم حوالى 1155 مبنى ومنشأة مختلفة لكافة الأنشطة والتخصصات .. يعنى من مبانى عسكرية لمسجد لقاعة مؤتمرات لقرية رياضية متكاملة لمزارع وأفدنة زراعية ومبانى سكن وإعاشة .. بالإضافة طبعا لميادين التدريب التخصصي زى ميادين الرماية التكتيكية الالكترونية …. ألخ ألخ ألخ .. بالتزامن مع تخرج دفعات جديدة من طلبة الكليات العسكرية .. وحضور الإفتتاح شخصيات عربية ذات حيثية دولية .. بالإضافة لكلمة الرئيس السيسى الموجعة .. كل ده كان يحمل العديد من الرسائل للداخل والخارج 😉 🙂
حضور شخصيات زى الشيخ محمد بن زايد، ولي عهد أبوظبي .. و الأمير سلمان بن حمد آل خليفة ولي عهد البحرين ، نائب القائد الأعلى والنائب الأول لرئيس مجلس الوزراء .. والأمير خالد الفيصل، أمير منطقة مكة ، ومستشار خادم الحرمين الشريفيين والممثل عنه بالحفل .. و الشيخ محمد الخالد الحمد الصباح ، ممثل أمير الكويت ووزير الدفاع ونائب رئيس مجلس الوزراء .. و الشيخ محمد أحمد، قائد الأركان العامة الموريتاني … بالإضافة للمشير خليفة حفتر، قائد الجيش الوطني الليبي .. ده رسالة للداخل والخارج بإن علاقات دول المقاطعة على ما يرام ، وإن سياساتهم واحدة .. وإن التوجه الحالى فيما يخص الملف القطرى مستمر كما هو .. وخصوصاً بعد الكلمة النارية اللى قالها الرئيس السيسى .. وكانت كلمة موجهة ومباشرة وقوية !
وجود المشير خليفة حفتر فى العرض العسكرى … رسالة قوية لشعب ليبيا … إن مصر واقفة فى ظهركم ومش هــ تسيبكم .. وكمان رسالة لأطراف تانية إننا بندعم ليبيا عسكريا وأمنيا ، وبموافقتهم .. ومش هــ نسيب ليبيا تروح !
العرض العسكرى نفسه ، بالإضافة لتخرج تخرج دفعات جديدة من الكليات والمعاهد العسكرية مجمعتين للمرة الأولى فى حفل واحد داخل القاعدة لتدعيم الجيش المصرى من مختلف التخصصات (هندسة وطب وتمريض وفرق قتالية … ألخ) ..كان رسالة قوة بــ تبعتها مصر لأطراف كتيرة جداً .. وكمان بتقول للعالم كله إن الجيش المصرى مؤسسة متكاملة .. وإننا عندنا أجيال صاعدة مسلحة بكل أسلحة العصر الحديث من علم وكمان ولاء لمصر .. وجاهزة لحماية بلدها والذود عنها ضد أعدائها .. يعنى عندنا مئات الألاف من مشروعات الشهداء .. وخصوصاً إن الإفتتاح ماكانش لقاعدة محمد نجيب بس لكن كمان قاعدة برانى العسكرية بالإضافة للتطوير الإدارى لفرقتين مشاه ومدرعات .. واللى يعتبر إستمراراً لجهود القوات المسلحة فى تطوير منطوماتها وقدراتها القتالية على كافة الإتجاهات الإستراتيجية.
تخرج بعض الكوادر ممن ينتمون لدول أخرى زى ليبيا والإمارات والبحرين من مؤسسة القوات المسلحة المصرية بيبعت رسالة إن الجيش المصرى هــ يفضل هو الحاضن والمفرخ لكوادر جيوش المنطقة .. وهــ تفضل مصر جزء من عقيدة شعوب وجيوش المنطقة .. مهما إتعمل .. ومهما حاول أعداء مصر من محاولات لهدم مصر فعليا أو حتى فى نفوس شعوب ودول المنطقة .. إلا من بعض الرعاع المنتمين للفكر الخربان بتاع الجماعة وكلابهم وأذنابهم واللى بيشغلوعم !
كلمة الرئيس السيسى المرتجلة اللى خارج الكلمة الرسمية واللى قال فيها ساخراً من اللى عايزين يتدخلوا فى شئون مصر .. إن مصر لما بتعمل مشروع إسكان بيبقى قد مجموع سكان دول كاملة .. وإن الشعب المصري بيفطر ويتغدى ويتعشى في يوم واحد بما يعادل ميزانية دولة من اللي عاوزين يتدخلوا في شئوننا … تعرف ايه انت عن مصر !!؟؟ .. خليك فى حالك احسن لك =D =D =D
خليك فى حالك أحسن دى مش مجرد كلمة أو نصيحة .. لكن دى رسالة انذار .. 🙂
وأخيراً … كلمة السر اللى قالها الرئيس السيسى فى كلمته النهاردة ..
كلمة السر اللى العالم كله عارفها .. ماعدى المصريين .. أو بعض المصريين !!
كلمة السر دى لما قال “أنا مسنود عليكم يا شعب مصر” 🙂 … أيوة .. برغم كل اللى بيحصل .. وبرغم الصعوبات والتحديات اللى المصريين بيواجهوها .. لكنهم مش قادرين يصدقوا إنهم بيعملوا معجزة حقيقية .. معجزة بكل المقاييس .. معجزة إسمها الصمود والتحدى .. وإنهم الظهير الشعبى القوى للرئاسة وللجيش .. وإن لولاهم ، ماكانتش الدولة دى فضلت واقفة على رجليها .. وماكنش فيه أى حاجة من كل الإنجازات اللى حاصلة دى تمت .. وعلشان الخارج عارفين كدة .. فاللعب كله طول الوقت على ضرب اللُّحمة الوطنية للمصريين والروح المعنوية للشعب المصرى .. والأهم هو فك الإرتباط بين الشعب ومؤسسته العسكرية …. ولو مش مصدقين إنكم يامصريين إنتم اللى حميتوا بلدكم .. بصوا حواليكم وشوفا الشعوب اللى ضيعت بلادها .. علشان تعرفوا قيمتكم ..
حفل تخرج كتائب أبناء مصر .. و إفتتاح وتطوير القواعد العسكرية المصرية النهاردة .. هو فعلا قوة ردع … و رسالة … وكلمة سر .. !!