26 Apr 2015
العهر الإخوانى فى فقه الجهاد
—————————-
الدنيا إتقلبت .. وقامت وما ماقعدتش .. بعد تصريحات الفتاة الاخوانية المنشقة فاطمة يوسف .. و إعترافها بإنها كانت بــ تفبرك شهادتها .. وكانت بتدعى بالكذب إنها تم إغتصابها على إيديين ضباط الشرطة فى قسم المرج .. ولما المذيعة سألتها إنتى ازاى قدرتى تقولى على نفسك كدة .. كان الرد الواضح والمباشر بإنها كانت مقتنعة انها بتعمل كدة فى سبيل الله !!!
الواقعة دى هى حل اللغز للى مش فاهم أو اللى مش عايز يفهم العقلية الاخوانية والمبادئ الإخوانية ..
إكذب حتى يصدقك الناس ….. “عقيدة راسخة إتربى عليها كل إخوانى طالما كان الكذب فى سبيل الله بشهادتهم مش بشهادة حد تانى”
الغاية تبرر الوسيلة .. “مبدأ مكيافيلى بغيض تم غرسه فى نفوس كل اللى بــ ينتموا للجماعة من صغرهم”
كل الوسائل من قتل وكذب وحرق وتدليس ومتاجرة بالدين واتهام بالباطل وهتك اعراض وعمالة وخيانة .. حلالٌ ، حلالٌ ، حلالٌ ، طالما فى سبيل الله .. “طب لما ده يكون فى سبيل الله ، أمّال اللى فى سبيل الشيطان يبقى عامل ازاى” 🙁
والمبادئ دى فيه غيرها كثيييير .. لكن ده مش موضوعنا دلوقتى
المشكلة الاكبر بقى .. مش إن البنت كذبت كدة ووافقت انها تلطخ شرفها بنفسها كدة .. ولا ان ناس تانية هى اللى عملت لها غسيل مخ وهى اللى حرضتها على كدة … ﻷ … لكن المشكلة فى ان أبوها كان موافق على كدة و بــ يأيدها كمان .. وأهو كله فى سبيل الله !!!!! .. واللى هو سبحانه أعز وأعلى وأجل من أن يُلصق إسمه بمثل هذه الحقارة الإنسانية فى الفكر العقدى والمجتمعى !!
اللى حصل ده مجرد رسالة وتعرية مش أكثر ، للفكر الاخوانى المنعدم المبادئ والمفتقد لكل مايمت للأخلاق والضمير بصلة .. و الكلام ده علشان بس اللى بيتكلموا عن المصالحة يعرفوا حجم الكارثة اللى عايزين يرتكبوها فى حق مصر وفى حق الشعب المصرى بالعودة لدمج أصحاب فكر سافل حقير ماعندوش ضمير زى ده ، داخل المجتمع مرة ثانية .. ﻷ وكمان .. يبقوا فصيل سياسى =D =D
و إفتكروا إن عبد الناصر آمن لهم وكانت النتيجة محاولة إغتياله فى المنشية .. والسادات آمن لهم وكانت النتيجة إغتياله فعلياً فى حادثة المنصة الشهيرة .. ومبارك عمل معاهم اتفاق واستخدمهم كفزاعة .. وهم رضوا بكدة مؤقتا واشتغلوا نخر زى السوس فى عظام الدولة لغاية ما جائت لهم الفرصة علشان يقلبوا البلد على دماغ الكل !!
كلمة اخيرة ..
على مر العصور .. و بــ مختلف الملل والديانات .. هــ نلاقى إن أحقر الشرائح الانسانية على الإطلاق هم تجار الدين .. والتاريخ يشهد بكدة للى بيقرأ فقط .. لكن أحقر تجار الدين بلا منازع واللى تفوقوا على الجميع بكل جدارة هم فصيل الاخوان .. و ييجى وراهم ، المتعاطفين معاهم
والكلام ده مش افتراء .. لكن ده بإعتراف مباشر وصريح ، فى مناسبات كتيييييير من كل المنشقين عن الجماعة .. على مبدأ “وشهد شاهد من أهلها” ..
اللهم إحفظ مصر من كل سوء