16 Feb 2015
رسائل الى سيادة المواطن مصري
———————————
بعد قتل التنظيم الامريكاني ل 21 مصري في ليبيا … و بدون مقدمات و في رسائل محدده …. ياريت القراءه بعناية و تركيز .
- الامريكان خلصوا على جيش العراق و سوريا … و التركيز الان على الجيش المصري …. و لان الوقت مش في صالحهم خاااالص … حاولوا باستماته يفككوه لان الصدام معاه مكلف جدا … فحاولوا يفكوه داخليا بصدامه مع الكتله الشعبيه المصريه فـ فشلوا … ثم استخدموا معه ما لم يستطيع اي جيش في العالم مواجهته باستهدافه بحرب العصابات في جبال سيناء و الصحراء الغربيه و فشلوا ….. فـ حاولوا يجروه الى العراق ثم سوريا ثم ليبيا ثم اليمن ثم الى ليبيا مره اخري.
- و لاننا في وقت حرب ….. و لاننا اتعودنا مع بعض اننا لا ننفعل مع الامور و بننظر الى الامور من فوق 🙂 ….. فالموضوع كان مترتب ليه كويس في الداخل باستهداف مسيحيين بالذات … و تقدروا تحددوا دلوقتي مين من الاعلاميين او السياسيين او الصفحات اللى على النت اللى بدأت في وقت متزامن و متناغم في ترديد نغمات يا إما طائفيه او ضد الدوله المصريه او المجتمع المصري ….. فكل من قام بتسخين الناس و طالب بدخول الجيش ليبيا بدون الانتظار لرد الدوله الرسمي او بدون الوضع في الاعتبار الظروف الدوليه المحيطه …. تعرف على طول انه شمال … 🙂 🙂 ….. و كل اعلامي او صحفي او سياسي طلب الانتظار و دعم الدوله المصريه هو شخص وطني حقيقي 🙂 🙂
- أهم ما لمسناه بالامس و حتي اليوم …. هو تمكن الدوله المصريه من اهم سلاح في حربها العالميه الحاليه و هو الوعي الشعبي 🙂 🙂 ….. ولان الوعي الشعبي في اوج تألقه … تقدروا تتابعوا تعليقات الناس العاديه في الشوارع و على صفحات التواصل الاجتماعي اللى كلها في لحظتها تنبهت للفخ … سيبكم من النوشتاء و الاخوان …… يعني بصراحه …. تحيا مصر و يحيا شعبها العظيم 🙂 🙂
- نيجي للرد المصري …. بصوا بقي …. ليبيا بالبلدي كده حـ تتكنس و يتم تنضيفها تماما …. لان مينفعش ان يكون فيه تنظيم ارهابي على حدودك بيستهدفك و تسيبه عايش بأمان …. طيب مهو منين دول كبري محضره فخ للجيش المصري داخل ليبيا و منين حيتم تنظيف ليبيا باستخدام الجيش المصري ؟؟؟ … هنا بقي مربط الفرس 🙂 🙂
- عشان تكونوا فاهمين … فيه دول كبيره محضره سلاح متطور جدا و ناس بيتم الصرف عليها و بيتم تدريبها و قوات خاصه بشكل غير رسمي و و تخديم لوجيستي و معلوماتي و في ظل حمايه جويه كمان و كل حاجه متحضره هناك و مستنيين الجيش المصري بفارغ الصبر …. لكن الفكره هنا انك لا ترقص على نغمات يعزفها عدوك … يعني ايه ؟؟؟ …. يعني الجيش المصري هو من يحدد مكان و معاد و كيفيه الحرب و ليس العدوا 🙂 🙂 …. أمال ايه اللى حيحصل ؟
- بص يا سيدي … و عشان تعرف ان مصر مش ساكته و ان فيه تحالف دولي فعلي يعمل بتناغم شديد ….. القصه هنا انه تم الترتيب من شهور بالقيام بتنظيف ليبيا و لكن بشكل قانوني أممي و ليس مصري صرف …. و اللى تابع مقالات مصر تتمدد خارجيا … حيعرف ان من اربع شهور اشرنا الى التحالف المصري الايطالي الفرنسي التشادي الجزائري في السياق ده …. و ده يفسر لينا سر زيارة السيسي الى ايطاليا ثم الى باريس …. و يفسر ايضا انفلات فرنسا عن امريكا و دعمها الى مصر و ده يبان جدا في صفقة التسليح الفرنسي المتطوره رغما عن انف الاعتراضات الامريكيه 🙂 🙂
- رئيس وزراء ايطاليا صرح رسميا من يومين ان ايطاليا لن تسمح بوجود تنظيم ارهابي في دوله على بعد ساعتين من حدودها بالقارب … و ان ايطاليا تعلن انها على استعداد انها تقود تحالف دولي عسكري على الارض للقضاء على داعش في ليبيا .
- فرنسا اعلنت اليوم انها تدعم مصر بشكل كامل في حربها ضد داعش ليبيا و تنتظر قرارا امميا
- مصر ارسلت وزير الخارجيه المصري الى نيويورك لانتزاع قرار اممي لوضع ليبيا تحت بند الفصل السابع من ميثاق الامم المتحده ليتم العمل الحقيقي امميا لتنظيف ليبيا تماما.
- نيجي بقي للزغلول الكبير بوتين … 🙂 🙂 …. من يومين انتزعت روسيا قرارا من مجلس الامن رغما عن انف امريكا لتجفيف منابع التمويل لتنظيم داعش و معاقبة الدول الداعمه لها …. و يوجد به تفاصيل كتير منها مثلا نقل الاموال و شراء النفط المسروق و علاج جرحاهم و نقل مقاتليهم عبر الحدود و غيره كتييييير …. يا خراب بيتك يا اردوغان انت او اوباما 🙂 🙂
- كده الدايره بتتقفل عليهم بإحكام شويه شويه …. و حتبقي بشكل دولي و من الدول المعنيه بالفعل بالامر و هي الدول اللى ليها حدود و مصالح مباشره … يعني التنفيذ مش حيبقي دعائي زي التحالف الخايب بتاع امريكا … لكن حيكون فاعل على الارض بالفعل 🙂 …. و حيكون لينا كلام كتير الفتره اللى جايه ..
- الضربه الجويه المصريه توضح حاجه مهمه جدا … ان الرد جه في اقل من 12 ساعه …. يعني انتم تحت عنينا و اهدافكم مرصوده بدقه و بيتم تحديثها كل ساعه …. و ان الجيش المصري لما يقرر يضربكم حيضربكم … لكن كله في وقته ….. دي بس عين حمرا … و ان الجيش المصري ناااااار لا يتلعب بيه و لا يتلعب معاه … قضى الامر الذي فيه تستفتيان .
- و لاننا في حالة حرب فعليه … فمطلوب توضيح بعض الامور ….
1) اللى بيقول فين الجيش المصري و ليه ضربهم دلوقتي بس … اقوله … ان الجيش المصري بيحارب بالفعل حرب شامله بالطائرات و المدرعات و الوحدات الخاصه و بمختلف الاسلحه من اكتر من سنه و نص و قتل منهم الالاف و يوميا بيقتل منهم العشرات سواء في سيناء او على الحدود الغربيه … بيحارب لوحده و محدش حاسس بيه و مطلبش مساعده من حد و عامة … بسم الله ما شاء الله … من اول ما مسك الفريق عسكر قيادة سيناء …. و الاخبار اللى بتيجي من هناك هي عباره عن ( مقتل – تصفيه ) و مفيش ( القبض على ) دي خاااالص 🙂 🙂 .
2) رجاء الامتناع عن نشر او مشاهده اي فيديوهات او منشورات بيذيعها العدو … لا تكن اداه داعمه له.
3) رجاء الامتناع عن دعم او مناقشة اي تابع لهم داخليا … سواء من التنظيم الارهابي او من يحترمهم او من النوشتاء او اصحاب القلوب المرهفه اللى بيزعلوا على دم الخاطفين و الارهابيين …. من يدعم العدو في وقت حرب فهو خائن … و وقت الحرب لا يوجد معارض و لكن يوجد خائن.
4) رجاء الامتناع عن انتقاد الجيش المصري او الضغط عليه او نشر اي معلومات او تحركات خاصه بالجيش المصري …. دعم الجيش المصري وقت الحرب فرض وطني .
5) الله يرضى عليكم … جنرالات المقاهي يسمعونا سكاتهم …. و يكفي ان ايام السادات … كان جنرالات المقاهي بينتقدوا و بيحطوا خطط و بينتقدوا لما كان الصهاينه يبعتوا لينا انهم بيدوسوا على جنودنا بالدبابات …. الراجل صبر … و هو اللى اختار معاد الحرب المناسب.
و اخيرا … تحيا مصر و عاش الجيش المصري العظيم
ملحوظه :- بالنسبه لصورة المقال … فصورة الطياريين المصريين هي صوره ارشيفيه … اما صورة الاعدام فهي صورة تخيليه مصدرها الانترنت … و لم يتسني لنا معرفة مصممها … فشكرا له على اي حال