21 Jan 2018
المرشح الرئاسى إبن الإييه .. !!
—————————-
فى الحقيقة إحنا ما كنّاش عايزين نتكلم عن المرشحين المحتملين لإنتخابات الرئاسة ، لأن الموضوع لسة سابق لأوانه .. لأنهم لحد دلوقتى لسة مجرد مرشحين محتملين ، إلى ان يتم غلق باب الترشح فى خلال أيام ، بعد عملية جمع التوكيلات وإنهاء الإجراءات الورقية والطبية والذى منه ، ثم تعلن الهيئة العليا للإنتخابات قبول ثم تمرير طلبات الترشح .. وساعتها يتحول المرشح المحتمل إلى مرشح رئاسى حقيقى .. لكن حالة الزخم اللى صاحبت المرشحين الرئاسيين المحتملين ، وهما المحامى خالد على ، والفريق سامى عنان .. وبالذات الفريق سامى عنان … وإلحاح كثير من اصدقائنا سواء من خلال التعليقات أو من خلال الرسائل المباشرة لإستيضاح الأمور .. جعلنا نقرر إننا نكتب فى هذا الموضوع ، علشان فقط نضع النقاط على الحروف من البداية … ونقول كلمة لكل المؤيدين للدولة والعاشقين لبدهم مصر ، والداعمين للتوجهات الحالية بكل عقلانية ، وبمنتهى الإدراك لكل ما تواجهه الدولة من تحديات
كنبذة مختصرة وسريعة عن خالد على .. فهو شخص يرتدى ثياب الثورية .. و بــ يجمع حواليه كل المحبين للشعارات الرنانة والبراقة ، اللى بــ تشعل الحماسة بمظهرها الخارجى بدون النظر للتفاصيل وإمكانيات التطبيق .. بنفس اسلوب المخدر اللى المدمن بياخده علشان ينسى واقع فشله .. وطبعاً الكلام مافيش أسهل منه … و ده اللى ظهر فى ملامح البرنامج الإنتخابى المقترح للسيد خالد على ، واللى اى شخص عادى سوىّ ، و يتسم بالحد الأدنى من المعرفة والعقلانة .. هــ يعرف على طول إن الشخص ده ، إما إنه شخص يبحث فقط عن زعامة مزيفة ، علشان الناس تصفق له وتشبع مركبات النقص اللى عنده بغض النظر عن البرنامج المخل المختل اللى هو طرحه ثقةً فى إن كل اللى حواليه من نفس عينته من المهيصاتية المتثورجين على روحهم …… وإما إنه شخص مغرض ، جاى ببرنامج إنتخابى ، هدفه الرئيسى هو هدم الدولة والنجاحات اللى إتحققت ، مش بشهادة المصريين ، لكن بشهادة المؤسسات الإقتصادية الدولية .. والعديد من رؤساء دول العالم !
أما الحديث عن ملامح البرنامج الإنتخابى للمرشح المحتمل خالد على .. فهو شئ مثير للغثيان .. وبالمختصر المفيد كدة .. سعادته أول ما يبقى رئيس ، عايز يراجع كل المشروعات القومية اللى تمت فى خلال السنين اللى فاتوا ، ويتأكد من مدى جدواها .. و ده كلام جميل وبرّاق ويشعل حماسة المغيبين .. لكن وبعدين .. يعنى لو ما لاقاش جدوى إقتصادية لمشروع منهم .. هــ يعمل إييه .. هــ يوقف المشروع ، وإلا هــ يهده .. يعنى هــ تردم قناة السويس الجديدة مثلا .. وإلا هــ يلغى إتفاقية الضبعة اللى هى إتفاقية دولية .. وإلا هــ يوقف إستثمارات بالمليارات فى العاصمة الإدارية ومعاها 12 مدينة أخرى .. وغيره وغيره من المشروعات … هو ده بقى الفكر الإقتصادى اللى حضرته جاى بيه !!؟؟ .. و ده طبعا غير اضحوكة ربط المرتبات بالتضخم ، واللى ياريت يقول لنا هــ تبقى إزاى !!؟ .. وأكثر شئ مضحك فى الموضوع هو حديثه عن مخاطر تاكل الأراضى الزراعية ، فى الوقت اللى مصر بتستصلح فيه 2.5 مليون فدان ، غير مشروع الــ 100 الف صوبة ….. وناهينا طبعاً عن الحديث عن إعادة هيكلة الشرطة والقضاء ، وتحييد القوات المسلحة عن العمل العام وشعارات الإخوان والسبوجية بتاعة “الكييش يركح لــ سكناتووو” تحت مسمى “العملية الثورية لاعادة بناء مؤسسات الدولة” … (أسماء وإسراء ووائل وسوكا ستايل) 🙂 !!
كل ده بالإضافة للحديث عن عودة منظمات المجتمع المدنى اللى هى اصلا فى حقيقتها مكاتب تجسس ممولة (ممدوح حمزة وإبراهيم عيسى ستايل) .. وإطلاق سراح السجناء والمعتقلين السياسيين (مرسى ستايل) .. لكن مرسى أطلق سراح الإرهابيين ، وهو جاى يكمل على النص الثانى اللى كانوا بيحرقوا البلد بالتضامن مع بعض تحت مسمى الثورة .. وكمان تسخين أهالى النوبة فى الجنوب (برادعى ستايل) .. و زود عليها إشراك أهالي سيناء في وضع سياسة جديدة تختص بها هذه المنطقة .. و ده بصراحة مش عارف إزاى .. يعنى النوبة وسيناء ، يشاركوا فى وضع سياسات مناطقهم وطز فى الحكومة المركزية .. و ده معناه التوجه لنظام كونفيدرالى .. يعنى تقسيم مصر فى صورة ليبرالية شيك … وطبعا سيناء والنوبة دى مجرد بداية ….. وتيجى بقى البونبوناية اللى فوق التورتة ، وهى حدوتة إلغاء إتفاقية ترسيم الحدود البحرية مع السعودية وبين قوسين (إستعادة تيران وصنافير) المعزوفة الموسيقية اللى بتلهب حماس المغيبين .. بالإضافة لشوية دباجات تانية عن الحريات والحقوق والتطهير ألخ الخ ألخ …. هو ده بقى الإطار العام لبرنامج الأستاذ خالد على
الفريق سامى عنان بقى ده قصة تانية .. واللى بدأ حملته ببيان إعلان ترشح ، أقل ما يوصف به إن بيان فج اللهجة ، وهجومى بشكل غير مبرر … والحقيقة إن سامى عنان ده راجل عسكرى وله مكانته فى مصر لأنه كان رئيس أركان القوات المسلحة فى يوم من الأيام .. ومعروف عنه من زمان ، إنه رجل أميريكا الأول فى مصر .. وانه احد الأشخاص اللى كان بيدفع بشدة لفتح مؤسسات الدولة للإخوان .. وبعد وصول الإخوان للحكم تم تعيينه مستشاراً لرئيس الجمهورية محمد مرسى …والنهاردة لما قرر يترشح للرئاسة بدون اى مقدمات ، واعلن ترشحه فى توقيت غريب جداً .. وكأنه كان عايز ناس تانيين تشوف بيان ترشحه فى حينه علشان فارق التوقيت … جاب فى حملته الإنتخابية الرجل الثانى بعده ونائبه فى حالة فوزه بالرئاسة ، المستشار هشام جنينة ، الرئيس السابق للجهاز المركزى للمحاسبات .. واللى كانت كل طوائف الإخوان بتدعمه ، وبتنادى به علشان يرشح نفسه للرئاسة … وطبعا برغم إن الفريق عنان ، له خلفية عسكرية مش جاى من إتحاد كرة اليد مثلا .. لكن سيتم دعمه من جانب الإخوان ، ومن خلفهم .. وإحنا كلنا طبعا عارفين مين 😉😊
وطبعا مش محتاجين نتكلم عن الأبواق الإعلامية والإعلاميين اللى زعلانين من هجوم مؤيديى الرئيس السيسى على المرشحين التانيين .. ده على أساس ان مؤيدى خالد على وسامى عنان ، بيفرقوا بوكيهات ورد على مؤيديى الدولة فى ثوبها الحالى .. و طبعا غير ما يتم التصريح والتلميح به ضد رئيس الدولة على مدار 4 سنوات كاملة .. لكن الإعلامى الشهير إياه مش زعلان من كدة ، بس زعلان علشان خالد على وسامى عنان 😄 … و ده غير فتح المجال للبكائيات والكربلائيات وإدعاءات التضييق على مناديب المرشحين … ومنع عمل التوكيلات .. وكأن الهدف من الترشح هو إيصال الصورة دى بالفعل .. لهدف فى نفس يعقوب ……. عموما ما علينا !!! 😊
كل اللى إحنا ذكرناه ده عن مرشحى الرئاسة ، مايهمناش حاليا فى شئ ، لأنهم لحد دلوقتى ، و زى ما قولنا قبل كدة مجرد مرشحان محتملان للرئاسة .. ومن هنا لحد ما يبقوا مرشحين حقيقيين .. إحنا يهمنا نتكلم عن اللى زعلانين من ترشح خالد على .. والقلقانين من ترشح سامى عنان .. واللى شاغلين نفسهم باللى كان يقصده الرئيس السيسى فى حواره فى مؤتمر حكاية وطن لما قال إنه مش هــ يسمح للفاسد إنه يقرب من كرسى الرئاسة ….. طب تزعل لييه !!؟؟ … وتقلق لييه !!؟؟ .. وتشغل بالك لييه !!؟؟ … وسواء كنت زعلان أو قلقان .. إنت دورك حاجة واحدة فقط .. إنك تدعم المرشح الرئاسى بتاعك بكل قوة .. وبدون اى تخاذل .. وبدون ثقة مبالغ فيها ، أو قلق مبالغ فيه !!
- زعلان من ترشح خالد على خوفاً على مصر من رجوع حالة الفوضى اللى كنا عليها فى السنين اللى فاتوا بعد ما بدأت مصر يادوب تتنفس .. يبقى تنزل وتحط صوتك فى الصندوق ، حتى لو هــ تتعب شوية .. لأن تعبك ده اقل بكتير من اللى ضحوا بعمرهم علشان الوطن ده يعيش !!
- قلقان من ترشح سامى عنان ، علشان خايف من دعم الإخوان له ودعم أميريكا .. إفتكر يوم 30 يونيو ، وإنك نزلت شيلت الإخوان كلهم ورميتهم برة مؤسسة الرئاسة هم وكل اللى بيدعموهم فى مشهد مهيب هــ يسجله التاريخ فى سجل اعظم الثورات على الإطلاق .. ثورة شعب انقذ أمة كاملة .. وزى ما عملتها قبل كدة ونزلت و حميت بلدك من الضياع .. يبقى تنزل المرة دى وتحط صوتك فى الصندوق ، حتى لو هــ تتعب شوية .. لأن تعبك ده اقل بكتير من اللى ضحوا بعمرهم علشان الوطن ده يعيش !!
- خايف إن حد تانى يفوز فى إنتخابات الرئاسة القادمة غير المرشح بتاعك .. إفتكر الإنتخابات الماضية لما نزلت إنت وعيلتك وأصدقائك فى مشهد إنتخابى مهيب تحدث عنه العالم كله .. وإقتنصت كرسى الرئاسة لصالح المرشح بتاعك باغلبية كاسحة .. وطالما إنت خايف يبقى دى فرصتك تانى علشان تنزل وتحط صوتك فى الصندوق ، حتى لو هــ تتعب شوية .. لأن تعبك ده اقل بكتير من اللى ضحوا بعمرهم علشان الوطن ده يعيش !!
- محتار وبتفكر فى الفاسد اللى الرئيس كان بيتكلم عليه .. صدقنى مش هــ تفرق معاك حاجة .. لأن ده دور الدولة بمؤسساتها ورئيسها .. لكن دورك إنت إنك تنزل وتحط صوتك فى الصندوق ، حتى لو هــ تتعب شوية .. لأن تعبك ده اقل بكتير من اللى ضحوا بعمرهم علشان الوطن ده يعيش !!
ده دورك اللى لازم تعمله وتأديه على أكمل وجه .. وماتسمحش لحد إنه يلعب بيك او يشوش افكارك ، أو يدخلك فى متاهات ماتشوفش فيها طريقك إييه …. حب مصر والخوف على مستقبلها .. افعال .. لا أقوال .. وخليك فاهم ومتأكد إن الحكاية مش شخص السيسي نفسه بقدر ما هي استمرار الحفاظ علي تثبيت أركان الدولة .. وهو ده اللى هم مش عايزينه
إنت عارف حقك وحق بلدك .. وعارف طريقك كويس .. وجاء الوقت اللى تستخدم فيه حقك علشان تاخد بإيد بلدك وكل اللى حواليك للطريق الصحيح …. وغير كدة يبقى كلام مايجيبش همه ..