06 Jan 2018
عندما يكون الجنون والمجون فى مواجهة الدولة القادرة !!
——————————————————–
فاصل من الكوميديا والضحك أصابنا وإحنا بنقرأ ونتابع تصريحات وزير الخارجية التركي “مولود داوود اوغلو” اللى أعلن إعتزام تركيا التنقيب عن البترول شرق المتوسط ، وقال إن تركيا بترفض اتفاقية مصر وقبرص لترسيم الحدود البحرية بينهم … بس الحقيقة هو ماكانش ضحك أوى .. لكنها كانت سخرية مع سعادة مليئة بالثقة .. مع يقين إن مصر بالفعل ، وكل المؤيدين للدولة المصرية فى ثوبها الحالى على الحق المبين 😊 … و هــ نشرح لحضراتكم ليه سخرية وسعادة وثقة ويقين فى نفس الوقت ..
السخرية كانت من التصريحات نفسها .. تصريحات بــ تعكس توتر و عصبية شديدة و قلة حيلة وعجز عن إيقاف تنامى قوة المارد المصرى اللى أصبح أمر واقع مفروض على الجميع شاء من شاء وأبى من أبى .. بل وأصبحت مصر ضيف دائم فى كل كوابيس أعداء مصر .. وعائق أمام تحقيق طموحاتهم وأحلامهم وتنفيذ مخططاتهم .. وخصوصاً لما نشوف بعنينا إنه فى الملف الإقتصادى فى موضوع الغاز أصبح أمر واقع .. ومصر خلاص بتستخرج الغاز من الحقل .. ومش كدة وبس .. لكن مصر كمان اعلنت مناقصة عالمية للتنقيب على الغاز والبترول فى 9 ابار كمان وفى أماكن إستكشافية سواء فى المتوسط أو حتى فى البحر الأحمر بعد إتفاقية ترسيم الحدود البحرية مع السعودية .. وطبعا غير إتفاقية ترسيم الحدود البحرية مع اليونان لإستكمال عملية ترسيم حدودنا البحرية فى مياه البحر المتوسط .. واللى لسة مش عارفين هــ تكون إمتى !!
أما السعادة فهى إنه كشف إن اللى بتعمله تركيا ده مش مجرد تصرف من نظام إخوانى مجنون لا هم له إلا إسقاط مصر .. لكنه تنفيذ لأوامر إسرائيلية ، إن لازم تركيا تلعب الدور ده مع مصر بحيث تفضل إسرائيل دايما خلف الستار .. واللى ياعينى اصابهم الجنون خلاص بعد الكشف الغازى بالإحتياطى الهائل ده لصالح مصر .. و ده غير الكشوف المتوقعة كمان سواء فى البحر المتوسط أو البحر الأحمر .. لدرجة إن إسرائيل من كتر صدمتها بحجم الإنتاج الهائل ده .. رايحة تبرشط على لبنان وتقول إن البلوك رقم 9 اللبنانى بتاع إسرائيل .. وقال وزير الدفاع الإسرائيلى أفيجدور ليبرمان إن العطاء اللبنانى على حدود البلدين أمر “استفزازى جدا” ودعا الشركات العالمية إلى عدم تقديم عروض .. و ده اللى جعل لبنان ترد على لسان الرئيس اللبنانى ميشال عون، إن تصريحات إسرائيلية اللى بــ تحث الشركات على عدم تقديم عروض لعطاء لبنانى للتنقيب فى حقل غاز المتوسط هو “تهديد للبنان”…… و وارد جداً جداً إن الموضوع يتطور إلى نزاع حقيقى كمحاولة من إسرائيل للسيطرة على ثروات المتوسط حتى لو أدى الأمر لإشعال المنطقة … و ده اللى خلّى إسرائيل مايبقاش أمامها غير تسليط كلبهم المدلل للنباح على مصرعلشان يحاول يعمل دوشة إعلامية وخلاص .. فى محاولة لإشغال مصر فى صراع من أى نوع عن إستكمال نهضتها الإقتصادية .. لكن على مين .. 😊
طب لييه السعادة مليئة بالثقة !؟ .. لسببين:
السبب الأول .. هو إن إتفاقية ترسيم الحدود البحرية بين مصر وقبرص هى إتفاقية قانونية تماماً .. وكمان تم إيداعها في الأمم المتحدة منذ إبرامها، و بناءً عليه ، بدأت مصر عمليات التنقيب في المياه الاقتصادية اللي حددتها الاتفاقية، لأن مصر ماكانش ممكن تقوم بالتنقيب عى الثروات الطبيعية فى مياه المتوسط وسط صمت العالم كله وجميع الدول المعنية بدون إتفاقية قانونية … مع الوضع فى الإعتبار إن اللجنة العليا لأعالى البحار بوزارة الخارجية هى اللى بــ تدير ملف الحدود البحرية وترسيمها مع دول الجوار .. وكله بالمستندات ومن خلال الأطر العلمية والجغرافية السليمة.
السبب الثانى .. هو تنامى القوة العسكرية المصرية بشكل غير مسبوق .. وبالذات القوة البحرية المصرية بشكل تسليحها الجديد بحاملات الطائرات المروحية ميسترال ، وإتمام إتفاقية طائرات التمساح K52 ، وتدعيم سلاح الغواصات بالغواصات الألمانية .. وإنشاء الأسطول البحرى الشمالى والجنوبى .. مع تدعيم القوة الجوية المصرية بطائرات الرافال صاحبة القوة الضاربة فى البعد الإستراتيجى لمحيط الأمن القومى المصرى .. ناهينا عن تحديث شبكة الدفاع الجوى المصرية بالمنظومة الروسية الحديثة .. وإنشاء قاعدة محمد نجيب العسكرية فى الساحل الشمالى المصرى بكل تجهيزاتها العسكرية ، بمساحة دولة صغيرة …. يعنى من الأخر اللى عمّال يرفّس ويدبدب فى الأرض ده .. عارف ومتأكد جدا إنه لو فكر يحط صباعه فقط داخل الحدود المصرية ، أو حاول يمس ثروات مصر الطبيعية ، أو يهدد أمنها القومى .. هو أو أى حد تانى أياً كان ….. هــ يتفرم !! .. واللى مش عاجبه يبقى يروح يشتكى فى القسم بقى 🙂
أما اليقين بإن مصر، وكل المؤيدين للدولة المصرية فى ثوبها الحالى على الحق المبين .. ده لأنه على مدار الكام سنة اللى فاتوا .. وبالذات فى السنتين الأخيرتين .. إتكشفت حاجات كتير أوى .. وإتفضحت مخططات ومؤامرات أكثر وأكثر .. وعلى لسان أصحابها .. واللى كنا بنتكلم فيه من أربع أو خمس سنوات على إنه خيال قابل للرفض أو التصديق .. أصبح الأن أمر واقع وواضح لكل ذى عينٍ ترى … لأنك لما تبقى قوى .. وبتتقدم وبتنجز .. وبتخطى للأمام بنجاح .. فى الحالة دى بــ يفقد أعدائك قدرتهم على التخفى والتلون .. ومابيبقاش أمامهم غير إنهم يكشفوا نفسهم بكل وضوح .. وفى منطقة الوضوح بــ تبقى إنت مستنيهم ، وجاهز لهم .. أوى …….
قطر الممول الأول للإرهاب فى العالم أعلنت فى أكثر من مناسبة عدائها الواضح لك .. و بتسلط عليه ألتها الإعلامية المباشرة والغير مباشرة علشان تهدك وتهد المجتمع والجيش .. وبهلول إسطنبول مش قادر يمسك نفسه .. وبيكشف نفسه بكل صفاقة .. و ده غير إعلانه قبل كدة عن إنه على خصومة مع النظام المصرى حتى عودة مرسى وإزاحة الإنقلاب … والنهاردة تلاقى تصريح على موقع “واللا” الإسرائيلى صادر من ضابط إسرائيلي رفيع المستوي بسلاح البحرية، بيقول فيه إن التطورات الحاصلة في قدرات البحرية المصرية تمثل خطراً علي تل أبيب، ووصف هذه التطورات بـ “المذهلة”.. وركّز تحديداً علي أن “التطور الحاصل بفرع سلاح الغواصات المصرية يمثل الخطر الأبرز علي تل أبيب .. فــ ياريت بقى مانسمعش حس خبراء السوشيال ميديا ، هم وألهة العجوة بتوعهم اللى بيرددوا كلامهم وراهم بدون أى تفكير وبيتسائلوا السؤال السخيف إياه بتاعهم “هى مصر بتشترى سلاح لييه !؟”
ياترى عرفنا مصر بتشترى سلاح لييه !!؟
ياترى عرفنا القيادة المصرية بتسابق الزمن فى كل الملفات لييه !!؟؟
ياترى عرفنا حجم الإنجاز ومعدلات العمل الغير مسبوقة بشهادة حتى الخبراء الأجانب والشركات العالمية الكبرى للإنشاءات .. كل ده كان لييه !!؟؟
ياترى عرفنا دلوقتى معنى التصريح اللى قالته كريستين لاغارد مدير عام صندوق النقد الدولى لما أشادت بالتجربة المصرية وقالت إن مصر حققت معجزة حقيقية بمعدلات غير مسبوقة فى تحقيق إصلاحات إقتصادية جذرية فى وقت قصير !؟
ياترى عرفنا دلوقتى لييه كانت كل مخططات الخراب والتخريب اللى حاصلة فى المنطقة ، واللى إرتدت زى ثورات الخراب العبرى .. طمعاً فى السيطرة على كل مقدرات وثروات المنطقة .. وإزاى إستخدمونا كلنا فى تدمير أوطاننا !!؟
والأهم من كل ده .. ياترى عرفنا إييه سر تصريحات الرئيس السيسى الأخيرة ، لما قال بصوت قوى هادر ، إن اللى حصل فى مصر من 7 سنوات مش هــ يتكرر تانى أبداً !!؟؟ ….. إوعى حد فيكم يكون فهم إنه كان موجه لشوية الأراجوزات وعرائس الماريونيت اللى فى الداخل .. واللى فقدوا كل تأثير على مجريات الأمور .. لأ .. دول أهون بكتير من إنهم يهزوا شعرة فى رأس مصر ، وإن كان التصريح يشملهم على الهامش كدة … لكن كلام الريئس كان موجه للأعدء الحقيقيين .. واللاعبين الأساسيين فى مؤامرة إسقاط المنطقة واللى شايفين إن مصر هى جائزتهم الكبرى !!
أعتقد إن الصورة أصبحت أوضح بكتييير دلوقتى … و
وتانى ….
اللى مش عاجبه اللى مصر بتعمله .. واللى لسة هــ تعمله .. يبقى يروح يشتكى فى القسم 😉😊