30 Jan 2018
ماحدش يقول الشعب يريد !!
—————————
بمناسبة الإنتخابات الرئاسية .. طبعا كلنا شايفين حالة الشحار و السعار الشديد ، سواء بين الأحزاب الكرتونية أو ممثلين النخبة المصرية العرة ، او من يطلقون على أنفسهم نووووشاتااااء ، أو حتى حبايبنا الإعلاميين … واللى برغم إنهم كلهم صوتهم عالى ، وكل واحد فيهم بيطلع يحزق ويجعّر من على منبره لحد ياعينى ما اللوز بتاعته تبان .. سواء كانت هذه المنابر مؤتمرات صحفية ، أو لقاءات حزبية ، أو بيانات على السوشيال ميديا ، أو حتى منابر إعلامية .. إلا إنهم الحقيقة كلهم مثيرين للشفقة والغلب .. وواضح عليهم كلهم إنهم هــ يتجننوا ياعينى ، ومش مصدقين إنهم فقدوا كل قدراتهم على تحريك الأمور وقلب الأوضاع بعد ما كان كل واحد فيهم من 5 سنين بس ، و بإشارة من صباعه ، أو حتى تويتة أو ستاتيوس على الفيسبوك ، بيقدر بيحرك ألالاف من المغيبين .. و بــ يجد فى نفسه كم كبير من التبجح اللى يخليه يطلع بكل صفاقة ينظّر ويدى لنفسه الحق إنه يتكلم بإسم الشعب المصرى ويهتف ويقول المقولة الشهيرة “الشعب يريد” !!
.
ولحد النهاردة .. كلهم بيتحركوا فى هذا الإطار مما يطلق عليه فى علم النفس “متلازمة الثبات الزمنى” .. وتلاقيهم لسة بيتكلموا بإعتبار إنهم مؤيدين شعبياً ، وإن كل واحد وراه الملايين من الجحافل القادرين على إحداث التغيير وقلب الترابيزة على دماغ النظام الوحش الشرير القمعى الديكتاتورى البتنجانى ، اللى بيكمم أفواه المعارضين الكيوت ، وبيحجر على الحريات وبيقمع الشعب المصرى كله اللى تعداده يادوب بتاع حوالى 89 مواطن كدة ممكن يتلمّوا فى زنزانة واحدة .. مايجراش حاجة يعنى 🙂 🙂 …. !!!
.
والحقيقة إن الكلام ده مدعاة للسخرية ، لأنه إذا كان المتكلم مجنون ، فالمستمع عاقل وبيفهم ، وعنده على الأقل الحد الأدنى من الوعى والإدراك … و هــ نقول لكم لييه بنقول كدة وإحنا بنعطى امثلة على البعض من اللى إتكلموا بإسم الشعب فى الكام يوم اللى فاتوا سواء كانوا مرشحين محتملين للرئاسة ، أو من نمازج النخبة العرة اللى عايشين فى العالم الوهمى الإفتراضى بتاعهم سواء فى عقولهم او على مواقع السوشيال ميديا 🙂
.
نبدأ بالأستاذ خالد على المحامى الفاشل ، و الحقوقى الفاشل ، والمرشح الرئاسى الفاشل من ايام ما رشّح نفسه فى إنتخابات 2012 … !!!
الأخ خالد على اللى بيقول إنه معاه تأييدي شعبى جارف ، وإن كل قطاع الشباب وراه .. هــ نلاقى عدد المتابعين له على تويتر حوالى 2 مليون متابع .. ولما أعلن نية ترشحه .. طالب كل المتابعين له ، والشعب اللى وراه إنهم يعملوا توكيلات ، وإنهم يعملوا سلاسل بشرية لتسليم التوكيلات دى فى ميدان التحرير يوم 25 يناير … ولما ياعينى لقى صعوبات فى جمع 25 ألف توكيل .. قام إنسحب يوم 24 يناير من قبل مايبقى حتى مرشح رئاسى حقيقى تقبله اللجنة العليا للإنتخابات !!!
.
– يعنى الأخ اللى عنده 2 مليون متابع تقريبا ماعرفش يجيب منهم 25 ألف توكيل
– يعنى الأخ اللى معاه تأييد قطاع الشباب اللى بيمثل أكثر من 50% من تعداد الشعب المصرى .. هــ نقول إن نصهم معاه .. يعنى حوالى 25 مليون ، ماعرفش يلم منهم 25 ألف توكيل ….
– يعنى الأخ اللى داخل ينافس فى إنتخابات رئاسية ، حجم الكتلة الناخبة اللى فيها يقترب من 60 مليون ماعرفش يلم 25 ألف توكيل .. وهو هو نفس الشخص اللى فى عز هوجة الإنتخابات فى 2012 ، جاب 134 ألف صوت من إجمالى 52 مليون ناخب …. وبعد كل ده يطلع يقول اصل فيه تضييق من الدولة .. والدولة بتقمع الحريات !!! … (بس لازم نقول الشعب يريد لزوم الشو الإعلامى).
.
مثال أخر .. وهو الأستاذ خالد داود الرئيس الحالى لحزب الدستور بتاع البرادعى سابقاً .. ملأ الدنيا نباحاً وعويلا ، وتباكياً على حال الديموقراطية فى مصر ، وإن الشعب المصرى رافض اللى بيحصل .. وهو أصلا حصل على منصب رئيس حزب الدستور بالتزكية 🙂 .. يا سلام على النموذج الديموقراطى … وبعدين حضرتك بتتكلم بإسم الشعب بمناسبة إييه !؟ .. هو حضرتك حد يعرفك اصلا من الشعب .. وعددهم كام اللى يعرفوك !!؟؟ .. وإييه هو حجم الكتلة التصويتية لحزب الدستور على الأرض !!؟؟ .. (بس لازم نقول الشعب يريد لزوم الشو الإعلامى).
.
عبد المنعم أبوا الفتوح بقى اللى أخدها من بدرى بدرى ، وقال إنه بيعتذر لكل اللى بــ يطالبوه بالترشح ، لأنه مش شايف مناخ ديموقراطى فى مصر … إييه ده بجد !؟ .. هو فيه حد اصلا طلب منك تترشح !!؟ .. طب ياترى عددهم قد إييه !!؟؟ .. والكتلة التصويتية بتاعتهم على الأرض قد إييه … وإلا إحنا نسينا إن نزولك فى إنتخابات 2012 فى ثوب المسلم الليبرالى المتفتح كان هدفه من الأساس هو تفتيت وتفكيك الأصوات الليبرالية علشان تسقط ويسقط معاك كل المرشحين الليبراليين واليساريين اللى نزلوا الإنتخابات .. وهو ده اللى حصل بالفعل !!! .. (بس لازم نقول الشعب يريد لزوم الشو)
.
حمدين صباحى اللى دخل إنتخابات ثنائية نزيهة فى 2014 بشهادته هو ، ورغم إنهم كانوا 2 مرشحين فقط ، إلا إنه طلع ترتيبه الثالث بعد الأصوات الباطلة .. طلع من كام يوم فى مؤتمر جماهيرى فيه بتاع حوالى 30 شخص ، وبيتكلم بإسم الشعب ، وبيقول إنه ان الأوان لإسقاط هذا النظام القمعى !! (ولازم نقول الشعب يريد لزوم الشو الإعلامى).
.
جنينة وأبوالفتوح وعصام حجى وحازم حسنى وأنور السادات اللى عملوا بيان يدعوا للعصيان المدنى ولمقاطعة الإنتخابات .. إنتم مين !!؟؟ .. وبتعملوا إييه !!؟؟ وإييه حجمكم على الأرض .. وإييه حجم الكتلة التصويتية الناخبة اللى تقدروا تتحكموا فيها !؟ .. ومين أعطاكم الحق تتكلموا بإسم الشعب .. ولما انتم جامدبن قوى كدة .. الفريق الرئاسى بتاع الأستاذ حجى إنسحب من الرئاسة لييه !؟ .. وبعدين رجع تانى يعلن دعمه لعنان لييه ؟؟ … وإلا هو (لازم نقول الشعب يريد لزوم الشو).
.
عنان وقنصوة ، اللى مواقع السوشيال ميديا بتتباكى عليهم ، وكل الصفحات المشبوهة بتعلن دعمهم اما النظام القمعة الطاغية .. وبيقولك الشعب كله بيدعم ترشحهم ، بل وفوزهم بمقعد الرئاسة .. طب فيييين !!؟؟ .. وإلا هم شغالين على شعب متخفى بيدعمهم بالنية بس !!؟
.
و ده غير شوية مرشحين كدة لزوم الشئ ، اللى مش عايزين ينزلوا علشان خايفيين حد يشتمهم فى الإعلام ، ومؤيدين السيسى القمعى الديكتاتور هــ يتريقوا عليهم …. ياحبيييييبى !!!… خايف من الشتيمة وعايز تمسك دولة بحجم مصر …. وطبعا مش هــ ننسى الإعلامى إياه اللى طلع يجعر هو و زوجته فى برامجهم ، ويقولوا بلاش تغتالوا المرشحين الرئاسيين معنوياً …. يا حبييييييييبى !! … خايفين من الإستهداف المعنوى على مرشحين عايزين يمسكوا دولة زى مصر فى منطقة زى منطقتنا دى !؟ .. أومال اللى انتم بتعملوه مع الرئيس والوزراء والجيش بقالكم 4 سنين ده إسمه إييه .. بتلاعبوهم بولة إستيميشن !!؟؟
.
خالد على اللى مدعوم من نصف قطاع الشباب زى ما بيقول مؤيديه يعنى حوالى 25 مليون .. وعليهم بتاع 5 أو 10 مليون حزب الدستور .. وزيهم كمان لحمدين صباحى بالإضافة للكتلة الساحقة الماحقة للإخوان بتوع الحشد اللى ماوردش على حد ، واللى فى عز قوتهم وحشدهم وتضامنهم مع السلفيين وكل طوائف التاسلم السياسى وإنضمام قطاع عريض من الشعب المخدوع فيهم ، وإستخدام كل الأساليب القذرة فى الحرب المعنوية على شفيق المرشح المنافس وقتها ، بإعتبار إنها معركة حياة او موت .. كل دوول ما كمّلوش الــ 13 مليون صوت … يعنى على حسب كلامهم كلهم ، وبالأرقام .. معاهم كتلة أكثر من اللى نزلت فى 30 يونيو … طب كل دوول فين !؟ .. كل دول مش قادرين يتوافقواعلى مرشح واحد ويجمعوا له 25 ألف توكيل .. ويدعموه بقوة امام النظام القمعى مع طلب ضمانات من جهات دولية لمراقبة الإنتخابات زى ما حصل فى 2014 !!؟؟
.
طب كل دوول مش قادرين يحشدوا حتى مظاهرة واحدة .. ويقولك اصل السيسى قافل الميادين !!! 🙂 … ياراجل ده الشعب المصرى كله كان فى الشارع يوم صعود منتخب مصر لكأس العالم ، والميادين فى مصر كلها كانت على أخرها … طب ماكانت فرصة .. وإلا إييه !؟
.
زى ما قولنا قبل كدة … الحشد الأليكترونى اللى إحنا بنشوفه ده كله ، واللى معظمه من حسابات مزيفة واشخاص كل واحد فيهم يدير 20 أو 30 حساب على السوشيال ميديا … هو كل ما يستطيعه هؤلاء ، من الذين فقدوا كل رصيدهم على الأرض .. ولم يبق لديهم غير مصطلح “الشعب يريد”
.
مش شغلانة المرشح الرئاسى زى ما قال المستشار محمد أبو شقة إمبارح فى المؤتمر الصحفى إنه يجيب مرشحين منافسين .. وقال فيما معناه ولكن بأسلوب مهذب فى إطار القانون الجنائى والأخلاقى .. إنه إذا كان المرشحين دوول مجموعة من الفشلة ومش قادرين يجمعوا توكيلات لأن مالهمش شعبية.. فــ دى تبقى مشكلتهم هم مش مشكلة المرشح المدعوم شعبياً !! .. يعنى من الأخر كدة ماحدش يطلع تانى يقول الشعب يريد .. لأن الشعب لما بــ يريد بــ يغير .. فياريت ترحمونا بقى من أمراضكم النفسية ومتلازمة الثبات الزمنى اللى بتعانوا منها ..
.
اللعبة دلوقتى زى ما قولنالكم قبل كدة ، هــ تكون على تشويه العملية الإنتخابية والدفع فى إتجاه فكرة التزوير .. ونشر تصريحات مزورة عن لسان المرشح الإنتخابى الثانى وصور فوتوشوب تحمل اللوجو الخاص للمواقع الإخبارية بأخبار وتصريحات مفبركة بهدف تشويه الدولة .. بالإضافة لعمليات البرمجة العصبية لكل الناخبين على أساس إن الإنتخابات إما محسومة ، أو مزورة .. علشان يحصل عزوف من الناخبين عن النزول … وطبعا مش هــ ننسى دور إخوان الشر من الإعلاميين الأجلاء المحترميييييين قوى ، اللى مافيش وراهم شئ غير تشويه العملية الإنتخابية ، برغم إنه حتى لو كان اللى نازل الإنتخابات مرشح وحيد ، فهو دستوريا صحيح تماماً !!
.
الموضوع بين إيديكم يا مصريين .. وصوتكم امانة
إنزلوا وإثبتوا بنفسكم إن الشعب فعلا يريد ..