18 Feb 2018
منظمة العفو الدولية و زمن التجسس الجميل
——————————————-
منذ ستينيات القرن الماضي و حتي الثمانينات ….. و في زمن التجسس الجميل …. كان المدخل الاشهر لضباط المخابرات في اختراق المجتمعات و تجنيد الجواسيس انه يقولهم ….. إحنا منظمة دولية تسعي لتحقيق و نشر السلام بين الشعوب …. بتتكون من افراد من كل الجنسيات …. و لينا مندوبين في كل دول العالم …. و محتاجين تعاونك معانا عشان ننقذ بلدك و شعبك من الحرب اللى ممكن تقتل أهلك و ناسك…. طب اسم المنظمه دي ايه !؟ … يقولك مانقدرش نقولك لانها منظمة سرية …. طب مقرها فين !؟ … يقولك ما قولنالك انها سرية 😊.
طب عايز ايه يا عم الحاج …. يقولك ابدا … محتاجين شوية معلومات …. اخبار عن الاقتصاد … صور للمواقع العسكرية … اي اخبار ممكن من تحليلها نعرف اذا كنتوا حتقوموا بحرب و لا لأ ….. و حنديلك فلوس كتير على اي خبر تجيبه … و لان المنظمة دي سرية … فــ لازم عملك يكون سري و ماحدش يعرف عنه حاجه ….. و طبعا دي مهمة سامية و لها اهداف نبيلة و كل ده عشان مصلحة بلدك ….. و طبعا كان الجاسوس جواه عارف و متأكد انه جاسوس و حقير … لكن الفلوس كانت بتعميه و تخليه يضحك على نفسه و يدى لنفسه المبرر الاخلاقي بانه بكدة بينقذ بلده .
و مع تطور علم الجاسوسية و تغير النظام العالمي …. تغيرت الحجة و الاسلوب …. و بدلا من انها كانت منظمات سرية تعمل لحفظ و نشر السلام … اصبحت منظمات علنيه بتدعوا لنشر و الحفاظ على حقوق الانسان …. و اصبح الموضوع اكثر بجاحة و عيني عينك … و اصبحت المنظمات دي ليها اسم معروف و مقرات رسمية … و الهيكل التنظيمي بتاعها و مجالس ادارتها معروفين … و ليها مواقع على الانترنت و بتعمل مؤتمرات في كل مكان … و بتاخد دعم من اجهزة المخابرات عيني عينك.
و بشكل عام …. تلاقي الحكومات الغربية بتطلب بشكل رسمي انك تفتح المجال و تسهل عمل ما يسمونه منظمات المجتمع المدني الاجنبية … و اللى افرادها بيطلعوا عيني عينك ياخدوا دورات تدريبية في مراكز بيشرف عليها ضباط مخابرات اجانب … و كمان يبعتولهم العمولة بتاعة شغلهم بشكل رسمى في صورة تمويلات 😊 …. و تلاقي انه بيتم دعم افراد المنظمات دي اللى اغلبهم بيكونوا نكرات في مجتماعاتهم او مخربين او مجموعة من الصيع اللى لا قيمة لهم في مجتمعهم ملهومش شغلة اصلا …. و بكل الطرق و الوسائل كل وسائل الاعلام الاجنبية تسلط عليهم الضوء و تنشر عنهم تقاريرهم المشبوهة …. و يعملوا منهم نجوم مجتمع و اصحاب قضية…. و بيدوهم اكبر الجوائز الدولية … و مؤتمرات و سفر و طبل و زمر و زغط و لغط 🙂 .
و لان الغرب عارف كويس هو بيعمل ايه … و عشان مايدوقش نفس السم …. عمل قوانين مشددة و رقابة صااااااارمة على منظمات المجتمع المدني اللى بتشتغل على ارضه … و بيحاسبها حساب الملكين سواء في التمويلات و مصادر انفاقها …. او حتي في تحركات افرادها …. لكن في نفس ذات الوقت … لما دولة تانية تقوم بتطبيق نفس القوانين … يهدوا الدنيا لو دولة اتجرأت و قبضت على احد أفرادها … او على الاقل راقبته و ضيّقت عليه عمله في جمع المعلومات او القيام باعمال تخريبية او تقليب الراي العام او نشر اكاذيب و تقارير ملفقة … تلاقي الدنيا تنقلب و الحكومات الاجنبية تشجب و تندد … و تقولك … ازاي تضايق الجاسوس بتاعنا … بنفس بمبدأ “انتوا ازاي تتهجموا على الناس في بيوت الدعارة” 🙂 …. و بــ تتدخل الحكومات بكل ثقلها لحماية و الافراج عن افرادها لو تم القبض عليهم زي ما بيعملوا بالظبط لما بيتمسك جاسوس حقيقي …. زي بالظبط لما اوباما خصص 5 دقائق كامله من خطابة في الامم المتحده عشان المدعوا أحمد ماهر بتاع 6 إبريل …. و ازاي امريكا كانت حتموت لمدة 3 سنين عشان تستلم آيه حجازى و في الاخر بعتوا خدوها بطيارة عسكرية … ده غير عدد من اخر تم تسلمهم بطائره عسكرية في قضية منظمات المجتمع المدني عام 2011 …. و اللى مصر تعاملت مع القضيتين دول بنفس محددات التعامل مع تسليم و تسلم الجواسيس … يعني لينا عندك برده ناس و سلم و استلم.
و من اشهر المنظمات دي … “منظمة العفو الدولية” …. اللى كتييييير من الناس مخدوع فيها … و محدش من الاعلام يجرؤ انه يتكلم عنها او يقول الحقيقة …. و دائما و ابدا بيصرّوا انهم يوهموا الناس انها منظمة دولية رسمية.
و للاسف محدش بيقول انها منظمة اهلية … مالهاش اي علاقة بالامم المتحدة و لا اي منظمة رسمية …. و زيها زي جمعية رسالة اللى عندنا بالظبط …. مقرها شقة في لندن و عنوانها لندن الدور التاني 😊 ….. و اللى بيصرف عليها جهات مجهولة …. و تقاريرها موجهة و مسيسة و مادة يومية في قنوات الجزيرة و على لسان قنوات الاخوان و اللى رائحة اللحمة الضاني دائما و ابدا بتفوح منها …. ماتسمعش صوتهم طول ما الارهاب بيقتل و يفجر في مصر … و تسمع عويلهم و كذبهم اول لما تفرم الارهابيين … زي بالظبط نواحهم و تباكيهم الان على شقي عمر اللى بيمولهم اللى بيروح دلوقتي في سيناء لما نشروا تقارير ان الجيش بيستخدم القوه المفرطة مع الارهابيين و بيستخدم قنابل محرمة دولياً و شوية حيقولك بيضربهم بغاز الاعصاب .
و من المنظمات المشبوهة دي “هيومان رايتس ووتش” … و اللى برضوا هي مش منظمة رسمية و لكن منظمة مدنية امريكية و غير تابعة لا للحكومة الامريكية و لا اي حاجة … و تقاريرها مسيسه و تخدم في اتجاه واحد فقط و هو تقويض فرض الامان في الدول … و اعطاء غطاء لكل و اي شىء يؤدي الى الفوضي الخلاقة اللى بيتمنوها.
دول زي روسيا و الصين كانوا فاهمين الموضوع ده من زمان … و قفلوا الباب تماما امامهم … و عشان كده … دائما و ابدا الدول دي مستقرة و اقتصادها بيتنامي و مجتمعها بيتطور حسب معايير و بما يتناسب مع ثقافة المجتمعات دي.
و نقول كمان ….. مصر بتنظف .. و المولد انفض …. لو حضرتك معارض و عندك فكر حقيقي صحيح و قابل للتطبيق و تملك مشروع وطني حقيقي …. الناس حتساندك …. و ساعتها حتقدر تعمل حزب سياسي و تدخل البرلمان و حتحاول تطبق فكرك ده فعلياً في اطار شرعي و رسمي و قانوني … لكن لو حضرتك فاشل و مافيش عندك غير التنظير و محاربة الدولة و نظامها الجمهوري و مؤسساتها الرسمية … مصيرك حيكون مش احسن من المنظمات و النخبة الفاشلة العرة …. اللى الشعب المصري لفظها و احتقرها … و يوم مناه لما يخلص منهم و هو بيغني و يقول تسلم الايادي.
تحياتنا