17 Mar 2018
جواب مسجل بعلم الوصول
————————-
بسم الله الرحمن الرحيم
اخي العزيز المقاتل
تحيه طيبه و بعد …. عامل ايه يا خويا و ايه اخبارك … احب أطمنك ان احنا بخير و سلام و بندعيلكم في كل صلاه … ربنا يثبتكم و ينصركم و يرجعك لينا سالم غانم يا رب العالمين.
في الاول احب اقول لأخواتك المنسي و حسنين و شبراوي و علي و الشحات و مئات غيرهم من اخواتك الشهدا اننا مش ناسينكم … انتم اكيد شايفنا و سامعنا …. مهو الشهيد حي يرزق …. بقولكم إوعوا تفتكروا ان دمكم راح هدر ……. انتوا على طول قدام عنينا و في قلبنا ….. و زي ما فيه اخوات ليكم بيحاربوا عشان يجيبوا حقكم من كلاب الارهاب في سيناء … احنا كمان نزلنا نجيب حقكم من الخواجه اللى بيدير و يصرف و يسلح الارهابى اللى قتلكم…. و مش في الانتخابات و بس …. ده احنا مكملين المشوار و بنشتغل و نعمر …. .
أما انت يا خويا …. بلغ اخواتك محمد و مينا و عبدالله و أندرو …. اننا في ضهركم …. ايوه يا اخويا انا في ضهرك … خلص انت بس من عندك … و سيب لنا احنا الشغل و البنا و التعامل مع خونة الداخل و مؤامرات الخارج.
مع اني عايز اعترفلك باعتراف … اني انا بحسدك … اه و الله العظيم بحسدك …. عارف !!! ….. انا كنت زيك كده مجند في الخدمه …. يمكن من خمس سنين او عشره او عشرين او يمكن تلاتين سنه … و كنت في قت التدريب او حتي لما بقف خدمه بالسلاح… كنت بفكر في اللى حاربوا في اكتوبر … و كنت بقول يا بختهم …. لان فيه منهم اللى فاز بالشهاده … و اللى مختارتهوش الشهاده عاش و داق حلاوة النصر و تطهير الارض …. و كنت بقول في نفسي يا رتني كنت موجود في الوقت ده ….. اما انت يا عم مين قدك … انت نزلت تحارب و تنول شرف الدفاع عن الارض و العرض ….. لكن …. مش مشكله … انا برده بحارب زيك …. و بدافع عن بلدي زيك … يمكن مش بالسلاح … لكن بالقلم و الفاس و العمل و العرق.
اوعوا تفكرب يا خويا اننا مشغولين بحياتنا و مشاكلنا و ناسينك … دي عمرها ما تحصل …. لكن دي الهوايه المفضله لينا لما الخطر يقرب مننا …. اننا نقوم بخطة الخداع الاستراتيجي …. كل مره اهل الشر يطمنوا لينا و ساعة الجد يلاقينا على قلب رجل واحد في ضهرك و ضهر اخواتك اللى بيحاربوا عشان الدرس يطلع من نافوخهم …. هي حاجه كده في الجينات عمرها ما بتتغير.
و اخيرا … ربنا معاك و يسلمك … و لما تخلص مترجعش …. احنا اللى جاينلك في سينا نستلم منك … عشان نعمرها بجد .. و نزرعها بجد .
و السلام أمانه ليك و لكل الرجاله اللى عندك.
إمضاء
أخوك مواطن مدني مقاتل
مصري ابن الحاج مصري