التصعيد والشحن المعنوى .. و 30 يونيو

29 Jun 2018

التصعيد والشحن المعنوى .. و 30 يونيو !
—————————————-

طبعا بقالنا فترة طويلة بنسمع مصطلح ” #صفقة_القرن” .. المصطلح اللى اثار كتير من الجدل فى كل الأوساط السياسية .. واصبح هو الشغل الشاغل للجميع … بل واصبح هو كلمة السر اللى بيتم بيها تفسير اى حاجة غامضة أو مش مفهومة بتحصل .. وفاضل شوية ونلاقى لما واحد يتخانق مع زوجته فى البيت أو إنفصلوا لا قدر الله ، تلاقى اللى طالع يقولك إن ده جزء من صفقة القرن والأسباب كيت وكيت وكيت .. والإتفاق كان كيت وكيت .. وترامب قال والسيسى قال والملك عبدالله أكد .. ألخ ألخ ألخ برغم إنك لو سألت أى حد سؤال مباشر ، هى إييه صفقة القرن دى ، هــ تسمع صوت صرصور الحقل الحزين !!

صفة القرن هو مصطلح ورد على لسان دونالد ترامب رئيس الولايات المتحدة الأميريكية .. والرئيس السيسى رئيس جمهورية مصر العربية .. والملك عبدالله ملك الأردن .. والأمير محمد بن سلمان ولى عهد السعودية … طب اللى هى إييه حضرتك تفاصيل صفقة القرن دى !!؟؟ .. ماحدش يعرف .. طب بتقول إييه .. ماحدش يعرف .. والوحيد اللى وضح بإقتضاب فى احد حواراته كان هو الرئيس السيسى لما قال إن صفقة القرن هى إنهاء اسباب كل اللى بيحصل فى منطقة الشرق الأوسط واللى اساسه هو القضية الفلسطينية وبالتالى هــ يكون فيه حل بالرجوع لحدود 67 وقيام الدولة الفلسطينية وعاصمتها القدس الشرقية .. والكلام ده ذكره اكثر من مرة وأهمها فى كلمته الأخيرة فى مجلس الأمن … يعنى الكلام أهو واضح وصريح ومافيش فيه أى شبهة ..

طب نرجع ورا شوية ….. شوية كتير كدة لحد سنة 2012 .. هنلاقى إنه بمجرد تأكد وصول الإخوان للحكم .. قامت الحكومة الإسرائيلية بوضع خطاب في مكتب أمين عام الأمم المتحدة تطالب فيه بتدويل شبه صحراء سيناء وإعتبارها منطقة محايدة تتبع الأمم المتحدة …. ومش كدة وبس .. لكن كمان بدأت حملة لتعبئة الكونجرس الأمريكي للضغط علي الرئيس الأميريكى أوباما وقتها علشان يوافق على تبنّى مبدأ تدويل سيناء ….. و لو تفتكروا إنه كان بــ يتم الترويج وقتها وحتى نهاية 2012 بمنح سيناء للفلسطينيين لإقامة وطن قومي … وطبعا فاكرين صديقى العزيز شيمون بيريز وكدهوّن 😊 ..

ولما إرتفعت الأصوات المعارضة للموضوع ده .. بدات عملية تجنيس الفلسطينيين وإعطائهم بطاقات رقم قومى .. وحصل موضوع سرقة ماكينة بطاقات الرقم القومى وتم رصد بطاقات رقم قومى جديدة غير معلومة المصدر .. وبدا الحديث عن مشروع محور تنمية قناة السويس واللى هــ يكون له قانون خاص وخاضع مباشرة لرئاسة الجمهورية .. و هــ تدخل فيه قطر كممول رئيسى ، وتم إثارة إن قطر عايزة تاخد قناة السويس حق إنتفاع لمدة 99 سنة … وأصدرت الرئاسة وقتها قرار بمنح الأجانب حق تملك الأراضى فى سيناء … وتسارعت إلإدعاءات المتكررة وقتها بإن سيناء أصبحت ملاذ ونقطة تجمع لإرهابي القاعدة للتسلل إلى إسرائيل ، وكأن العدة بيتم إعدادها لفصل سيناء عن القطر المصرى تماماً ووضع قوانين خاصة لها كتمهيد للإنفصال الكامل وإعتبارها وطن بديل .. أو لتدخل دولى لحماية إسرائيل وحماية مصالح التجارة العالمية فى قناة السويس … وحصل وقتها أول صدام بين وزير الدفاع الفريق عبد الفتاح السيسى مع مؤسسة الرئاسة وتنظيم الإخوان ، لما اصدر بيان من القوات المسلحة بمنع تملك الأجانب لأى اراضى فى سيناء وأصدر قرار عسكرى اخر باعتبار كل مناطق الحدود المصرية “مناطق عسكرية” .. وبدأت عملية تتبع بطاقات الرقم القومى المضروبة .. وبدأت عملية الوقوف فى وجه مشروع محور قناة السويس .. ووصولا طبعا إلى 30 يونيو اللى أنقذت مصر بالفعل من مستقبل مظلم !

الكلام اللى فات عن الصورة اللى كانت عليها الأوضاع قبل 30 يونيو كانت مجرد تذكير علشان بس الناس اللى بتنسى .. ومدخل يرجعنا تانى لصفقة القرن اللى قال الرئيس السيسى عنها إن الإطار العام لها هو حل الدولتين وقيام دولة فلسطين وعاصمتها القدس الشرقية … طب هو إييه اللى حصل .. اللى حصل زى ما قولنا كتير قبل كدة إن 30 يونيو بوظت المخطط كله اللى إحنا ذكرنا واللى كان بيتم الإعداد له فى 2012 وضربت كرسى فى الكلوب .. وعلشان كدة كان لازم الطاقم بتاع أوباما وكلينتون يمشوا وييجى طاقم جديد بفكر جديد وخطة جديدة … طب اللى هو إييه .. اللى هو طالما الموضوع مامشيش فى مصر ، والجيش المصرى والشعب المصرى بوظوا الليلة .. يبقى لازم العطا يرسى على حد تانى .. طب نعمل إييه .. نهد سوريا ونلم كلاب السكك من كل حتة .. ولما سوريا صمدت بمساعدة روسيا .. اصبح فيه إستماتة فى المحافظة على الإرهابيين اللى فيها .. ومحاولة الإحتفاظ لهم بمناطق نفوذ كجيوب أمنة يقدروا يتحركوا منها ويهددوا الأردن وبمساعدة إخوان الداخل الأردنى علشان يبقى الأردن بين شقى الرحى … إما إنه يوافق على حل الدولتين على حساب الضفة .. وننسى خالص موضوع القدس الشرقية دى .. يا إما يتم إشعال الموقف داخليا فى الأردن .. وتأليب الشعب على الإصلاحات الإقتصادية .. وتنزل الناس فى الشارع ، والإخوان ينفخوا فى النار .. ويبقى شبح النموذج السورى والليبى واليمنى نصب أعين الملك عبدالله وحكومته !!!

طب هل ده فيه ضرر على مصر !!؟؟ .. طبعاً …. أولا لأنك كدة بتهد القضية الفلسطينية وبتفرغها من محتواها .. وثانيا إن الأردن فى كلا الحالتين هــ تسقط وتبقى تحت إيدين داعش .. وتلاقى نفسك فجأه ياحلو عندك حدود مع داعش بتمويل قطرى ودعم لوجيستى تركى .. وبينك وبين داعش خليج العقبة .. وكل يوم تلاقى صواريخ بــ تطير عليك من اماكن مجهولة تصرب فى سيناء .. ونرج تانى للمربع صفر اللى كان فى 2012 .. وتتعالى النداءات من جديد إن سيناء اصبحت غير أمنة وملاذ للإرهابيين ونقطة تجمع للتسلل داخل إسرائيل .. تمهيدا لتدخل دولى لحماية إسرائيل وحماية مصالح التجارة العالمية فى قناة السويس 😊 .. ومن هنا طبعا جائت العملية سيناء 2018 .. ثم تحركات مصرية على المستوى السياسى لحماية الأردن وقطع الطريق على كل ما يتم التخطيط له فى هذا السياق تحت إطار مصطلح ما يسمى بــ #صفقة_القرن

الصحف الإسرائيلية سربت تفاصيل صفقة جاريد كوشنير مستشار وصهر الرئيس الأمريكي دونالد ترامب وبعوثه للتسوية فيما يخص القضية الفلسطينية وصفقة القرن وقالت إن السيسى رفضها تماماً .. وبدل ما كان الكلام على إن حماس والفلسطينين ياخدوا حتة من سيناء .. لأ .. دلوقتى العطا هــ يرسى على حاجة تانية خالص

إن فلسطين تبقى عبارة عن جزئين … الاول في الأردن بطرد الضفة الى شرق نهر الأردن و إنهم يقيموا عاصمة لهم في مدينة أخرى .. وننسى خالص موضوع القدس عاصمة ده .. والأردن تشرف إداريا فقط على الأقصى و كنيسة القيامة …. والجزء الثانى في سيناء وبدعم الإخوان طبعا بطرد غزة الى سيناء … يعنى مصر تاخد غزة وتشيل ليلتها وتضمها للأراضى المصرية مقابل حزمة مشروعات وتمويلات أمريكية بقيمة 70 مليار دولار بشترط إن 70% من المستفيدين منها يكونوا من أهل غزة !!! بالإضافة لإنشاء منطقة تجارية دولية فى العريش … (فاكرين الــ 8 مليار بتوع أوباما لتوطين الفلسطينيين فى سيناء ، و اللى الكونجرس سأله عملت فيهم إييه !؟) … طب مين اللى بوظ الليلة دى كلها للمرة الثانية وضرب كرسى فى الكلوب .. هى مصر ممثلة فى الجيش المصرى ومؤسسة الرئاسة المصرية وعلى رأسهم عبد الفتاح السيسى رئيس الجمهورية اللى امه يهودية واللى خان وباع أراضى مصر وقبض الثمن ,, اللى كل مؤسسات الدولة السيادية بيغطوا عليه وقابضين هم كمان … و … و … و … و …

ياريت بس نفتح اللينك ده من جريدة ها أرتس الإسرائيلية لأن الكلام لما يصدر من عدوك مش محتاج لتأكيد اكثر:

طب مصر والأردن لما رفضوا عرض كوشنر .. إيه اللى حصل !؟ .. حصلت تحركات سياسية محمومة .. كوشنر خرج من مصر جرى على قطر بعد تصريحه هو والفريق المعاون إن لقائه مع الرئيس السيسى مخيب للأمال .. و انجيلا ميركل عملت زيارة مفاجئة للأردن تم التعتيم عليها .. وترامب إستدعى الملك عبدالله للقائه فى أمريكا .. وبدأ الحديث فى الصحف العالمية عن رفض مصر لصفقة القرن فى صورتها المعدلة … لأ .. وبتحرض العرب كمان على رفضها … وبدأت تظهر عناوين هجومية ومحرضة ضد مصر من رويترز ويوديعوت احرونوت الإسرائيلية و “يو إس توداى” الأميريكية و “ديل شبيجل” الألمانية وغيرهم وغيرهم .. وبالتزامن مع كل ده بدأ يظهر هاشتاج “إرحل يا سيسى” وبدا النفخ فى النار فى الداخل المصرى زى ما حصل فى الأردن بالضبط فى الفترة الماضية .. و زى ما حصل فى يناير 2011 .. إنه يتم إستخدام الأوضاع الداخلية .. بإستخدام الناس نفسها والعزف على وتر حاجات كتيرة اهمها مستوى المعيشة وصعوبة الإجراءات الإقتصادية .. وإستغلال كل المفردات النشاز اللى بيتم إستخدامها كل مرة و بــ يتم فيها محاولة إشعال الشارع … وطبعا مش محتاجين نقول إن مواقع التواصل الإجتماعى بيتم فيها الشحن والنفخ فى النار عن طريق افراد عاديين حقيقيين كلنا عارفين خلفياتهم وتوجهاتهم إييه .. بالإضافة للجان الأليكترونية .. وأكيد كلنا سمعنا عن الست اللى إتقبض عليها فى مصر من مدة وكانت بــ تدير 25 حساب وهمى على الفيسبوك مهمتهم التحريض ونشر الشائعات والأكاذيب عن مصر.

طب هل الكلام ده كله ينفى صعوبة الأوضاع الإقتصادية على المواطن المصرى !؟ ..

طبعا وقطعا وقولا واحدا .. أكيد لأ …

لكن كمان الأوضاع الإقتصادية لا تنفى إن فيه صولات وجولات خلف الستار ماحدش يعرف عنها حاجة ، وبيتم الضغط بيها على مصر لإجبارها على الرضوخ وقبول ما لا يمكن قبوله ، كجزء من المؤامرة اللى اطرافها أصبحوا معروفين خلاص .. وتم كشف تفاصيلها .. ويكفى إننا نبقى شايفين بعنينا إن مصر هى الدولة الوحيدة فى العالم اللى بيتم التحريض عليها علناً بإسقاطها .. ومش كدة وبس .. لكن دى مصر هى الدولة الوحيدة فى العالم اللى فيه قنوات إعلامية مفتوحة بالكامل 24 ساعة فى الــ 24 ساعة علشانها ، و مش بتعمل حاجة غير التحريض ضد مصر والهجوم عليها وعلى مؤسساتها .. وتلاقى واحد طالع يسخر ويستخف دمه ويقولك هى فين المؤامرة .. 🙂

اللى بيحصل دلوقتى هو ادوات للتركيع ومقدمة للى ممكن يحصل فى الفترة القادمة للضغط على مصر والأردن .. يا إما توافقوا على اللى إحنا بنقوله .. يا إما نولع لكم فى الدنيا .. وبعد ما الدنيا تولع برضوا هــ يحصل اللى إحنا عايزينه 😏 .. لكن أحب بس ابشرهم بإنه لا مصر هــ تقبل بالضغط … ولا الدنيا هــ تولع .. لأنه برغم كل شئ .. المواطن المصرى اصبح أوعى بكتير من إنه يتم التلاعب بيه إو إستخدامه مرة تانية لتحقيق مئارب الشيطان دى … ويمكن هو ده اللى دفع الصحف الإسرائيلية تقول فى تسريباتها إن مصر أعلنت رفضها للموضع كله ، و هتضرب كرسي في الكلوب حتى لو وافق الاردن و الفلسطينيين نفسهم .. وإن مواقف الاردن و الخليج حتى وإن بدت مرنة و لو على سبيل المناورة السياسية …. الا انها بتتحول للرفض بصلابه بعد تدخل القاهرة .. وعلشان كدة ، أى خطط مستقبلية يجب ان يتم فيها احتواء القاهرة و اخذ موافقتها ما دام في الاخر بتيجي تحيا او تموت حسب راي القاهرة ..

فرصة سعيدة

لمتابعة تعليقاتكم